Xotin-qizlar faollariga planshetlar topshirildi

Maʼlumki, Prezidentimiz Shavkat Mirziyoyev raisligida 2022-yil 1-mart kuni xotin-qizlarning jamiyatdagi mavqeini yanada mustahkamlash hamda ularni qoʻllab-quvvatlash masalalariga bagʻishlangan videoselektor yigʻilishi boʻlib oʻtgan edi. Yigʻilishda Yurtboshimiz “Agar xalqimizning rozi boʻlishini xohlasak, avvalo moʻʼtabar onalarimiz, opa-singillarimiz uchun munosib turmush sharoitlarini yaratishimiz kerak. Ona rozi boʻlsa, oila rozi boʻladi, oila rozi boʻlsa, jamiyat rozi boʻladi” degan edilar. Bu maqsad mamlakatimizning “Taraqqiyot strategiyasi”da eng muhim yoʻnalishlardan biri qilib belgilangan. Ularning ijrosini har bir mahalla kesimida tizimli ravishda amalga oshirish uchun Oila va xotin-qizlar davlat qoʻmitasini tashkil etish toʻgʻrisidagi Prezident farmoni qabul qilindi.

Farmonga muvofiq, Respublikamizning barcha hududlaridagi singari Amudaryo tumanining barcha ovul va mahallalariga ochiq tanlov asosida xotin-qizlar faollari tayinlandi. Bugungi kunda xotin-qizlar faollari oʻz mahallasidagi ayol-qizlarning ijtimoiy-siyosiy faolligini oshirish, muammolarini hal qilish yoʻlida sidqidildan mehnat qilib kelishmoqda.

Shu bilan birga xotin-qizlar faollarining faoliyat samaradorligini oshirish, ularga qulay mehnat sharoitlarini yaratish borasida koʻplab ijobiy ishlar amalga oshirildi. Jumladan, har bir xotin-qizlar faoliga mahalla binosidan alohida xona, zaruriy ish jihozlari, zamonaviy kompyuterlar ajratildi.

12-dekabr kuni Amudaryo tumani hokimligining majlislar zalida Qoraqalpogʻiston Respublikasi Vazirlar Kengashi Raisi oʻrinbosari Maryam Ahmedova tomonidan tumandagi xotin-qizlar faollariga eng soʻnggi rusumdagi zamonaviy planshetlar topshirildi.

Ushbu planshetlar xotin-qizlar faollariga mahallalarda “oilabay” tizimini yuritishda, ijtimoiy himoyaga muhtoj, tadbirkorlik qilish istagidagi xotin-qizlarni bazalarga kiritishda samarali vosita boʻlib xizmat qiladi.

Shu oʻrinda aytish kerakki, xotin-qizlarning huquq va qonuniy manfaatlarini himoya qilish, ularning mamlakat ijtimoiy-siyosiy hayotidagi oʻrni va faolligini oshirish, gender tenglik kafolatlarini taʼminlash, ilmiy faoliyatga keng jalb qilishda xotin-qizlar faollarining oʻrni tobora ortib bormoqda.

Ular xotin-qizlarning muammolarini oʻz vaqtida aniqlash, ogʻir ijtimoiy ahvolga tushib qolganlarga ijtimoiy-huquqiy, psixologik yordam koʻrsatish, mehnat bozorida talab yuqori boʻlgan kasblar boʻyicha bilim va koʻnikmalarni egallashlari uchun zarur sharoitlar yaratish, qishloq joylardagi xotin-qizlarni oilaviy va xususiy tadbirkorlikka, hunarmandchilikka keng jalb etish borasidagi keng koʻlamli ishlarni yoʻlga qoʻymoqdalar.

Shuningdek, xotin-qizlar oʻrtasida sogʻlom turmush tarzini shakllantirish, oiladagi maʼnaviy-axloqiy qadriyatlarni mustahkamlash boʻyicha manzilli chora-tadbirlarni amalga oshirmoqdalar. Bir soʻz bilan aytganda, jamiyatning asosiy boʻgʻini hisoblangan oilalar tinchligi, xotirjamligini taʼminlashda xotin-qizlar faollari samarali tarzda mehnat qilishmoqda.

Tuman hokimligining Axborot xizmati.