ANIQ FANLAP BOʻYIChA OʻTKAZILGAN BELLAShUV OʻQUVChILAPNI YaNA HAM ChUQUP BILIM OLIShGA PUHLANTIPDI

Maktablarda oʻtgan oy davomida aniq fanlar oyligi munosabati bilan ochiq oʻquv mashgʻulotlari, turli tadbirlar, bellashuvlar, zakovat oʻyinlari tashkil etildi.

Qilichboy ovulining Yuqori qishloq mahallasida joylashgan 8-sonli maktabda fevral oyi davomida aniq fanlar oyligiga doir koʻplab tadbirlar oʻtkazildi.

Fan oyligi doirasida boʻlib oʻtgan 2 ta 6-sinflar, 2 ta 7- va 2 ta 8-sinflar oʻquvchilari orasidagi bellashuvda esa oʻquvchilarning aniq fanlarni qanday egallayotgani sinovdan oʻtkazildi.

Ushbu bellashuvda dastlab sahnaga 2 ta 6-sinflar oʻquvchilari chiqishdi va ular oʻz guruhlarini “Al Beruniy” deb nomladilar. Ular oʻz guruhini tanishtiruv, Al Beruniy va Al Xorazmiy hayoti va faoliyati haqida qiziqarli va koʻp maʼlumotlar aytish, matematikaga oid sheʼrlar aytish, sonlar qatnashgan maqollar aytish, tezkor savollarga javoblar aytish, krossvord yechish shartlari boʻyicha oʻz bilimlarini namoyish etdilar.

Erkin mavzu boʻyicha esa oʻquvchilar oʻzining alohida qobiliyatlarini namoyish etib, raqs ijro etdilar.

Ayniqsa, koʻzi bogʻlangan holda geometrik figuralar chizish sharti juda hayajonli boʻldi. Oʻquvchilar bellashuv davomida ustozlari Qunduz Abdullayeva, Aminboy Jumamudorovlarning aniq fanlar boʻyicha oʻtgan dars mashgʻulotlarini yaxshi oʻzlashtiribgina qolmay, fanga doir qoʻshimcha qoʻllanmalarni ham oʻqib-oʻrganib, bilimini oshirib borayotganliklarini namoyish qildilar.

Dilmurod Tursunboyev, Shahlo Oʻrozboyevalar aniq fanlardan taʼlim berayotgan 2 ta 7-sinflar oʻquvchilari esa beshta shart – guruhlarning oʻzini tanishtirishi, topishmoqlar javobini topish, amaliy mashgʻulot va belgilarni topish kabi erkin mavzular boʻyicha bellashdilar.

Bunda dastlabki shartda guruhlar oʻz safidagi oʻquvchilarga, guruhi nomiga izoh berishib, bellashuvga chiqishdan maqsadlarini bayon etishdi. Shuningdek, informatikaga doir topishmoqlarga javob berishda oʻquvchilarning oʻz bilimlarini tezkor va aniq ifodalab bera olishi namoyon boʻldi. Amaliy mashgʻulotlar bahsi yana ham qiziqarli tus oldi. Fanga doir bilimlar, mantiqiy fikrlash qobiliyati ustun oʻquvchilar uchun bu topshiriqlar ham unchalik qiyinchilik tugʻdirmadi.

Shuni alohida eʼtirof etish kerakki, bugungi kunda tumanimizning eng chekka hududlaridagi maktablar ham zamonaviy axborot-kommunikatsion texnologiyalari bilan taʼminlangan. Oʻquvchilar bu texnologiyalarni puxta egallab, kelajak sari dadil qadamlar qoʻyishmoqda.
Ushbu bellashuvning “Belgilarni top” shartida oʻquvchilar kompyuterda berilgan mavjud manzaraning belgilarini topib, taqdimot qilishgani ham oʻquvchilar ushbu texnologiyalarni qay darajada egallaganini koʻrsatdi.

“Goʻzallik” va “Haqiqat” deb  oʻz guruhlarini nomlagan 2 ta 8-sinflar oʻquvchilarining bahsi ham juda qiziqarli oʻtdi. Toʻlgʻonoy Jumaniyozovaning aniq fanlardan dars berayotgan sinflar oʻquvchilari ham bellashuv davomida gʻoliblik sari dadil intilib, oʻz bilim va salohiyatini namoyish etdilar.

Ushbu bellashuvlar oʻquvchilarning olgan bilimlarini baholash bilan birga ularni bilim asoslarini yana ham chuqur egallashga ruhlantirdi.

O.PAJABOVA.