11-MAKTABDA ANIQ FANLAR BOʻYIChA FESTIVAL BOʻLIB OʻTDI

Fan oyliklari iqtidorli oʻquvchilarning qobiliyatlarini maʼlum bir maqsadga yoʻnaltirish, isteʼdodli, izlanuvchan, ijodkor oʻqituvchilarni aniqlash, ularning tajribalarini oʻrganish va umumlashtirilgan holda targʻibot qilish maqsadida oʻtkaziladi.  Shuningdek, ulardagi ijodiy qobiliyatlarni oʻstirish, taʼlim-tarbiya jarayonida qoʻllanilayotgan metodlarni takomillashtirishda ham oylik doirasida oʻtkazilayotgan tadbirlar muhim ahamiyat kasb etadi.

11-sonli umumiy oʻrta taʼlim maktabi tumanimizdagi taʼlim-tarbiya ishlari yaxshi yoʻlga qoʻyilgan namunali maktablardan sanaladi.

Ayni kunda ushbu maktabda 940 nafar oʻquvchilarga 85 nafar malakali pedagoglar taʼlim-tarbiya berishmoqda. Oʻquvchi-yoshlarning dars mashgʻulotlarida olgan bilimlarini mustahkamlash, intellektual salohiyatini yuksaltirish maqsadida 14 ta fan toʻgaraklari va Yurtboshimizning yoshlar maʼnaviyatini yuksaltirish borasida belgilab bergan beshta tashabbusi ijrosini taʼminlash yuzasidan ham toʻgaraklar faoliyati yoʻlga qoʻyilgan.

Mazkur muassasada taʼlim olayotgan oʻquvchilarga motivatsiya berish, ularni ilm olishga, oʻqish-oʻrganishga yana ham ruhlantirish maqsadida turli muhim sanalar, qutlugʻ kunlarni munosib nishonlash yaxshi anʼanaga aylangan. Shuningdek, oʻquv yili davomidagi fan oyliklarida oʻqituvchilar faoliyati samarasini koʻrsatuvchi, oʻquvchilarning fanlarni qay darajada egallayotganini namoyon etuvchi koʻplab tadbirlar oʻtkazilmoqda.

Yakunlangan oyda aniq fanlar oyligi doirasida ham koʻpgina tadbirlar tashkil etilib, erishilayotgan  natijalar maktab oʻqituvchilar jamoasi, oʻquvchilarning ota-onalari ishtirokida muhokama etilib, ijobiy fikrlar bildirildi.

Maktab aniq fanlar uslubbirlashmasining rejasiga asosan oylik doirasida Muyassar Zarekeyeva va Gulchehra Qurbonboyevalarning  ochiq darslari oʻtkazildi. Unda ishtirok etgan oʻqituvchilar fan oʻqituvchilarining darsni qiziqarli va tushunarli tarzda tashkil eta olishiga, oʻquvchilar eʼtiborini torta olishiga ulkan baho berdilar.

Shuningdek, fan oyligi doirasida oʻtkazilgan yakuniy festival ham barcha oʻquvchilarda ulkan tassurotlar qoldirish bilan birga matematikaga oid bilimlari kengayishi va mustahkamlanishiga asos boʻldi.

Tadbirni maktab direktori Zulfiya Yusupova ochdi va hayotimizda aniq fanlarni oʻrganishning  ahamiyati haqida gapirib, oʻquvchilarni maktabda yaratilgan sharoitlardan unumli foydalangan holda chuqur bilim olishga chaqirdi.

Festival oʻquvchilarning matematikaga oid sahna koʻrinishi bilan boshlandi. Shuningdek, sahnada saf tortib turgan bilimdon oʻquvchilar namoyish etilgan turli geometrik shakllarga taʼrif berdilar.

8-sinf oʻquvchilari ijro etgan “Amudaryom” qoʻshigʻi tadbir shukuhini yana ham oshirdi.

Bayramona tarzda oʻtkazilgan aniq fanlar festivalida Munira Bahromova, Ixlos Omonkeldiyev, Abdulaziz Qurbonboyevlar, ayniqsa, faol qatnashib, oʻz iqtidorlarini namoyish etdilar.

Tadbir barchada ulkan taassurotlar qoldirdi.

O.RAJABOVA.