Isteʼdodli yoshlar Oʻzbekistonning yorqin kelajagi

Bugungi yoshlar mustaqil Oʻzbekistonimizning tayanchi va kelajagi hisoblanadi. Har tomonlama kuchli, sogʻlom hamda maʼnaviy jihatdan yetuk yosh avlod Vatanimizning iftixori va faxridir.

Yoshlarning jamiyatda munosib oʻrin egallashga boʻlgan ishtiyoqi va erishayotgan yutuqlari kishini quvontiradi.  Ular oʻzlarining kreativ gʻoyalari, oʻziga xos loyihalari va aniq maqsadlari bilan tashabbus koʻrsatib, yurtimiz ravnaqiga munosib hissa qoʻshib kelmoqda.

Tumanimizning Olmazor mahallasida istiqomat qiluvchi Sevara Ismoilova ham mana shunday intiluvchan yoshlardan biri.  Maktab oʻquvchisi vaqtidayoq ijod namunalari oʻquvchilarga manzur boʻlgan edi.

U hozirda Qoraqalpoq Davlat Universiteti qoraqalpoq filologiyasi va jurnalistika fakulteti bitiruvchi kurs talabasi. Sevara shu kunga qadar 20 dan ziyod xalqaro hamda Respublika tanlovlarida muvaffaqiyatli qatnashib, gʻolib, sovrindor boʻldi. Xususan, Ajiniyoz nomidagi Nukus davlat pedagogika instituti, "Seience box" MChJ hamda Oʻzbekiston innovatsion taʼlimni rivojlantirish Asossatsiyasi tashabbusi bilan oʻtkazilgan "Uchinchi renessans yoshlari Nukusda" mavzusidagi ilmiy-amaliy 1-respublika koʻp tarmoqli onlayn konferentsiyasida "Jurnalistika sovremennoy informatsionnoy epoxi" mavzusidagi maqolasi uchun, Oʻzbekiston Respublikasi oliy va oʻrta maxsus taʼlim vazirligi huzuridagi oliy taʼlimni rivojlantirish tadqiqotlari va ilgʻor texnologiyalarni tatbiq etish markazi tomonidan oʻtkazilgan "Oliy taʼlim islohotlari: yutuqlar, muammolar, yechimlar" mavzusidagi respublika tanlovida qatnashgani uchun maxsus sertifikatlar bilan taqdirlandi.

Joriy yilda "Besh tashabbus olimpiadasi" doirasida oʻtkazilgan tanlovning adabiyot yoʻnalishida tumanda gʻolib boʻlib, Qoraqalpogʻiston bosqichida faol qatnashdi. Shuningdek, Amudaryo televideniyesida  yoshlarni maʼnaviy-axloqiy qadriyatlar ruhida tarbiyalashga qaratilgan mualliflik koʻrsatuvlarini tayyorlab, tomoshabinlar eʼtiborini qozonmoqda. Uning sheʼr, hikoyalari "Taraqqiyot koʻzgusi" , "Gʻunchadan gullar ochilar" toʻplamlarida, Qoraqalpogʻistondagi boshqa nashrlarda yoritilgan.

Shu yilning 24-25-sentyabr kunlari S.Ismoilova “Best Publication” Xalqaro ilmiy tadqiqotlar va yoshlarni qoʻllab-quvvatlash markazi tomonidan tashkil etilgan “Tashabbuskor islohotchi” xalqaro tanlovida muvaffaqiyatli qatnashib, ilmiy ishi maʼqullandi va “Tashabbuskor islohotchi” koʻkrak nishoni, sertifikat, diplom, tashakkurnoma va qimmatbaho sovgʻalar bilan taqdirlandi. Bugungi kunda yurtimizda yoshlarga yaratib berilayotgan imkoniyatlar koʻlami nihoyatda keng.

Yoshlardan faqatgina ushbu imkoniyatlardan samarali foydalanish talab etiladi xolos. Ular istiqlolning eng baxtli farzandlari. Demak, oldinda ularni bundan-da, ulkan gʻalabalar kutyapti.

Fotima Eshimbetova.