30-sonli maktabda “Konstitutsiya – nasha gordost” deb nomlangan maʼnaviy-maʼrifiy va adabiy kecha oʻtkazildi

Butun yurtimiz boʻylab 8-dekabrda Mamlakatimiz Asosiy qonuni -Konstitutsiyamiz qabul qilingan kun ulkan bayram qilindi. Sana munosabati bilan joylarda oʻtkazilgan tantanali tadbirlarda Konstitutsiyamiz mamlakatimiz taraqqiyoti va jamiyat farovonligining huquqiy kafolati ekanligi taʼkidlandi, demokratik huquqiy davlat va kuchli fuqarolik jamiyatini barpo etish, erkin bozor munosabatlari hamda xususiy mulk ustuvorligiga asoslangan iqtisodiyotni qurish, xalqimizning tinch, obod va farovon hayotini taʼminlash yoʻlida mustahkam huquqiy poydevor boʻlib xizmat qilayotganligi keng targʻib etildi.

Shuningdek, umumiy  oʻrta taʼlim maktablarida oʻtkazilgan Konstitutsiyamizga bagʻishlangan turli tadbirlarda, savol-javob kechalari va tanlovlarda oʻquvchilar ongiga baxtimiz qomusi boʻlgan ushbu  hujjatning mazmun-mohiyati chuqur singdirildi, ularning huquqiy savodxonligi oshirildi, bu borada oʻquvchilar erishayotgan yutuqlar tilga olindi.

Shu yilning 7-dekabrida tumanimizdagi taʼlim oʻzbek va rus tilllarida olib boriladigan 30-sonli umumiy oʻrta taʼlim maktabida ham Konstitutsiyamiz qabul qilinganligining 29 yilligi munosabati bilan 8- va 9-sinflari, shuningdek, 2- “A” sinfi oʻquvchilari ishtirokida “Konstitutsiya – nasha gordost” deb nomlangan maʼnaviy-maʼrifiy va adabiy kecha oʻtkazildi.

Tadbirda dastlab bola  huquqlari sohasidagi qonunchilikning asosini  tashkil etuvchi Konstitutsiyamiz haqida, unga koʻra bola tugʻilishi bilanoq  inson sifatida huquq va erkinliklari vujudga kelishi, ular davlat tomoni dan kafolatlanishi, bepul taʼlim olishi, malakali  tibbiy xizmatdan foydalanishi mumkinligi haqida,  umuman, yurtimizning har bir oʻgʻil-qizi  millati, dini dan qatʼiy nazar, baxtiyor va emin-erkin ulgʻayishiga xizmat qilishi haqida maʼruza tinglandi.

Shundan soʻng, mamlakatimizda qonun ustuvorlgini ifoda etuvchi sahna koʻrinishi namoyishi etildi. 2-“A” sinf oʻquvchilari Asosiy Qonunimizni, baxtiyor hayotimizni, tinchlik – osoyishtaligimizni madh etuvchi sheʼrlar, jozibali raqslar ijro etdilar.

Tadbirga tashrif buyurgan maktab faxriy oʻqituvchisi Xidirboy Yangiboyev badiiy chiqishlari bilan tadbirga oʻzgacha ruh bagʻishlagan oʻquvchilarga minnatdorlik bildirdi va barchani mamlakatimiz Asosiy Qonuni qabul qilingan kunning 29 yilligi bilan qizgʻin qutladi. Shuningdek, yoshlarga taʼlim-tarbiya berishda fidoyilik bilan mehnat qilayotgan Gulzamon Nurullayeva, Nargiza Mamutova, Dilshod Bulatovlar ham bugungiday obod va farovon turmushimiz huquqiy asosi boʻlgan Konstitutsiyamiz qabul qilingan kun bilan yigʻilganlarni qizgʻin qutladilar va tadbir tashkilotchilari – maktabning tarix fani oʻqituvchisi Mavluda Xudoyberganova, boshlangʻich sinf oʻqituvchisi Sharofat Qodirovalarga minnatdorchilik bildirdilar.

Tadbir barcha ishtirokchilarda ulkan taassurotlar qoldirdi.

Oygul RAJABOVA.