DUNYo XALQLAPI PAQSLAPI TADBIPIDA MILLATLAPAPO TOTUVLIK VA HAMJIHATLIK TUYGʻULAPI TAPANNUM ETILDI

Dunyoda millatlar va elatlar koʻp. Bu millatlar va elatlarning urf-odat va anʼanalari ham xilma-xil. Lekin dunyo xalqlarini bir-biriga bogʻlab turguvchi anʼanalar ham borki, ana shu anʼanalar buyuk maʼnaviy koʻprik vazifasini oʻtaydi. Bu – madaniy va maʼnaviy hamjihatlik anʼanasidir. Betakror musiqiy ohanglar, jozibador raqslar, xalqlar orzu-intilishlarini aks ettiruvchi folklor qoʻshiqlari. Chunki sanʼat millat tanlamaydi, oʻz sehr-u jozibasi bilan dillardan-dillarga, ellardan-ellarga koʻchadi, ohanrabosi bilan koʻngillarni rom etadi, hech bir tarjimonsiz qalblarni jipslashtiradi. Shuning uchun ham hind kuyimi yoki shotland va nemis raqsimi – koʻngillar birday qabul qilaveradi. Bu – millatlararo, hamjihatlikning betakror tantanasi!

Tumanimizda 30-sonli maktabda boʻlib oʻtgan “Dunyo xalqlari raqslari” tadbirida millatlararo hamjihatlik, doʻstlik va birodarlik tuygʻulari yanada ulugʻlandi.

Maktabning boshlangʻich sinf oʻqituvchisi Sharofat Qodirova tomonidan tayyorlangan stsenariy asosida oʻzbek tili va adabiyoti fani oʻqituvchisi Marina Kumekova hamda musiqa rahbari Bahodir Kamolovlar hamkorligida sahnashtirilgan tadbirda maktab oʻqituvchilari, 4-8-sinflarning oʻquvchilari va ularning ota-onalari ishtirok etishdi.

Yer yuzida yuzlab millatlar yashaydi. Bu millatlar qaysi tilda gaplashishidan qatʼiy nazar, oʻz sanʼatlari orqali oʻzga millat vakillari bilan bemalol, hech qanday tarjimonsiz tillashadi, dillashadilar. Tadbirda 4a-sinf oʻquvchilari tomonidan ijro etilgan hind xalq raqsi bilan tomoshabinlar quyoshli Hindiston zaminiga sayohat qilganday zavq-shavq oldilar. “Lezginka” raqsi ijro etilgan lahzalarda Armaniston, Gruziya, Ozarbayjon xalqlari xuddi sahnada birlashib, butun dunyoni shod-u xurramlikka, raqsga chorlayotganday manzara namoyon boʻldi.

Oʻzbek xalq raqsi “Andijon polkasi”, “Ispancha raqs”, “Shotland tangosi” ruslarning  mashhur “Kalinka” raqslari ijro etilganida hatto tomoshabinlar ham oʻz mahoratlarini namoyish etishga harakat qildilar.

Tadbir davomida qozoq, belarus, arab, turk va turkman, qoraqalpoq xalq raqslariga keng oʻrin berildi. har bir millatning raqsi ijro etilganida, oʻsha millatning milliy liboslari, urf-odat va anʼanalari haqida maʼlumotlar berib borilgani oʻquvchi-yoshlarning oʻzlari ijro etayotgan raqslar orqali millatlar hamjihatligi, tinchligi va osoyishtaligi naqadar ulkan kuch ekanligi haqidagi tushunchalari yanada boyidi.

Oʻquvchi-yoshlar nafaqat dunyo xalqlari raqslarini ijro etdilar, balki xalqlar doʻstligining beqiyos qudratini ana shu raqslar orqali tarannum qildilar.

Tadbir maktabning 4a- va 8 a-sinflari oʻquvchilari birgalikda kuylagan “Men, sen, u, ular!” ashulasi bilan yakunlandi.

Doʻstlik, hamjihatlik, millatlararo totuvlik tuygʻulari ulugʻlangan “Dunyo xalqlari raqslari” tadbiri barchada yorqin taassurotlar qoldirdi.

Sharofat QODIPOVA,
30-sonli maktabning boshlangʻich sinf oʻqituvchisi.