OʻGʻIRLIKNING OXIRI XORLIK BOʻLDI

 Shu yilning 11  iyunida Beshtom mahallasida tuman Ichki ishlar  hamda  Mahalla va oilani qoʻllab-quvvatlash boʻlimlari hamkorligida  jinoyatchilik va huquqbuzarliklarning oldini olish, bunda fuqarolarni  ham hushyorlik  va ogohlikka chaqirish maslalalariga bagʻishlangan yigʻilish boʻlib oʻtdi. Yigʻilishda tuman Ichki ishlar boʻlimi boshligʻi Ulugʻbek Xudoyberganov, tuman hokimi oʻrinbosari, Mahalla va oilani qoʻllab-quvvatlash boʻlimi boshligʻi Alisher Yoʻldoshev, Beshtom mahalla fuqarolar yigʻini raisi Ozod Siytimovlar ishtirok etdilar. Masʼullar yigʻilishda dastlab jamiyatimizda amal qilinayotgan qonuniy-meʼyoriy hujjatlarga  boʻysunish, sogʻlom hayot kechirish har bir fuqaroning burchi ekanligi, aks holda qonuniy jazoga tortilishi muqarrarligi haqida yigʻilish ishtirokchilariga keng tushunchalar berdilar.
  Yigʻilishda ishtirok etgan mahalla fuqarolar yigʻini masʼullari, faollari va aholi vakillari ham kun tartibidagi masala yuzasidan oʻzlarining fikr-mulohazalarini bayon etdilar. Shuningdek, mahalla hududida ikki kunda ikkita oʻgʻirlik jinoyatini sodir etgan, hatto voyaga yetmagan oʻgʻlini ham oʻzining tuban ishiga yaʼni navbatdagi oʻgʻirlik jinoyatiga sherik qilgan va jinoyati issiq izida fosh etilib, el ichida oʻgʻri degan nom olgan fuqaroning ishlariga ham munosabatini bildirdilar.
Gap shundaki, ushbu jinoyatni sodir etgan aybdor Qipchoq ovulida istiqomat qiluvchi fuqarolardan birining Beshtom mahallasi hududida,  uyidan ancha yiroqda,  fermer xoʻjaligi dalasida bogʻlab qoʻyilgan, bozor bahosi ikki yarim mln. soʻmcha keladigan hoʻkizini koʻrib, unga ega chiqishni istab qoladi. Shu niyatni amalga oshirish niyatida  yarim kechada, hamma orom olayotganda hoʻkizni oʻgʻirlab ketadi va oʻz uyiga olib borib bogʻlab qoʻyadi. Shu tariqa osongina pul topish mumkinligidan quvonib, oradan ikki kun oʻtgach, ushbu mahallada istiqomat qiluvchi yana bir fuqaroning uyi oldidagi bostirmasiga bogʻlab qoʻyilgan sogʻin sigirini  hali voyaga yetmagan, maktab oʻquvchisi boʻlgan oʻgʻli bilan birga oʻgʻirlab, uni ham  jinoyatiga  sherik qiladi. Hayot insonga ezgu amallar, xayrli ishlar qilishi uchun ato etilgan imkoniyat ekanligini,   qilgan har bir yaxshi ishi  bilan hayotini  bezashi lozimligini qalbiga singdirishi, orqasida elaro yaxshi nom qozonib yashashi lozimligini oʻrgatish oʻrniga, u oʻz zurriyodini ham nopok yoʻlga boshladi.
Oʻgʻriga mol koʻp. Lekin hech biri soʻrovsiz emas. Buni mazkur fuqaro ham xonadoniga tuman Ichki ishlar boʻlimining jinoyat qidiruv boʻlinmasi xodimlari kelib, ogʻilida  turgan ikki molni egalarining qoʻliga tutqazib, oʻzining qoʻliga kishan solib, olib ketishganida anglaganday boʻldi. Uning qilmishlari aynan u jinoyatlarni sodir etgan mahallada muhokama etilgani bejiz emas. Xalqimizda oʻzingga ehtiyot boʻl, qoʻshningni oʻgʻri tutma, degan ibora bor.
  Ha, chindan-da, halol mehnatlari evaziga bunyodga kelgan mol-u davlatini har kim oʻzi koʻz qorachigʻiday asrashi, masʼuliyat bilan qarashi, nopok  insonlardan ehtiyot qilishi ham zarur. Aks holda yuqorida bayon qilganimizday, oʻgʻriga oʻlja boʻlishi ham mumkin.
  Yigʻilishda bu haqda batafsil soʻz yuritildi, mahalla hududida jinoyatchilik va huquqbuzarliklarning oldini olish borasida olib borilayotgan ishlarni  yanada yaxshilash, yozgi taʼtil kunlarida oʻquvchilarni ham nazoratsiz qoldirmaslik, tarbiyani aynan bolaning yoshligidan boshlash lozimligi haqida aholi fikr-mulohazalari ham tinglandi.
Yigʻilishda ikki kunda ikki oʻgʻirlik jinoyatini sodir etib, birovlarning halol moliga ega chiqmoqchi boʻlgan, ammo jinoyati fosh boʻlib, elaro yuzi shuvut boʻlgan  fuqaro ham qoʻllariga kishan solingan holda jabrlanganlardan uzr soʻradi, qilgan qilmishlaridan pushaymonligini bildirdi. Endi uning aybiga yarasha jazosini odil sud beradi. Bundan toʻgʻri, tegishli xulosa chiqarish,  takror sodir boʻlishining oldini olish esa hammaga daxldor vazifa.
Shuni unutmaylikki, bu dunyoda halol yashash, farzandlarini halol rizq bilan boqish har bir ota-onaning burchi. Oʻgʻirlikning oxiri esa xorlikdir. Bu yillar davomida oʻz isbotini topib kelayotgan haqiqatdir.

Orifjon Qosimov, Ichki ishlar boʻlimi HPB boshligʻi.