AMUDARYo TUMANIDA “PREZIDENT ARChASI” BAYRAM TADBIRI OʻTKAZILDI
Yurtimizda nishonlanadigan qutlugʻ sanalar, bayramlar koʻp. Biroq har yilning boshlanishi – Yangi yil bolajonlar uchun barcha bayramlar ichida eng zavqlisi boʻladi, desak adashmagan boʻlamiz. Shuning uchun ham ular yil yakunida, Yangi yil kirib kelishiga sanoqli kunlar qolganida nishonlanadigan “Prezident archasi” tomoshalarini orziqib kutadilar.
Shu yilning 29-dekabrida Amudaryo tumani Madaniyat markazi tomoshalar zali “Prezident archasi” Yangi yil tadbiriga tashrif buyurgan bolajonlar bilan gavjum boʻldi.
Tadbirda sektorlar rahbarlari, tuman hokimligi, xalq taʼlimi boʻlimi masʼullari, jamoat tashkilotlari vakillari, maktablar oʻquvchilari, maktabgacha taʼlim tashkilotlari tarbiyalanuvchilari ishtirok etdilar. Shuningdek, tumanimizning turli hududlarida istiqomat qiladigan kam taʼminlangan, boquvchisini yoʻqotgan oilalarning 3 yoshdan 15 yoshgacha boʻlgan 32 nafar farzandlari taklif etilgan.
Katta monitor orqali ulugʻvor archa, sahna yoritilishi bolajonlarning hayajonini yana ham oshirdi. Sahnaga boshlovchilar chiqib keldi va barchani yaqinlashib kelayotgan Yangi yil bayrami bilan qutladi, kirib kelayotgan yil qutlugʻ, barakali boʻlishini tiladilar. Yangi yilni, tingchlik, totuvlikni, baxtiyor bolalikni madh etuvchi sheʼrlar yangradi.
Sahnaga bolajonlarni bayram bilan qutlash uchun tuman hokimi Sultonboy Yoʻldashev taklif etildi.
Tuman hokimi bolajonlarni yaqinlashib kelayotgan Yangi yil bilan qizgʻin qutladi va jamoatchilik vakillari ishtirokida Prezidentimiz tomonidan kam taʼminlangan, boquvchisini yoʻqotgan oilalarning farzandlariga yuborilgan sovgʻalarni topshirdi.
Yuksak mehr-muruvvatdan bahramand boʻlib ulgʻayayotgan bolalarga Yurtboshimizning sovgʻalari olam-olam shodlik baxsh etdi.
Shunisi eʼtiborliki joriy yilgi “Prezident sovgʻasi”da davlatimiz rahbarining bolajonlarga yoʻllagan Yangi yil bayrami tabrigi, shirinliklar, oʻquv qurollari, elektron kitob, termos, shaxmat doskasi kabi jihozlar bor.
Tabriklardan soʻng sahnaga Madaniyat markazida faoliyat yuritayotgan toʻgaraklar aʼzolari kuy-qoʻshiqlar ijro etdilar. “Nukus shou” teatri jamoasi ijrosidagi tomoshalar ham bolajonlar shodligiga shodlik qoʻshdi.
Madaniyat markazi toʻgaragi aʼzolari ijro etgan sahnalashtirilgan ertakka sehrlanib oʻtirgan tomoshabinlar sahnaga Yangi yil tomoshalari qahramonlari boʻlgan Qorbobo, Qorqiz va yosh bolakay qiyofasidagi Yangi yil kirib kelishini qarsaklar bilan olqishladilar.
Qorbobo, Qorqiz va Yangi yilning ushbu davraga yetib kelguncha boshidan oʻtkazgan sarguzashtlari haqidagi hikoyalari, sovgʻalari-yu tabriklarini bolajonlar maroq bilan tingladilar. Qorbobo, Qorqiz maktab oʻquvchilari, maktabgacha taʼlim tashkilotlari tarbiyalanuvchilari bilan birgalikda ijro etgan sheʼrlari, qoʻshiqlari, raqslari bayram shukuhini yana ham oshirdi. “Ezgulik hamisha gʻolib” ertagi ularning murgʻak koʻngillarida kelajakka ishonch uygʻotib, yurtimizning fidoyi, sofdil va matonatli farzandlari boʻlib ulgʻayishga havas uygʻotdi.
“Prezident archasi” tomoshalari taassurotlari bolajonlarning koʻngillarini togʻday yuksaltirdi.
Oygul RAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
