“Mehr daftari”ga kiritilgan 3 nafar amudaryolik yoshlarga Nukus shahridan yangi xonadonlar sovgʻa qilindi

Yurtimizda kelajak egalari boʻlgan yosh avlodning komil insonlar boʻlib voyaga yetishlariga alohida eʼtibor qaratilib, keng imkoniyatlar yaratilmoqda. Shu oʻrinda voyaga yetmaganlar davlatimiz himoyasiga olinganini, bu Konstitutsiya va Qonunlar bilan mustahkamlab qoʻyilganini eʼtirof etish joiz. Voyaga yetmaganlar uchun ularning ota-onalari, vasiy yoki homiylari gʻamxoʻrlik qiladilar. Bevosita, Konstitutsiyamizning 45-moddasida ham voyaga yetmaganlar, mehnatga layoqatsizlar va yolgʻiz keksalarning huquqlari qonun himoyasidaligi keltirib oʻtilgan. Voyaga yetmaganlarning huquqlari bilan bogʻliq munosabatlar bugungi kunda davlatimizdagi dolzarb masalalardan biriga aylangan.

Amudaryo tumani hokimligining Bolalarni himoya qilish shoʻʼbasi tomonidan ham yetim bolalar va ota-ona qaramogʻidan mahrum boʻlgan bolalarning muammolari oʻrganib chiqilib, ularni hal qilish borasida qator ishlar amalga oshirilib kelinmoqda.

Prezidentimizning 2021-yilgi 9-avgustdagi tegishli Qaroriga koʻra “Mehr daftari”ga kiritilgan, 18 yoshga toʻlgan yetim va ota-ona qaramogʻidan mahrum boʻlgan 3 nafar yoshlarning har biriga xonadonlar xarid qilingani ham bu boradagi amaliy ishlarga yorqin misoldir.

2-dekabr kuni tuman hokimligida oʻtkazilgan yigʻilishda mazkur xonadonlarning kalitlari va hujjatlari oʻz egalariga tantanali ravishda topshirildi. Har birining qiymati 130 mln. soʻm boʻlgan ushbu xonadonlar Nukus shahrida joylashgan. Shaxsiy yoki meros qoldirilgan uy-joyi boʻlmagan, shuningdek, joriy yilda uy-joyga muhtoj fuqaro sifatida roʻyxatga olingan yoshlarga xonadonlar kaliti va hujjatlari tuman hokimi Sultonboy Yoʻldashev tomonidan tantanali ravishda topshirildi.

“Nuroniylar” jamoatchilik Kengashi raisi oʻrinbosari Bekman Allaberganov, hokimlikning Bolalarni himoya qilish shoʻʼbasi rahbari Jahongir Xolmurodov va boshqalar yoshni yangi xonadon bilan tabriklab, ularning kelgusi ishlarida omadlar yor boʻlishini tilashdi.

Taʼkidlanganidek, tuman hokimligining Bolalarni himoya qilish shoʻʼbasi tomonidan shakllantirilgan “Mehr daftari” roʻyxatida turgan bolalarning muammolarini oʻrganish maqsadida ular yashayotgan xonadonlarga muntazam ravishda borilib, holidan xabar olinib turiladi. Oʻtgan davr mobaynida “Mehr daftari” jamgʻarmasi hisobidan roʻyxatda turgan 9 nafar bolaning har biriga 650 ming, jami 5 million 850 ming soʻmlik maktab formalari va oʻquv qurollari berildi. Shuningdek, jamgʻarma mablagʻlari hisobidan 1 nafar bola zamonaviy noutbuk va 1 nafar qiz tikuv mashinasi bilan taʼminlandi.

Ota-onasi yoʻqligi uchun vasiy qaramogʻiga olingan, ayni paytda 18 yoshga toʻlgan, uy-joyga muhtoj Azizbek Jumaboyev, Ozoda Bobojonova va Farida Inoyatovalarning har biriga alohida sovgʻa qilingan xonadonlar zarur mebellar bilan ham jihozlangan. Shuningdek, yangi xonadon egalariga tumanimizdagi saxovatpesha tadbirkorlar tomonidan begʻaraz homiylik yordami asosida televizor, uy-roʻzgʻor buyumlari va boshqa maishiy buyumlar ham sovgʻa qilindi.

Tuman hokimi Sultonboy Yoʻldoshev sahovatpesha tadbirkorlarga alohida minnatdorchilik bildirdi.

Oʻzlarining alohida uylariga ega boʻlgan yoshlar ota-onasidek gʻamxoʻrlik koʻrsatgan davlatimizdan, qolaversa, tuman hokimi, Bolalarni himoya qilish shoʻʼbasi masʼullaridan juda mamnun ekanliklarini aytib, minnatdorchilik izhor etdilar.

O.Xudoyberganova.