Xalq deputatlari Amudaryo tuman kengashining 18-sessiyasi toʻgʻrisida axborot

Joriy yilning 23-oktyabr kuni Xalq deputatlari Amudaryo tuman kengashining navbatdagi 18-sessiyasi boʻlib oʻtdi. Sessiya majlisida Oʻzbekiston Respublikasi Oliy Majlis Senatining Agrar, suv xoʻjaligi masalalari va ekologiya qoʻmitasi raisi Baxodir Tajiyev, Oʻzbekiston Respublikasi Oliy Majlis Senati aʼzosi Ulugʻbek Jalmenov, Oliy Majlis Qonunchilik palatasi deputati Zafar Abdirimov hamda Qoraqalpogʻiston Respublikasi Joʻqorgʻi Kengesi qoʻmita raisi Zuhra Reyimovalar, shuningdek, tumandagi sektor rahbarlari, tuman hokimi oʻrinbosarlari, hokimlik masʼul xodimlari, huquq-tartibot organlari, boʻlimlar, tijorat banklari rahbarlari, fuqarolarning oʻzini oʻzi boshqarish organlari raislari hamda ommaviy axborot vositalari vakillari ishtirok etdilar. Sessiya ishiga tuman hokimi Sultonboy Yoʻldashev raislik qildi.

Oʻzbekiston Respublikasi Prezidenti raisligida joriy yilning 16-oktyabr kuni oʻtkazilgan videoselektr yigʻilishida belgilab berilgan  oziq-ovqat xavfsizligini taʼminlash va ichki bozorda narx-navo barqarorligini saqlash chora-tadbirlari yuzasidan muhim vazifalar ijrosini taʼminlash maqsadida tuman hokimining “Amudaryo  tumanida oziq-ovqat xavfsizligini taʼminlash jamgʻarmasini tashkil etish toʻgʻrisida”gi qarori qabul qilingan edi. Sessiyada tumanda oziq-ovqat xavfsizligini taʼminlash va ichki bozordagi narx-navo barqarorligini saqlash chora-tadbirlari toʻgʻrisidagi masala muhokama qilindi.

Sessiya majlisida Oʻzbekiston Respublikasi Oliy Majlisi Senatining Agrar, suv xoʻjaligi masalalari va ekologiya qoʻmitasi raisi Baxodir Tajiyev soʻzga chiqib, yurtimizda pandemiya sharoitida oziq-ovqat xavfsizligini taʼminlash borasida amalga oshirilayotgan ishlar boʻyicha toʻxtaldi.

Taʼkidlanganidek, oziq-ovqat mahsulotlarining arzon va yetarliligi xalq roziligining asosiy omillaridan biri sanaladi. Shu maqsadda soʻnggi yillarda mamlakatimizda oziq-ovqat, chorvachilik, meva-sabzavotchilik va qishloq xoʻjaligining boshqa tarmoqlarini rivojlantirish borasida keng qamrovli chora-tadbirlar amalga oshirildi. Shuningdek, koronavirus pandemiyasining narx-navoga taʼsiri inobatga olinib, joriy yil aprel oyidan boshlab asosiy turdagi oziq-ovqat mahsulotlari importi bojxona toʻlovlaridan ozod qilindi. Shunga qaramay, oxirgi vaqtlarda goʻsht, tuxum, oʻsimlik yogʻi va shakar  mahsulotlarining narxi keskin oshdi. Joylarda tashkil qilingan oziq-ovqat xavfsizligini taʼminlash jamgʻarmalari orqali, qolaversa, mahalliy Kengashlar tomonidan tasdiqlanadigan chora-tadbirlar orqali aholini shu va boshqa turdagi oziq-ovqat mahsulotlari bilan uzluksiz taʼminlash, narx-navo barqarorligini saqlash koʻzda tutilgan.

Sessiya kun tartibidagi masalalar yuzasidan sektor rahbarlarining hisobotlari tinglandi. Hisobotlarda taʼkidlanganidek, tuman aholisini asosiy turdagi oziq-ovqat mahsulotlari bilan kafolatli taʼminlash, ichki isteʼmol bozoriga mahsulot yetkazib berilishini tizimli monitoring qilish hamda nazoratni yoʻlga qoʻyish va narx-navoning asossiz oʻsib ketishiga yoʻl qoʻymaslik maqsadida qator ishlar amalga oshirilmoqda.  Tuman aholisini 11 ta asosiy turdagi oziq-ovqat mahsulotlari bilan taʼminlash uchun joriy yilning noyabr oyidan 2021-yil may oyiga qadar zarur boʻlgan mahsulotlar hajmi aniq hisob-kitob qilib olindi. Shunga asosan, 2 800 tonna goʻsht, 1 400 tonna parranda goʻshti, 715 tonna baliq, 5 290 tonna kartoshka, 973 tonna guruch, 21 mln. dona tuxum, 660 tonna piyoz, 1 900 tonna sabzi, 7 800 tonna un, 1 050 tonna shakar, 898 tonna yogʻ mahsulotlariga ehtiyoj mavjudligi aniqlandi. Ushbu mahsulotlarni kafolatli taʼminlash va narx-navoni barqaror saqlash boʻyicha aniq rejalar belgilab olindi.

Jumladan, yetishmaydigan mahsulotlarni boshqa hududlardan olib kelish uchun tadbirkorlik subʼektlarining aylanma mablagʻlarini shakllantirishga jami 3,0 mlrd.soʻm miqdorida tijorat bank kreditlari ajratilishi belgilab olindi. Bundan tashqari, tuman hokimligi huzurida Oziq-ovqat xavfsizligini taʼminlash jamgʻarmasi tashkil qilinib, mablagʻlar jalb qilish choralari koʻrilmoqda. Ushbu jamgʻarma mablagʻlari maqsadli ishlatilishi yuzasidan doimiy nazorat oʻrnatiladi.

Sessiya kun tartibiga kiritilgan masala atroflicha muhokama qilinib, muhokamalardan keyin tegishli qaror qabul qilindi.

Sessiya majlisida ishtirok etish maqsadida tumanimizga kelgan mehmonlar “Yermonov Oʻrazboy” fermer xoʻjaligi dalalaridagi paxta yigʻim-terimi ishlarining borishi, terimchilarga yaratilgan sharoitlar bilan yaqindan tanishdilar. Ushbu fermer xoʻjaligi tumanimizdagi eng ilgʻor xoʻjaliklaridan biri boʻlib, kontraktatsiya shartnomasi shartlarini muddatidan oldin ortigʻi bilan bajardi.

Tashrif chogʻida mutasaddilar paxtakorlar bilan suhbat qurib, hol-ahvol soʻradilar. Shuningdek, ilgʻor terimchilarni ragʻbatlantirish maqsadida sovgʻalar topshirdilar.

Tuman hokimligining Axborot xizmati.