“Yangi yilim, yaxshi yilim” deb nomlangan bayram tadbiri oʻtkazildi

Yangi yil cheksiz quvonch, shod-u xurramlik, shodiyonalar bilan kutib olinadi. Yurtimizning barcha hududlarida yangi yilning kirib kelishini munosib kutib olish maqsadida qizgʻin tayyorgarlik koʻriladi. Ayniqsa, bolajonlar, kichkintoylar ushbu bayramni oʻzgacha zavq bilan qarshi olishadi. Chunki bolalar uchun ham, kattalar  uchun ham bu bayram yanada qiziqarli va jozibadorligi bilan boshqa bayramlardan ajralib turadi.

Tumanimizda ham Yangi yil bayrami munosabati bilan bezatilgan archa atrofida turli tadbirlar, katta bayram tomoshalari tashkil etildi. Rang-barang musiqiy dasturlar, turli intellektual oʻyinlar, qiziqarli tomoshalar namoyish etilib, bolajonlar eʼtiboriga havola etildi.

Yangi yil bayrami arafasida 36-sonli maktabda ham katta tayyorgarlik koʻrildi. Maktab va sinf xonalari yangi yilga xos tarzda, bayramona bezatildi. Oʻquvchilar esa yangi yilga bagʻishlab maktabda oʻtkazilgan katta tadbirda teatrlashtirilgan musiqiy dastur namoyish etishdi va  bayramga yanada fayz kiritib, barchaning olqishiga sazovor boʻlishdi. Turli qoʻshiqlar, raqslar ijro etib, xush kayfiyat ulashishdi.

Maktabda boshlangʻich sinf oʻquvchilari uchun ham “Yangi yilim, yaxshi yilim” deb nomlangan alohida bayram tadbiri oʻtkazildi. Boshlangʻich sinf oʻqituvchilari va oʻquvchilari tomonidan tayyorlangan ushbu tadbirda yangi yil bayramiga bagʻishlangan musiqiy dastur namoyish etildi. Unda asosan 2-“V”sinf oʻquvchilari faol qatnashishdi. Qorbobo va Qorqiz, turli ertak qahramonlari, masxaraboz libosidagi oʻquvchilar bayramona bezatilgan sahnada kuy-qoʻshiqlar, raqslar, yangi yil haqida sheʼrlar ijro etdilar. Oʻquvchilar ijrosidagi “Assalom, Yangi yil!” qoʻshigʻi, “Masxaraboz”, “Xush kelibsan, Yangi yil” raqslari tomoshabinlardagi bayramona ruhni yanada koʻtardi va tadbirga oʻzgacha fayz kiritdi. Oʻquvchilardan Behruz Bahodirov, Qunduz Jumamurodova, Joʻshqin Yoʻldoshev, Azizbek Farhodov, Zilola Adilboyevalarning ijrolari barchaga juda manzur boʻldi. Ayniqsa, topishmoq va tez aytishlar, turli qiziqarli oʻyinlarda tadbirga tashrif buyurgan ota-onalar ham zavq bilan ishtirok etdilar. Oʻz navbatida oʻqituvchilar va ota-onalar oʻquvchilarni Yangi yil bayrami bilan tabriklab, oʻqishlarida muvaffaqiyat tiladilar. Bayramga bagʻishlab oʻtkazilgan ushbu tadbir  barchaga esda qolarli daqiqalarni hadya etdi.

Yangi yil — nafaqat bolalar, hatto kattalar ham niyatlari ijobat boʻlishiga ishonadigan ertakmonand bayram. Bu kunda ular bolalik atalmish ertakning bosh qahramoni — Qorbobo bilan uchrashadi. Bolajonlar oʻzlari sevib oʻqiydigan ertaklaridagi qahramonlarning sarguzashtlari, ezgulikning yovuzlik ustidan gʻalaba qozonishi aks etgan sahna koʻrinishlari jamlangan bayram tomoshalarini koʻrishadi. Birgalikda xursandchilik qilishadi va turli sovgʻalar olishadi.

Saragul Yusupova, 36-sonli maktabning

boshlangʻich sinf oʻqituvchisi.