BOShLANGʻICh SINF OʻQITUVChILARI OʻZARO TAJRIBA ALMAShDILAR

Sentyabr – Boshlangʻich taʼlim fan oyligi doirasida 1-sonli umumtaʼlim maktabida biri-biridan qiziqarli tadbirlar oʻtkazildi. Xususan, “Matematika – barcha fanlar kaliti”, “Kimning xati chiroyli”, “Yosh rassomlar”, “Yosh matematiklar”, “Mohir qoʻllar koʻrik-tanlovlari tashkil etilib, ushbu koʻrik-tanlovlarda barcha boshlangʻich sinflar oʻquvchilarining ishtiroki taʼminlandi.

2-oktyabr kuni oylik doirasidagi barcha tadbirlar umumlashtirilib, Oʻqituvchi va murabbiylar kuni  bayrami munosabati bilan “Biz Yangi Oʻzbekiston kelajagimiz!” mavzusida yakuniy  tadbir oʻtkazildi.

Fan oyligi doirasida “Kimning xati chiroyli” koʻrik-tanlovida 2-,3-,4-sinflar oʻquvchilari oʻrtasida diktantlar yozish boʻyicha musobaqalar oʻtkazildi. “Yosh matematiklar”, “Metamatika – barcha fanlar kaliti”, “Mohir qoʻllar”, “Yosh rassomlar” koʻrik-tanlovlari ishtirokchilari turli xil matematik amallarni bexato bajarish, boshqotirmalar yechish, tabiat manzaralarini chizish, oddiy ipak va qogʻozlardan, gazlama qirqimlaridan chiroyli buyumlar yasash boʻyicha bahslashdilar. Mazkur koʻrik-tanlovlar yakunida gʻoliblar aniqlanib, maktab maʼmuriyati tomonidan faxriy yorliqlar bilan taqdirlandilar.

Shuningdek, fan oyligi doirasida boshlangʻich sinflar oʻqituvchilari, namunali ochiq darslar tashkil etishdi. Oʻqituvchilar oʻrtasida “Eng yaxshi dars ishlanmasi”, “Eng yaxshi koʻrgazmali qurollar” koʻrik-tanlovlari ham oʻtkazilib, boshlangʻich sinf oʻqituvchilarining dars oʻtish mahorati, oʻz sinfida devoriy gazetalarni bezatish boʻyicha didi va uslubi sinovdan oʻtkazildi. Har bir sinf oʻqituvchisi tomonidan tashkil etilgan ochiq darsni maktabning boshlangʻich taʼlim uslubbirlashma aʼzolari va malakali oʻqituvchilar, ota-onalar qoʻmitasi aʼzolari kuzatib bordilar.

Tadbirda fan oyligi doirasida faol ishtirok etgan oʻquvchilar, shuningdek, oʻtkazilgan koʻrik-tanlovlar gʻoliblarining nomlari alohida eʼtirof etilib, maktab maʼmuriyati tomonidan ragʻbatlantirildi. Boshlangʻich sinf oʻqituvchilari oʻrtasida oʻtkazilgan “Eng yaxshi” koʻrgazmali qurollar” va “Eng yaxshi dars ishlanmasi” koʻrik-tanlovlari gʻoliblarining nomlari alohida eʼtirof etildi va munosib taqdirlandi.

Shuningdek, tadbirda “Eng yaxshi devoriy gazeta”ni tayyorlashda faol ishtirok etgan yosh ijodkor-oʻquvchilar ham aniqlandi. Yosh ijodkor-oʻquvchilar ham faxriy yorliqlar bilan taqdirlandilar.

Boshlangʻich taʼlim fan oyligi doirasida maktabda oʻtkazilgan barcha tadbirlar oʻquvchilar va oʻqituvchilarning oylik doirasida erishgan yutuq va kamchiliklari yuzasidan hisobot hamda taʼlim sohasida amalga oshirilayotgan islohotlar samarasi sifatida qayd etildi.

Shu bilan birga boshlangʻich taʼlim fanlari oʻqituvchilari erishilgan yutuqlari boʻyicha bir-birlari bilan tajriba almashib, kamchiliklarini muhokama etdilar.

Robiya YOʻLDOShEVA.