HARBIY XIZMAT YIGITLAR UChUN TARBIYa MAKTABIDIR

Xalqimizda kimningki oilasida oʻgʻil farzand tugʻilsa, Vatan himoyachisi tugʻildi, deya suyunchilashadi, polvon yigit boʻlsin, or-nomusli, oilasiga, el-yurtga munosib posbon boʻlsin, deya tilak tilashadi.

Darhaqiqat, oʻgʻil bolalar ulgʻayib bir kuni kamolga yetganida xalqi, ona Vatani oldida sodiq xizmat qilish, tinchlik-osoyishtalikni asrash uchun harbiy xizmatga chaqiriladi. Yurtimizning har bir oʻgʻloni borki, oʻn sakkiz yoshdan yigirma yetti yoshgacha boʻlgan davr oraligʻida, salomatligiga koʻra Qurolli Kuchlar safida harbiy xizmatni oʻtashga yaroqli boʻlsa, harbiy xizmatga majburdirlar.

Harbiy xizmatning muddatli harbiy xizmat, safarbarlik chaqiruvi rezervidagi harbiy xizmat, shartnoma boʻyicha harbiy xizmat kabi turlari mavjud boʻlib, bularga chaqiriluvchilarning xohish-istagiga, ularning ham maʼnan, ham jismonan barkamolligiga, sogʻligi toʻgʻrisida tibbiy hayʼat tekshiruvi xulosalariga koʻra qabul qilinadi.

Muddatli harbiy xizmat - chaqirilish yoshidagi fuqarolarning oddiy askarlar va serjantlar tarkibi lavozimlarida, shuningdek, muqaddam harbiy xizmatni oʻtamagan ofitserlarning qonun hujjatlarida belgilangan muddat mobaynida Qurolli Kuchlar safidagi majburiy xizmatidir.

Muddatli harbiy xizmat xizmatni oddiy askarlar va serjantlar tarkibi lavozimlarida oʻtayotgan harbiy xizmatchilar uchun oʻn ikki oy, oliy maʼlumotlilar uchun, shuningdek, chaqiruv boʻyicha ofitserlar tarkibi lavozimlarida oʻtayotgan ofitserlar uchun ham toʻqqiz oy qilib belgilangan.

Muddatli harbiy xizmatni oʻtashga yaroqli hamda chaqirilish muddatini kechiktirish yoki chaqirilishdan ozod etilish huquqiga ega boʻlmagan, biroq Qurolli Kuchlar safiga navbatdagi muddatga chaqirilmagan shaxslar safarbarlik chaqiruvi rezervi safiga olinadilar.

Shartnoma boʻyicha harbiy xizmat - Qurolli Kuchlar safidagi haqiqiy harbiy xizmatga ixtiyoriylik asosida, harbiy xizmat nazarda tutilgan vazirliklar, davlat qoʻmitalari va idoralar orqali davlat bilan tuziladigan shartnomaga binoan kirgan fuqarolar bajaradigan harbiy xizmat turidir. Qisqa qilib aytganda, harbiy xizmatni kasb tariqasida tanlagan fuqarolar shartnoma boʻyicha harbiy xizmatni oddiy askarlar, serjantlar va ofitserlar tarkibi lavozimlarida oʻtaydilar. Muddatlari va shartlari esa shartnomada belgilanadi.

Umuman olganda, harbiy xizmat oʻtash–yigitlarning iqtidorini, intellektual salohiyatini , tugʻilib oʻsgan yurtiga mehr-muhabbatini, yurt xizmatiga fidoyiligini yaqqol namoyon etadigan jarayondir.

Shuni faxr bilan ayta olamanki, tumanimizning yigitlari qaysi harbiy xizmat turlarida boʻlsalar-da, xizmat qilayotgan qismlarida eng namunali askarlar sanaladilar. Bunda tumanimizdagi kasb-hunar taʼlimi muassasalarida yoshlarni harbiy chaqiriqqacha tayyorlash fanining bugungi kun talablari asosida oʻqitilayotgani muhim oʻrin tutadi. Ayniqsa, Doʻrman qishloq xoʻjalik kasb-hunar kolleji oʻqituvchisi Otamurod Yusupov, Amudaryo maishiy xizmat koʻrsatish kasb-hunar kolleji oʻqituvchisi Madrim Bobojonov, Amudaryo qishloq xoʻjalik kasb-hunar kolleji oʻqituvchisi Yusufboy Olloberganov, Amudaryo melioratsiya va suv xoʻjaligi kasb-hunar kolleji oʻqituvchisi Laziz Matsafoyevlar boʻlgʻusi askarlarni chaqiriqqacha puxta tayyorlayotgani bois, oʻquvchilari sohaga doir tanlovlar va musobaqalarda faol qatnashib, gʻoliblar safidan joy olishmoqda.

Harbiy xizmatni oʻtash yigitlar uchun muhim sinovdir. Chaqiriqqacha puxta tayyorgarlikdan oʻtgan yigitlarimiz esa bu sinovni muvaffaqiyatli oʻtab kelmoqdalar.

Akmal Olimov,