ONA TILIMIZ ZAVOL TOPMAYDI
Dunyodagi qadimiy va boy tillardan biri boʻlgan oʻzbek tili asrlar osha xalqimizning ichki maʼnaviy dunyosi, insoniylik olamini ifodalab kelayotgan milliy boyligimizdir. Xalq dostonlaridagi timsollarimiz, maqol va topishmoqlar olamidagi sir- u asrorlar, kitobxonni hayratga soladigan afsonalar, sehrli baytlar, oʻtli misralar, pandnomalar ana shu jozibali ona tilimizda bitilgan, uning boʻy-bastini dunyoga tarannum etgan. Maʼnaviyatni Sharqdan oʻrganish kerak deganda allomalar qanchalik haq ekanligini hayot isbotlab turibdi. Chunki bagʻrida insoniylik mevalarini yetishtiradigan adabiyotimizga, goʻzal tilimizga talpinishning oʻzi bir maʼnaviyat. Ona tilimiz sofligi va goʻzalligini saqlab avlodlarga yetkazmoq biz kattalarning muqaddas burchimiz.
Oʻzbekiston Respublikasi Prezidenti tomonidan "Davlat tili haqida"gi Qonun qabul qilinganligining oʻttiz yilligini munosib kutib olish haqida qaror qabul qilindi. Bu ayni vaqtda tilimizga boʻlgan eʼtibor va hurmatning bir koʻrinishi. Davlat rahbari va hukumatimiz tomonidan qabul qilingan qaror munosabati bilan joylarda tilimiz haqidagi Qonunning oʻttiz yilligini nishonlash boʻyicha turli xil tadbirlar amalga oshirilmoqda. Bu chora va tadbirlar yoshlarni oʻz ona tili va adabiyotini ardoqlash va asrab-avaylash tuygʻularini yanada rivonlantirishi shak- shubhasiz.
Men ham ona tili fani oʻqituvchisi sifatida ona tilimiz goʻzalligini bolalarga yetkazayotganimdan behad baxtiyorman. Oʻquvchilarda adabiyotga, badiiy asarlar oʻqishga boʻlgan qiziqishlarini oshira olsam ayni muddao.
Joriy yil Toshkent shahrida oʻtkazilgan "Men sevgan adabiy qahramon" mavzusidagi insholar tanlovida 8- sinf oʻquvchim Shomurodova Feruza bilan ishtirok etib qaytdim va ayta olamanki, bu kunlar pedagogik faoliayatimdagi eng baxtli, shukuhli kunlarim boʻldi. Sababi adabiyotni sevadigan yoshlar va ustozlar davrasida boʻlishning gashti boshqacha. Bu jarayonni kuzatar ekanman, bolajonlar qalbi keng, ular adabiyot olamida yashayotganini angladim. Kitob oʻqimayapti, deb tahlikaga tushishga hojat yoʻq. Bir-biridan zukko, bir-biridan ijodkor oʻquvchilar menga ilhom bagʻishladi. Men ham oʻz shogirdim taassurotlarini eshitib, umrim, faoliyatim bekor oʻtmayotganiga, shogirdlarimni ona tilimizni sevishga jalb qilayotganimga quvondim.
Qaysi millat oʻz ona tilini asrasa, eʼtibor koʻrsatsa, u millatning kelajagi yorugʻ. Biz ham ana shunday millatlar qatoridamiz, insholloh.
Barcha yurtdoshlarimizga ona tilimizga Davlat tili maqomi berilganligining oʻttiz yilligi muborak boʻlsin!
Guloyim BEGJONOVA, 11-sonli maktab oʻqituvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
