"KAMALAK"DA YaNGI YIL SARGUZAShTLARI

Xalqimiz bolajon, borini bolamga deb yashaydi. Bu azaliy qadriyatlarimiz davlatimiz siyosatida ham oʻz aksini topayapti. Yosh avlodning komil insonlar boʻlib voyaga yetishiga barcha sharoitlar muhayyo etilayotgan yurtimizda bayramlar, qutlugʻ kunlar tantanalarini ham bolalarga atalgan tadbirlar boshlab beradi. Yangi yil bayrami arafasida ham mamlakatimizdagi barcha umumiy oʻrta taʼlim, maktabgacha taʼlim tashkilotlarida Qorbobo va Qorqiz ishtirokidagi yangi yil bayramiga bagʻishlangan tadbirlar boʻlib oʻtdi.

 26-dekabr kuni Mangʻit shahridagi 31-maktabning 3-“A” sinf oʻquvchilari ishtirokida oʻtkazilgan “Yangi yil sarguzashtlari” tomoshasi ham bolajonlarga haqiqiy yangi yil shodligini hadya etdi.

Kamalakrang chiroqlar, anvoyi oʻyinchoqlar, qor parchalari bilan bezatilgan mahobatli archa atrofida bolajonlarning yangi yilga bagʻishlangan sheʼrlarni, qoʻshiqlarni mahorat bilan ijro etishi, ertaklar qahramonlari bilan goh hazil-mutoyibali, goh tortishuvli sarguzashtlari tomoshabinlarga xushnudlik bagʻishladi.

Sahnada oʻrmon oralab doʻstlarini yangi yil sovgʻasi bilan qutlagani ketayotgan Oppogʻoyni Yalmogʻiz kampir gapga tutadi. Shunda uning hamkori Qaroqchi sovgʻalarni olib qochadi. Bundan xabar topgan Mittivoy doʻstlari Qizil qalpoqcha va Polvonni yordamga chorlaydi. Shu tariqa doʻstlar bayram shodligiga rahna solishga uringanlarni yengib,  quvnoq va shodiyona  tarzda ayyomni nishonlashni boshlaydilar.  Tomoshabinlar yaxshilikning, ezgulikning yovuzlik ustidan gʻalaba qozonishini quvnoq qiyqiriqlar bilan olqishladilar. Sarguzashtlar davomida qahramonlarning raqslar, qoʻshiqlarni mahorat bilan ijro etganlaridan bolajonlar ushbu tomoshaga juda puxta va qunt bilan tayyorgarlik koʻrishganini anglash mumkin.

Bu stsenariyni sinf rahbari Omonjon Saʼdullayeva va yoshlar ittifoqi yetakchisi Shahnoza Xoʻjamurodovalar tanlashdi. Tomoshani bayram tadbirida sahnaga olib chiqish uchun sinfdagi barcha oʻquvchilar bir oy davomida astoydil tayyorgarlik koʻrishdi. Sahna bezaklari, kiyimlar masalasida ota-onalar ham qoʻllab-quvvatlashdi. Sinf rahbari uchun eng quvonchlisi, ayniqsa, tayyorgarlik jarayonida oʻquvchilarning bir-birlari bilan yana ham inoqlashib, hamjihatlikda ijodiy ishlashgani boʻldi.

Tomoshada sinfdagi 26 nafar oʻquvchining hammasi qatnashdi. Ayniqsa, Charos Jumaniyozova, Dilnura Ulugʻbekova, Lobar Oʻrinboyeva, Nodirbek Jumaboyevlarning ijrosi juda tahsinga sazovor boʻldi.

Tomosha soʻngida sahnaga Qorbobo va Qorqiz chiqib kelib, bolajonlarni, tomoshaga tashrif buyurgan ota-onalarni Yangi yil bayrami bilan qutladi, sovgʻalar ulashdi.

Aslida qobiliyatsiz bolaning oʻzi boʻlmaydi, deyishadi ruhshunoslar. Eng muhimi, murgʻak bolajonlar koʻnglidagi qobiliyatni anglab, rivojlantirishga harakat qilishda, ularni yaxshiliklar sari yetaklashda. Buni “Kamalakda yangi yil sarguzashtlari” tomoshasi orqali ham koʻrish mumkin.

Tomosha barchaga manzur boʻldi.

Oygul RAJABOVA.