5-mart kuni “Yosh qutqaruvchilar” koʻrik-tanlovi oʻtkazildi

Mamlakatimizda yoshlarning barkamol avlod boʻlib voyaga yetishlari uchun ularni sportga keng jalb qilish, sport bilan shugʻullanishlariga shart-sharoit yaratish, yoshlar oʻrtasida sogʻlom turmush tarzini shakllantirish kabilarga alohida eʼtibor qaratilmoqda. Pespublikamiz boʻylab har yili maktablar, kasb-hunar kollejlari, akademik litseylar oʻquvchilari oʻrtasida oʻtkaziladigan “Yosh qutqaruvchilar” musobaqasi ham yoshlar qalbida insonparvarlik, vatanparvarlik, oʻzgalar taqdiriga daxldorlik tuygʻulari, masʼuliyat hissi mustahkamlanishida muhim oʻrin tutmoqda.

Tumanimizda ham ushbu musobaqaning hududiy hamda tuman bosqichlari oʻtkazilib kelinmoqda. Joriy yilning 5-mart sanasida tumanimizdagi XTBga qarashli 82-sonli umumtaʼlim maktabida “Yosh qutqaruvchilar” musobaqasining tuman bosqichi boʻlib oʻtdi. Qoraqalpogʻiston Pespublikasi Xalq taʼlimi vazirligining 2020-yil 25-fevraldagi buyrugʻiga asosan tuman Favqulodda vaziyatlar boʻlimi tomonidan oʻtkazilgan mazkur musobaqada 28-,6-,84-,11-sonli maktablar jamoalari oʻzaro bellashdilar.
Koʻrik-tanlov 5 ta shart boʻyicha oʻtkazildi. Jamoalar savol-javob, birinchi tibbiy yordam koʻrsatish, qutqaruv arqonidan oʻtish amaliy sporti, vaqtinchalik palatka qurish, yongʻin oʻchirish estafetasi kabi shartlar boʻyicha bilim va kuch sinashdilar.
Har bir shart boʻyicha jamoalarni baholab borish uchun Qoraqalpogʻiston Pespublikasi Favqulodda vaziyatlar boshqarmasi boʻlim boshligʻi Ulugʻbek Masharipov, Oʻzbekiston Yoshlar ittifoqi tuman Kengashi raisi Mahmud Shermetov, tuman Favqulodda vaziyatlar boʻlimi boshligʻi Hamro Matyoqubovlar hakamlik qildilar.

Shu oʻrinda taʼkidlash kerakki, ushbu musobaqani oʻtkazishdan asosan – umumtaʼlim muassasalari oʻquvchilarini yongʻin oʻchiruvchi kasbiga qiziqtirish, favqulodda sodir boʻladigan hodisalarda birinchi yordam koʻrsatish, oʻzini va oʻzgalarni qutqarish choralarini oʻrgatish, bu boʻyicha koʻnikmalar hosil qilish kabi maqsadlar koʻzlanadi. Ushbu yoʻnalishda targʻibot-tashviqot ishlarini bajarish, oʻquvchilarning yongʻin xavfsizligi boʻyicha amaliy koʻnikmalari hamda jismoniy tayyorgarligini oshirish, yongʻin xavfsizligi xizmatiga munosib, jismonan sogʻlom va jasur oʻsmirlarni tayyorlash, favqulodda hodisalar chogʻida toʻgʻri harakat qila bilish koʻnikmalari va mahoratini mustahkamlash, yoshlar oʻrtasida yongʻin oʻchirish amaliy sportini yanada rivojlantirishdan iborat.

Musobaqa yuqori saviyada, bahs-munozaraga boy tarzda oʻtdi. Jamoalar gʻoliblikni qoʻlga kiritish uchun astoydil harakat qildilar. Musobaqaning yakuniy natijalariga koʻra faxrli 1-oʻrinni 84-sonli maktab jamoasi, 2-oʻrinni 28-sonli maktab jamoasi, 3-oʻrinni esa 6-sonli maktab jamoasi qoʻlga kiritdi.

Koʻrik-tanlov yakunida tadbir tashkilotchilari nutq soʻzlab, tumanimiz oʻquvchi-yoshlari xususida iliq fikrlar bildirdilar. Shuningdek, bugungi kunda yurtimizda yoshlar siyosatida amalga oshirilayotgan ustuvor vazifalar, ularning huquqlari, erkinliklari va qonuniy manfaatlari himoyasi, jamiyat hayotidagi roli va faolligi, sogʻlom va barkamol yosh avlodni tarbiyalash, oilada maʼnaviy-axloqiy muhitni yaxshilashga qaratilayotgan eʼtibor xususida toʻxtaldilar. Shu barobarida yoshlarni shijoat va gʻayrat bilan bilim marralarini egallab, porloq kelajak sari olgʻa intilishga chorladilar.

Tadbirda barcha ishtirokchilar diplom va esdalik sovgʻalari bilan taqdirlandilar.

Charos Arslonova, tuman hokimligining Axborot xizmati rahbari.