“YoNGʻIN XAVFSIZLIGI OYLIGI” DOIRASIDA OʻQUVChI-YoShLAR OʻRTASIDA KOʻRIK-TANLOV OʻTKAZILDI

Aholi oʻrtasida yongʻinlar bilan bogʻliq baxtsiz hodisalarning oldini olish maqsadida mamlakatimizda joriy yilning 15-noyabridan 15-dekabriga qadar “Yongʻin xavfsizligi oyligi” oʻtkazilmoqda. Mazkur tadbirdan koʻzlangan maqsad iqtisodiyot tarmoqlari va ijtimoiy soha obʼektlari, shuningdek, aholi turar joylarining yongʻin xavfsizligini taʼminlash borasida amalga oshirilayotgan ishlarni muvofiqlashtirgan holda yanada jadallashtirish va bu ishlarda fuqarolarning keng ishtirokini taʼminlashdan iborat.

Amudaryo tumanida ham “Yongʻin xavfsizligi oyligi” doirasida aholi oʻrtasida, umumtaʼlim maktablari oʻquvchi-yoshlari bilan uchrashuvlar, davra suhbatlari oʻtkazilib, yongʻin sodir boʻlish xavfining oldini olishda birinchi galda amal qilinishi talab etiladigan vazifalar yuzasidan tushuntirishlar olib borilmoqda.

9-dekabr kuni “Barkamol avlod” bolalar maktabida “Yongʻin xavsizligi oyligi” doirasida tumandagi umumtaʼlim maktablarining 10-sinf oʻquvchilari oʻrtasida yongʻin xavfsizligi qoidalarini, ularga amal qilishni bilish darajasini aniqlash boʻyicha koʻrik-tanlov tarzidagi tadbir oʻtkazildi. Tadbirni tuman Favqulodda vaziyatlar boʻlimi Favqulodda vaziyatlarning oldini olish va ularni bartaraf etish xavfsizlik targʻiboti boʻlinmasi boshligʻi Bekzod Tajiboyev olib bordi.

Tanlov uch bosqichda tashkil etildi. Birinchi bosqichda jamoalar yongʻin xavfining oldini olish, ayni paytda davom etayotgan oylik doirasidagi tadbirlar boʻyicha savollarga javoblar berishdi. Ikkinchi bosqichda oʻquvchi-yoshlar yongʻin xavfsizligi qoidalariga rioya qilishga oid suratlar chizishdi. Uchinchi bosqichda esa oʻquvchilarning yongʻin oʻchirish avtomobili, uning vazifalari toʻgʻrisidagi tushunchalari, bilimlari sinovdan oʻtkazildi. Oʻquvchi-yoshlar tanlovda yongʻin hodisasining salbiy oqibatlari, uning oldini olish, xavfsizlik qoidalariga rioya qilishga doir maʼlumotlarga yetarlicha ega ekanliklarini namoyish etishdi.

Shu oʻrinda taʼkidlash joizki, ayni kunlarda oylik doirasida aholi turar joylari, ijtimoiy soha obʼektlari va iqtisodiyot tarmoqlariga qarashli bino va inshootlarda profilaktik tadbirlar oʻtkazilmoqda. Tekshiruvlar jarayonlarida aniqlangan kamchiliklarni joyida bartaraf etish choralari koʻrilmoqda.

Xususan, isitish pechlaridan, elektr uskunalardan uy sharoitida foydalanishda eʼtibor berish zarur boʻlgan eng muhim qoidalar haqida zarur tushuncha va tavsiyalar berilib, yongʻin xavfsizligini taʼminlash boʻyicha bukletlar tarqatilmoqda.

Boʻlib oʻtayotgan profilaktik tadbirlarda tabiiy gaz tarmoqlariga taʼqiqlangan jihozlar, ayniqsa, rezina shlanglar orqali ulanish, xonadonlardagi isitish pechlarini rezina shlanglar yordamida isitish holatlari mavjudligi aniqlanib, bu kabi salbiy holatlar nafaqat oila aʼzolari, balki qoʻni-qoʻshnilar va jamiyat uchun ham zararli oqibatlarga olib kelishi mumkinligi, chunki aynan shunday holatlar tufayli mamlakatimizning turli hududlarida is gazidan zaharlanish kabi koʻngilsiz voqealar, chala yongan gazning chaqnashi oqibatida yongʻinlar yuz berayotgani aholiga hayotiy misollar orqali keng tushuntirilmoqda.

Qizgʻin tarzda davom etgan tadbir yakunida 1-oʻrinni 38-sonli maktabning 10-sinf oʻquvchilari, 2-oʻrinni 40-sonli maktabning 10-sinf oʻquvchilari va 3-oʻrinni 82-sonli maktabning 10-sinf oʻquvchilari egallashdi. Ularga tuman Favqulodda vaziyatlar boʻlimi boshligʻi Hamro Matyoqubov faxriy yorliqlar va esdalik sovgʻalarini topshirdi.

Tadbir yakunida yongʻin-qutqaruv texnikalari va vositalari koʻrgazmali tarzda namoyish etilib, keng tushunchalar berildi. Tuman Favqulodda vaziyatlar boʻlimi xodimlari tomonidan yongʻin oʻchirish avtomobili va asbob-anjomlar atroflicha tanishtirildi hamda shartli ravishda yongʻin hosil qilinib, oʻquvchilar birlamchi yongʻin oʻchirish vositalarini ishlatishni amalda sinab koʻrishdi. Qiziqarli oʻtgan tadbirda oʻquvchi-yoshlar yongʻinning salbiy oqibatlari va ularning oldini olish, xavfsizlik qoidalariga rioya etishga doir bilim va koʻnikmalarini yanada mustahkamlashdi.

 S.Berdekeyev, tuman FVB boshligʻi oʻrinbosari.