Xitoy ovul fuqarolar yigʻinida Navroʻz bayrami boʻlib oʻtdi

Bahor va tabiat uygʻonishining timsoli, sharqona yangi yilning boshlanishi boʻlgan Navroʻzi olamni baland ruh va katta shodiyona bilan nishonlash azal-azaldan el-yurtimiz uchun goʻzal anʼana hisoblanadi. Xalqimizning koʻp asrlik ezgu qadriyatlarini, uning orzu-intilishlarini oʻzida mujassam etgan ushbu qutlugʻ ayyom mustaqillik yillarida mamlakatimizda yashayotgan turli millat va elatlarga mansub barcha vatandoshlarimiz uchun umumxalq bayramiga aylandi. Ushbu ayyom mamlakatimizda har yili milliy qadriyat va urf-odatlarimizga uygʻun tarzda nishonlanib kelinadi.

Jumladan, bayram shodiyonasi Amudaryo tumanining har bir mahalla va ovullarida koʻtarinki ruhda, yuqori saviyada oʻtkazildi. Xitoy ovulidagi Navroʻz saylida ovul hududida istiqomat qiluvchi yetti yoshdan yetmish yoshgacha boʻlgan barcha faol ishtirok etishdi.

Navroʻz saylida Xitoy ovul fuqarolar yigʻini raisi Davlatboy Atajanov barchani yangilanish va yasharish faslida yangi kun, yangi yil, yangi hayot sifatida kirib kelayotgan qutlugʻ bayram bilan tabrikladi. Shuningdek, taʼlim faxriysi, taniqli ijodkor Tursunboy Abdullayev ovuldoshlarini bayram bilan samimiy qutladi. Ularning oilasiga tinchlik, xotirjamlik, qut-baraka tiladi.

Soʻzga chiqqanlar yurtimizda hukm surayotgan tinchlik, doʻstlik va birodarlik tuygʻularini mustahkamlash, xalqimiz, avvalo, yosh avlodimiz qalbi va ongida Vatanimizning buguni va kelajagiga daxldorlik tuygʻusini kuchaytirishda Navroʻz bayramining ahamiyati tobora ortib borayotganligini taʼkidlab oʻtdilar.

Mahallaning hoji otaxon va onaxonlari, yoshi ulugʻ nuroniylar, tengdoshlariga oʻrnak boʻlayotgan yoshlarning tabrik soʻzlaridan soʻng, bayramona kontsert dasturi namoyish etildi.

Maktabgacha taʼlim tashkiloti tarbiyalanuvchilari, umumtaʼlim maktablari oʻquvchilari ishtirokida tayyorlangan badiiy chiqishlarda Navroʻzi olamning ruhi va falsafasida mujassam boʻlgan yaxshilik va bagʻrikenglik, ahillik va hamjihatlik, atrof-muhitni koʻz qorachigʻidek asrab-avaylash kabi olijanob gʻoyalar aks etdi. El-yurtimiz yasharish va yangilanish, mehr-oqibat fasli sifatida eʼzozlaydigan, Birlashgan Millatlar Tashkiloti tomonidan xalqaro bayram deb eʼtirof etilgan Navroʻzning maʼnaviy hayotimizdagi ulkan oʻrni va taʼsiri xitoyliklarning yuz ifodalarida yoqqol namoyon boʻldi.

Navroʻz saylida milliy oʻyinlarimiz, urf-odatlarimiz namoyish etilib, fasli navbahorni, Navroʻzni tarannum etuvchi goʻzal kuy-qoʻshiqlar kuylandi, raqslar ijro etildi.

Bayramda jamiyat va davlat hayotida faollik va tashabbuskorlik koʻrsatgan, oʻzining fidokorona mehnati bilan ibratli faoliyat olib borayotgan, yurtimiz rivojiga oʻzining munosib hissasini qoʻshib kelayotgan, shuningdek oilaviy qadriyatlarni mustahkamlashga, maʼnaviy-axloqiy muhitni sogʻlomlashtirish ishlarida oʻzining hayotiy tajribalari bilan faol ishtirok etib kelayotgan mehnat faxriylariga homiylar tomonidan esdalik sovgʻalari topshirildi.

Shuningdek, bayram tadbirida oʻz isteʼdodi va qobiliyatlarini namoyish etib, faol qatnashgan maktab oʻquvchilari va tarbiyalanuvchilarga ham esdalik sovgʻalari ulashildi.

Har yildagidanda oʻzgacha kayfiyat va koʻtarinki ruhda nishonlanayogan Navroʻz qalblarni birlashtirdi. Darhaqiqat, yurtimizga goʻzallik va nafosat, yasharish va yangilanish, mehr va oqibat bayrami – Navroʻz kirib kelar ekan, dala va qirlarimiz, bogʻ va yaylovlarimiz koʻklam yomgʻirlari – obirahmatdan bahramand boʻlib, boʻlgʻusi moʻl hosil, qut va barakadan darak bermoqda.

 Har bir inson oʻzining tabiat farzandi ekanini yanada chuqur anglayotgan mana shunday munavvar ayyomga el-yurtimiz bilan sogʻ-omon yetganimiz uchun shukronalar aytmoqda.

Tuman hokimligining Axborot xizmati.