Boshlangʻich sinf oʻquvchilari ishtirokida kitobxonlik targʻibotiga bagʻishlangan tadbir oʻtkazildi

Kitob inson maʼnaviyatini yuksaltirishning eng asosiy vositasi hisoblanadi. Koʻp kitob mutolaa qilgan insonning aql-u, zakovati, fikrlash doirasi, dunyoqarashi boshqalarnikidan tubdan farq qiladi. Kitob oʻqish insonni maʼnaviy sogʻlom, barkamol shaxs boʻlib shakllanish sari olib boradi.

Qolaversa, inson uchun hayot deya atalmish uzoq safarda, eng yaqin yoʻldosh, hamroh, eng yaxshi doʻst ham kitobdir.

Yurtimizda yosh avlod maʼnaviyatini yuksaltirish, farzandlarimizni kitob oʻqishga keng jalb qilish, shu orqali kitobxonlikni keng targʻib qilib, ularning turli yot gʻoyalar taʼsiriga tushib qolishlarining oldini olish hamda yosh avlodni kelgusida Vatan ravnaqiga munosib hissa qoʻshadigan komil inson qilib tarbiyalash bugungi kundagi eng ustuvor vazifalardan biriga aylangan.

Davlatimiz rahbari tomonidan ilgari surilgan beshta muhim tashabbus gʻoyasidagi toʻrtinchi tashbbus ham aynan shu maqsadga yoʻnaltirilgan. Muhtaram Prezidentimizning yoshlar maʼnaviyatini yuksaltirish, ularning madaniyat va sportga boʻlgan qiziqishlarini yanada oshirish, yoshlar oʻrtasida kitobxonlikni keng targʻib qilish hamda xotin-qizlar bandligini taʼminlashga qaratilgan ushbu beshta muhim tashabbusni aholi, ayniqsa,  yoshlar oʻrtasida keng targʻib qilish maqsadida tumanimizda ham qator ishlar amalga oshirilmoqda.

Tumanimizdagi 19-sonli umumtaʼlim maktabida “Besh tashabbus” targʻibotiga bagʻishlangan tadbir boʻlib oʻtdi. Maktabning 1-“B” sinf oʻquvchilari hamda sinf rahbari Gulsanam Jumatova tashabbuskorligida tashkil qilingan tadbirda oʻquvchilarning ota-onalari ham qiziqish bilan ishtirok etishdi.

Yurtboshimizning “Kitobsiz kelajak yoʻq. Yoshlarni kitobga, kitobxonlikka qaytarish kerak” degan soʻzlari shior qilib olingan kitobxonlik tadbirini jajji bolajonlar kitob haqidagi ajoyib sheʼrlar bilan boshlab berdilar. Alifbe kitobidagi harflarni oʻrganib, endilikda oʻqish va yozish savodxonligini egallay boshlagan jajji bolajonlar tomonidan aytilgan kitobxonlik, mutolaaning ahamiyati haqidagi ajoyib sheʼrlar tadbir ishtirokchilarida kitobga boʻlgan mehrlarining yanada oshishiga sabab boʻlgan boʻlsa ajab emas. Jajji oʻquvchilarning sinf rahbari Gulsanam Jumatova ham beshta muhim tashabbus, yosh avlodning komil insonlar boʻlib voyaga yetishlari uchun yurtimizda yaratilayotgan imkoniyatlar, shart-sharoitlar haqida oʻz fikr-mulohazalarini bildirib oʻtdi.

Shundan keyin sinfning jajji oʻquvchi qizaloqlari tomonidan ajoyib raqs ijro etildi. Mahorat bilan ijro etilgan raqs tadbir ishtirokchilariga koʻtarinki kayfiyat bagʻishladi.

Tadbirda ishtirok etgan ota-onalar farzandlarining bilim oʻrganishga boʻlgan ishtiyoqini, kitobxonlikka boʻlgan munosabatini, mutolaaga qiziqishlarini koʻrib behad mamnun boʻldilar. Oʻz oʻrnida ularni bilim dunyosi sari boshlagan, har biriga astoydil harf oʻrgatgan, mehrini ham, bilimini ham ayamagan qalbi quyosh ustozlarga minnatdorchiliklarini bildirdilar.

 Tadbir yakunida ota-onalar sinf kutubxonasiga bir-biridan qiziqarli boʻlgan turli xil kitoblar sovgʻa qildilar.

Charos Arslonova.