DOʻSTLIK MFYNING PIR-U BADAVLAT ONAXONLARI IShTIROKIDA “ONALAR OʻGITI” TADBIRI OʻTKAZILDI

Mahalla – qadriyatlar beshigi. Insonlarning oʻzaro mehr-oqibatlari, muomala-munosabatlari, maʼnaviy qiyofasi, middiy-axloqiy fazilatlari mujassam makon. Bu makonda begona yoʻq, hamma biri-biriga doʻst-u qadrdon, mehribon. qoʻshni-qoʻshnisiga qayishgan, toʻy-marosimlarida jam-ul jam boʻlishib, quvonch-u tashvishlariga yelka tutishgan ahil jamiyat.

Ana shu ahillikni yanada mustahkamlash, oʻzlari yashayotgan mahalla nufuzi, oilalar obroʻ-eʼtiborini oshirish maqsadida mahallalardagi ishchi komissiyalari va jamoatchilik tuzilmalari aʼzolari barcha muammoli masalalarda hamfikr va hamkordirlar. Ayniqsa, xotin-qizlar bilan ishlash komissiyasi tomonidan amalga oshirilayotgan ibratli ishlar tufayli mahallalar hududlari tobora obodonlashib, oilaviy nizolar, oʻzaro qoʻydi-chiqdilarga barham berilayotgani eʼtiborga molik. Bu kabi koʻngillarga manzur holatga biz Mangʻit shahrining Doʻstlik mahalla fuqarolar yigʻinida joriy yilning 20-iyun sanasida boʻlib oʻtgan davra suhbatida guvoh boʻldik.

Amudaryo televideniyesining “Yuksak maʼnaviyatli yoshlar – kelajak poydevori” grant loyihasi doirasida oʻtkazilgan “Onalar oʻgiti” mavzusidagi davra suhbatida Doʻstlik mahallasining obroʻli, el-yurt hurmatiga sazovor onaxonlari, koʻchalar boʻyicha katxudo, koʻchaboshchi ayollar “Buvijonlar maktabi” aʼzolari, “Oqila ayollar” harakati yetakchilari hamda yosh ayol-qizlar ishtirok etdilar.

Davra suhbatini Doʻstlik MFY xotin-qizlar faoli Shoira Xudoyberganova boshlab berdi. U Doʻstlik MFYda xotin-qizlarni har tomonlama qoʻllab-quvvatlash, ularning ijtimoiy faolligini oshirish, oilaviy nizolarning oldini olishda jamoatchilik tuzilmalarining ahamiyati, xususan, MFY huzuridagi “Oqila ayollar” harakati, Ayollar masalahat Kengashi aʼzolari tomonidan amalga oshirilayotgan keng qamrovli maʼnaviy-tarbiyaviy ishlar haqida toʻxtalib, koʻpni koʻrgan, pir-u badavlat onaxonlarimizning saʼy-harakatlari tufayli yoshlarni, turmushga tayyorlash, yosh oilalarning mustahkamligini taʼminlash borasida quvonarli yutuqlarga erishilayotgani haqida soʻz yuritdi. Darvoqe, Doʻstlik MFY hududi va aholi soni jihatidan Mangʻit shahridagi katta mahallalardan biri sanaladi. 570 xonadon tarkibidagi 912 ta oilada 3781 nafar aholi istiqomat qiladi.

Aholining 1928 nafarini ayol-qizlar tashkil etadi va ularning asosiy qismi yoshlardir. Mahallada 12 ta koʻcha boʻlib, har bir koʻchaga ayollardan ham koʻcha boshchilari saylangan. 15 nafardan iborat aʼzosi boʻlgan Ayollar maslahat Kengashi, 12 nafar ibratli oilalar bekalaridan iborat “Oqila ayollar” harakati aʼzolari oʻzaro hamkorlikda ish olib borishlari tufayli soʻnggi bir necha yil davomida mahallada notinch oilalar, shuningdek, oilaviy ajralishlar keskin kamaydi. “Onalar oʻgiti” davra suhbatida ishtirok etgan “Yuksak maʼnaviyatli yoshlar – kelajak poydevori” loyihasi koordinatori, “Taraqqiyot koʻzgusi” va “Mening oilam” gazetalarining maxsus muxbiri, jurnalist Robiya Yoʻldosheva bugungi davr taqozosidan kelib chiqib, oilalar mustahkamligini taʼminlashda pir-u badavlat onaxonlarning maslahat va oʻgitlariga amal qilish koʻpdan-koʻp oilaviy mojarolarga yechim topish imkonini berayotgani, yoshlar ana shunday aziz va nuroniy onaxonlardan ibrat olishga intilayotganini mamnuniyat bilan taʼkidladi.

Ayniqsa, koʻpni koʻrgan, hayot sinovlarini mardonavor yengib oʻtgan nuroniy onaxonlar hayoti yoshlar uchun haqiqiy maʼnaviyat maktabi vazifasini oʻtayotganini hayotiy misollar orqali tadbir ishtirokchilariga soʻzlab berdi. Davra suhbatida “Oqila ayollar” harakati yetakchisi Shukurjon Ermatova yosh kelin va qaynonaning oʻzaro munosabatlari, ular oʻrtasidagi ayrim ziddiyatlar, shu barobarida bu kelishmovchiliklarning kelib chiqish sabablari xususida oʻz fikrlarini bildirib, kimmatli maslahatlarini berdi. Koʻcha boshchisi Gulbahor Oʻrozmetova, koʻcha boshchisi va “Oqila ayollar” harakati aʼzosi Gulnora Nurullayeva, mahalla faollaridan Oʻrozgul Tilovmurodovalar, oʻzlarining yoshlar tarbiyasi, oilaviy ajrashishlarning oldini olish, bugungi yosh qizlarning oʻzini tutishlari, kiyinish madaniyati xususidagi fikrlari bilan oʻrtoqlashdilar va yoshlarni milliy-maʼnaviy qadriyatlar ruhida tarbiyalash boʻyicha oʻzlarining hayotiy tajribalaridan kelib chiqib, zarur tavsiya va qimmatli maslahatlarini berdilar.

Mahmudjon Shomurodov, Ravshan Bahromov, Amudaryo televideniyesi muxbirlari.