Tuman hokimligi binosiga quyosh panellari oʻrnatildi

Butun jahonda tiklanadigan energiya manbalariga qiziqish kundan-kunga oshib bormoqda. Bularga birinchi navbatda quyosh, shamol va bioyenergiya manbalarini kiritishimiz mumkin.

Soʻnggi yillarda neft, gaz, koʻmirga nisbatan tiklanadigan energiya manbalarining raqobatdoshligi sezilarli darajada oʻsdi.

Shu maqsadda yaqin istiqbolga moʻljallangan dasturlar doirasida iqtisodiyot tarmoqlari, aholi va ijtimoiy soha obʼektlarida qayta tiklanuvchi energiya manbalaridan keng foydalanish ustuvor vazifalardan qilib belgilandi.

Amudaryo tumanida ayni vazifalar ijrosi doirasida tuman hokimligi binosiga 15 kVt dan iborat quyosh paneli oʻrnatildi.

Oʻrnatilgan 42 ta quyosh paneli 360W ni tashkil qilib 1 soatda 15 kVt elektr energiyasini yetkazib beradi.

Bulutli kunlarda esa quyosh panelining ish samaradorligi bir muncha pasayib 70-80 foiz elektr energiyasini uzatadi. Va natijada quyoshli kunlarda 1 soat ichida 15 kVtni yetkazib bergan quyosh paneli bulutli ob-havo sabab 11-12 kVAelektr energiyasini yetkazib beradi.

Hech kimga sir emas, hozirgi kunda joylarda aholini kundalik ehtiyojlari uchun berilayotgan elektr taʼminotidagi uzilishlar oʻz navbatida aholining turmush sharoitiga salbiy taʼsir koʻrsatadi.

Undan tashqari, kam taʼminlangan, ijtimoiy himoyaga muhtoj fuqarolar kommunal toʻlovlarni oʻz vaqtida amalga oshirolmasligi ham ayni haqiqat.

Ushbu holatlar inobatga olingan holda tuman mahalliy byudjeti mablagʻlari hisobidan tumanning turli ovul va mahallalarida istiqomat qiluvchi ijtimoiy himoyaga muhtoj 12 nafar fuqaroga subsidiya asosida qoʻyosh panellari qurib berildi.

Vaqti kelib qachondir tabiiy resurslarning barchasi tugaydi.

 Biz uchun tabiat inʼomi boʻlgan quyosh− tekin energiya manbaidir. Quyoshdan energiya ishlab chiqaruvchi quyosh paneli aholi uchun katta ijobiy yangilik boʻldi.

Tuman hokimligining Axborot xizmati.