76-sonli maktabda fizika fani boʻyicha respublika ilmiy-amaliy oʻquv metodik seminari boʻlib oʻtdi

Fan – texnikaning rivojlanishi va axborot texnologiyalari sohasidagi erishilayotgan yutuqlarni umumiy oʻrta taʼlim maktablari darsliklari, ayniqsa, fizika fanida oʻrganishga eʼtibor qaratish davr taqozosidir.

Shulardan biri – virtual laboratoriyadir. Virtual laboratoriya – bu grafik, matn, raqamli, musiqali video va boshqa axborotlarning yigʻindisi boʻlib, undan kompyuter tarmoqlari orqali foydalanish mumkin.

Virtual laboratoriya ilmiy-malakaviy bilimlar maydonida tizimlashtirilgan materiallarda tashkil topgan boʻlib, bu maydonda oʻquvchi, studentlarning bilimlarini faol oʻstirib borish imkoniyati mavjud. Shu boisdan ham Oʻzbekiston Respublikasi Prezidentining 2021-yil 19-martdagi “Fizika sohasidagi taʼlim sifatini oshirish va ilmiy tadqiqotlarni rivojlantirish chora-tadbirlari toʻgʻrisida”gi qaroriga muvofiq Oʻzbekiston Respublikasi Xalq taʼlimi vazirligining takliflari asosida virtual laboratoriyalarni tajriba-sinov tariqasida umumiy oʻrta taʼlim maktablarida fizika fanidan oʻquv jarayoniga tatbiq etish nazarda tutilmoqda.

24-noyabr kuni Amudaryo tumanidagi 76-sonli maktab faollar zalida “Fizika fanidan bilim sifatini orttirishda virtual laboratoriyalarni oʻquv jarayoniga tatbiq etishning ahamiyati” mavzusida respublika ilmiy-amaliy oʻquv metodik seminari boʻlib oʻtdi.

Oʻquv metodik seminarda Qoraqalpogʻiston Respublikasi Xalq taʼlimi vazirligi tasarrufidagi Respublika taʼlim markazi direktori oʻrinbosari Oybek Davletov, taʼlim markazi fizika fani uslubchisi Oʻringul Joʻldasova, Nukus davlat Pedagogika instituti oʻqituvchisi Kengesbay Turdanov, tuman Xalq taʼlimi boʻlimi masʼullari, tumanimiz maktablarining fizika fani oʻqituvchilari, shuningdek, respublika tumanlari Xalq taʼlimi boʻlimlari fizika fani uslubchilari, maktablarining fizika fani oʻqituvchilari ishtirok etdilar.

Oʻquv seminarni tuman Xalq taʼlimi boʻlimi mudiri Akmal Ismoilov ochdi va oʻtkazilayotgan tadbirdan koʻzlanayotgan maqsad-vazifalar haqida gapirdi.

Tadbirda ishtirok etgan masʼullar fizika fanidan oʻquv jarayoniga tatbiq etilishi rejalashtirilayotgan virtual laboratoriya, uning ahamiyati xususida maʼruza qildilar.

Shuningdek, tuman Xalq taʼlimi boʻlimi tizimidagi 40-sonli maktabning fizika fani oʻqituvchisi Sarvar Yaxshimov, 18-sonli maktabning fizika fani oʻqituvchisi Nilufar Otaboyeva, Nukus shahar Xalq taʼlimi boʻlimiga qarashli 22-sonli ixtisoslashtirilgan maktab fizika fani oʻqituvchisi Gulzira Saparovalar virtual laboratoriyadan foydalangan holda ochiq dars oʻtdilar.

Respublika tumanlaridan kelgan fizika fani oʻqituvchilari “Zakovat” intellektual oʻyinida ishtirok etib, oʻz mutaxassisliklari boʻyicha bilimlarini sinovdan oʻtkazishdi.

Oʻquv seminar ishtirokchilari taʼlimdagi yangiliklardan xabardor boʻlib, oʻzaro tajriba almashdilar, bir-biridan oʻrganib, bir-biridan oʻrgandilar.

Tadbirda faol qatnashgan oʻqituvchilarga Qoraqalpogʻiston Respublikasi Xalq taʼlimi vazirligining faxriy yorliqlari topshirildi.

Otabek OLLAYoROV, tuman Xalq taʼlimi boʻlimi uslubchisi.