Farovon mahallasida Navroʻz sayli oʻtkazildi

Amudaryo tumanining barcha ovul va mahallalarida “Har kuning Navroʻz boʻlsin, jonajon Oʻzbekistonim!” degan bosh gʻoya asosida bayram tantanalari boʻlib oʻtdi. Umumxalq sayillari shaklida oʻtkazilgan bayram tadbirlari amudaryoliklarning kayfiyatini koʻtarish bilan birga, yurtdoshlarimiz qalbida shukronalik, mehr-oqibat, ezgulik, qadriyatlarimizga hurmat, ona Vatanga muhabbat tuygʻularini yanada mustahkamlashga xizmat qildi.

Farovon mahallasi ahli ham Navroʻz bayramini oʻz mahallasida koʻtarinkilik, katta shodiyona bilan nishonladi.

Koʻkda quyosh charaqlaydi, daraxtlar yashil toʻn kiygan. Ona tabiatning goʻzal manzarasi, Navroʻzi olam tadbirlari barchaga xush kayfiyat ulashdi. Sumalak, koʻk somsa, chuchvara singari bahoriy taomlar, milliy va hunarmandchilik mahsulotlari koʻrgazmalari, teatr jamoalari, turli ansambllar, dorbozlar, askiyachilar, sportchilar, jajji bolajonlarning chiqishlari bayram tantanalariga oʻzgacha fayz kiritdi.

Navroʻz saylini mahalla raisi Madamin Kazakov ochib berdi. U oʻz tabrik nutqida ona Vatanni sevish va ardoqlash, hayot gultoji boʻlmish insonni qadrlash, Vatanga muhabbat va sadoqat kabi ezgu gʻoyalarni oʻzida mujassam etgan Navroʻz xalqimizning eng qadimiy bayrami ekanligini, asrlar davomida el-yurtimizning olijanob orzu-intilishlarini ifoda etib kelayotgan Navroʻz mustaqillik yillarida yangicha maʼno-mazmunga ega boʻlib, tom maʼnoda umumxalq bayramiga aylaganini, shuning uchun ham ushbu qutlugʻ ayyomni har bir xonadon, har bir oila katta orzu-niyatlar bilan kutib olishini taʼkidlab oʻtdi.

Mahallaning yoshi ulugʻ otaxon va onaxonlari, mahalla tizimi xodimlarining tabrik soʻzlaridan keyin bayram dasturi boshlandi.

Mahallaning Kimyogarlar koʻchasida boʻlib oʻtgan Navroʻz sayli haqiqiy bayramona saylga aylandi. Bayram tadbirlari doirasida tashkil etilgan hunarmandchilik mahsulotlari, milliy liboslar, shuningdek, milliy va bahoriy taomlar koʻrgazmalari yurtimizdagi toʻkinlik, fayzu barakaning nishonasi boʻldi. Mahallaning yoshi ulugʻ onaxonlari va otaxonlari, qiz-juvonlar, lapar, yor-yorlar aytishib, raqsga tushdilar.

Navroʻz shodiyonalarida tinch va farovon hayotimiz, milliy qadriyat va anʼanalarimiz tarannum etildi. Xalq oʻyinlari, folklor sanʼatining eng yaxshi namunalari, shoʻx qoʻshiq va laparlar bahorni, Navroʻzni sogʻingan dillarga xushnudlik bagʻishladi. Doshqozonlarda sumalak tayyorlandi. Navroʻz sayliga tashrif buyurgan farovonliklar uchun katta dasturxon yozilib, osh tortildi.

 Oʻzbek, qoraqalpoq va boshqa turli millatlarning milliy, bahoriy taomlari koʻrgazmalari, taniqli sanʼatkorlar, estrada xonandalari ijrosidagi kuy-qoʻshiqlar ishtirokchilarda unutilmas taassurotlar qoldirdi.

Bayramda nuroniylarga, koʻp yillardan buyon oilalar mustahkamligiga hissa qoʻshib kelayotgan mahalla fidoiylariga, jajji bolajonlarga bayram sovgʻalari ulashildi.

Tuman hokimligining Axborot xizmati.