HAM VATANPARVAR, HAM OILAPARVAR HARBIY

Hayotida bir bora harbiy libos kiyishni orzu qilmagan yigit boʻlmasa kerak. Chunki bekorga bolajon xalqimiz oilada oʻgʻil tugʻilsa, bir-birlarini: “askar muborak boʻlsin!” deya qutlamaydilar. Shuning uchun ham oʻgʻli bor otaning koʻkragi baland, yuzi yorugʻ. Boisi, u ona Vatanning boʻlgʻusi himoyachisi – askarning otasi!

Sherzod Atoyev oilada kenja farzand. Uch nafar oʻgʻilning otasi boʻlgan dadasi Moʻʼmin Atoyev va onasi Roʻzika Sobirova uch oʻgʻilni uch metin qoʻrgʻonim, deb voyaga yetkazdilar. Oʻgʻillari hayotdan oʻz oʻrinlarini topib, kasb-u korli boʻlganlarida, oila qurib, oldi-orti nevaralarga toʻlganida, uch oʻgʻlon haqiqatan ham uch metin qoʻrgʻon kabi suyanch boʻlganida koʻngillari toʻlib, shukronalar aytishdi.

Ayniqsa, kenja oʻgʻil Sherzodjonning tanlovidan ota-ona sifatida faxrlandilar. Umumtaʼlim maktabini muvaffaqiyatli tamomlagan Sherzod Atoyev Urganch Davlat Universitetining tarix fakultetida, milliy istiqlol gʻoyasi, huquq va maʼnaviyat asoslari yoʻnalishi boʻyicha tahsil oldi.

Bolaligidan harbiy sohaga qiziqishi yuqori boʻlgan Sherzod 2015-yildan Davlat xavfsizlik xizmati chegara qoʻshinlari safida ilk harbiy faoliyatini boshladi. U qayerda, qaysi harbiy qismda faoliyat yuritishidan qatʼiy nazar, muddatli harbiy xizmat burchini oʻtayotgan yoshlar bilan ishlashish, ularni turli mafkuraviy xurujlardan himoya qilish, yosh askarlar ongiga harbiy vatanparvarlik tuygʻularini singdirishga intildi.

Askarlarning boʻsh vaqtlarini mazmunli oʻtkazishlari uchun turli xil zakovat oʻyinlari, kitobxonlik kechalarini tashkil etish, mamlakatimizda va xorijda roʻy berayotgan ijtimoiy-siyosiy, mafkuraviy jarayonlar xususida aniq va puxta maʼlumotlar berish orqali yosh askarlarning maʼnaviy immunitetini oshirishga xizmat qiluvchi nazariy va amaliy mashgʻulotlar olib bordi.

Sherzod Atoyev 2015-yildan Davlat xavfsizlik xizmati chegara qoʻshinlari qoʻmondonligining yoʻllanmasi bilan Amudaryo tumani hududidagi chegara qoʻshinlari safida oʻz xizmat vazifasini davom ettirib kelmoqda. U qism komandirining tarbiyaviy va mafkuraviy ishlar boʻyicha oʻrinbosari sifatida deyarli har kuni askarlar bilan birga. Chunki Oʻzbekistonning turli hududlaridan kelib, oʻz xizmat burchini ado etayotgan yosh askarlarning har birining xulq-atvori har xil.

Biri-birini takrorlamaydigan turli fikr va dunyoqarashga ega yosh askarlarni bir maqsad – ona Vatan tinchligi va osoyishtaligi yoʻlida sidqidildan xizmat qilish yoʻlida birlashtirish, Vatanparvarlik, xalqparvarlik ruhida, nafaqat jismonan, balki aqlan yetuk, kuchli va salohiyatli qilib tarbiyalash oson emas. Buni yaxshi his qilgan Sherzod Atoyev har bir tarbiyaviy tadbirning muvaffaqiyatli oʻtishi, yosh askarlarning faol ishtirokini taʼminlash maqsadida eng zamonaviy, interfaol usullarni qoʻllagan holda mashgʻulotlar olib borishga harakat qiladi. Boisi, davlat chegarasini qoʻriqlayotgan askarning masʼuliyatni nechogʻlik his etishi, juda koʻp jihatdan qism komandirining tarbiyaviy va mafkuraviy ishlar boʻyicha oʻrinbosari Sherzod Atoyevning faoliyatiga bogʻliq. Sherzod Atoyev esa oʻz vazifasini muvaffaqiyatli ado etish uchun oʻqib-oʻrganishdan, izlanishdan aslo charchamaydi.

Harbiy zobit uchun ikkita oila bor – biri ona Vatani boʻlsa, yana biri – sevimli rafiqasi va farzandlari. Bu tomondan Sherzod Atoyevning hamisha koʻngli toʻq. Umr yoʻldoshi Nodira Yoqubovaning tadbirli uy bekasi, mehribon ona va sadoqatli rafiqa sifatidagi oʻrni gʻoyat eʼtiborli. Doimiy ravishda ish bilan band boʻladigan Sherzodning xotirjam ishlashidan tashqari, xizmat vazifasini mazmunli oʻtkazishi uchun zarur sharoit yaratishga harakat qilgani bois, oilada barcha ishlar joyila. Ikki nafar farzandining tarbiyasi, oilaning saranjom-sarishtaligi, qoʻni-qoʻshnilari bilan muomalasi, bordi-keldilari havasga munosib.

Biz ijodiy guruhimiz bilan 14-yanvar – Vatan himoyachilari kuni arafasida Sherzod Atoyev va Nodira Yoqubovalar oilasida boʻlib, ona Vatan sarhadlarida sobit askarlar va ularga maʼnaviy ragʻbat, maʼnaviy ruh, bilim va salohiyat ulashayotgan Sherzod Atoyevni, davlat xavfsizlik xizmati chegara qoʻshinlari askarlari, harbiy zobitlar, shu barobarida ularning oila aʼzolarini ham bayram bilan muborakbod etdik.

Robiya YOʻLDOShEVA, Ravshon BAHROMOV, M.ShOMURODOV olgan surat.