“XAVFSIZ TUN” TEZKOR VA PROFILAKTIK TADBIRI OʻTKAZILDI

Amudaryo tumanida hududda qonun ustuvorligini, fuqarolar, jamiyat va davlatning xavfsizligini taʼminlash, huquqbuzarliklarning oldini olish maqsadida “Xavfsiz tun” tezkor profilaktik tadbiri tashkil etildi.

Shu yil 13-sentyabr kuni Prezidentimizning “Oʻzbekiston Respublikasi Jamoat xavfsizligi kontseptsiyasini tasdiqlash va uni amalga oshirish chora-tadbirlari toʻgʻrisida”gi Farmonida koʻrsatilgan vazifalar ijrosi yuzasidan oʻtkazilgan ushbu tadbirda tuman Ichki ishlar boʻlimi profilaktika inspektorlari, Yoʻl harakati xavfsizligi boʻlinmasi, prokuratura, Qoʻriqlash boʻlimi, Favqulodda vaziyatlar boʻlimi, Tibbiyot birlashmasi xodimlari, fuqarolar yigʻinlari raislari, hokim yordamchilari hamda yoshlar yetakchilari ishtirok etishdi.

Tuman hokimligi binosi oldida dastlab tegishli topshiriqlarni belgilab olish boʻyicha oʻtkazilgan yigʻilishda tuman hokimi Sobir Xoʻjametov, Qoraqalpogʻiston Respublikasi Ichki ishlar vazirligining ikkinchi mintaqaviy hudud mintaqaviy muvofiqlashtirish markazi bosh inspektori Qayrat Pirniyazov hamda tuman prokurori Aziz Roʻzmetov, Ichki ishlar boʻlimi boshligʻi Jamoladdin Yusupov va boshqa masʼullar qatnashishdi.

Yigʻilishni tuman hokimi Sobir Xoʻjametov kirish soʻzi bilan ochib berdi va Prezidentimizning 2021-yil 29-noyabr kungi “Oʻzbekiston Respublikasi Jamoat xavfsizligi kontseptsiyasini tasdiqlash va uni amalga oshirish chora-tadbirlari toʻgʻrisida”gi Farmoni mazmun-mohiyati xakida qisqacha toʻxtaldi. Ushbu Farmonning ijrosini taʼminlash maqsadida Respublika miqyosida “Xavfsiz tun” tadbirlari oʻtkazilayotgani, barcha huquq-tartibot idoralarining jamoat xavfsizligini taʼminlash, huquqbuzarliklar profilaktikasi va jinoyatchilikka qarshi kurashishdagi hamkorligi oʻz samarasini berishi alohida taʼkidlab oʻtildi.

Yigʻilishda “mahallalar beshligi” ishlash tizimini kuchaytirish lozimligi, hozirgi kunda bu boradagi ishlar Prezidentimizning talablari boʻyicha yetarli darajada olib borilmayotgani, agarda shu beshtalik hamjihatlikda ish olib borsa, hech bir mahallada muammo qolmasligi taʼkidlandi.

Shundan soʻng Prezident Farmoni ijrosini taʼminlash, tumandagi 12 ta “qizil” toifadagi mahallalarda vaziyatni barqarorlashtirish va “qizil” toifadan chiqarish boʻyicha muhim chora-tadbirlar belgilab olindi.

Ushbu kriminogen jinoyatchilik oshgan mahallalarda jamoat tartibini saqlash va jinoyatchilikning oldini olish maqsadida “Xavfsiz tun” tadbiriga tungi boʻlishtiruv amalga oshirilib, tegishli topshiriqlar berildi.

Tadbirga jalb qilingan xodimlarga mahallalarga boʻlingan holda tungi vaqtda bemaqsad yurgan fuqarolar bilan profilaktik suhbatlar oʻtkazish, ushbu fuqarolarning shaxsiga oydinlik kiritish, bemaqsad yurgan shaxslarni huquqbuzarlik va jinoyat sodir etmaslik toʻgʻrisida rasman ogohlantirish va boshqa vazifalar topshirildi.

Maʼlum qilinishicha, joriy yilning 8 oyi davomida tumanda 12 ta mahalla “qizil” toifaga kiritilgan. Ushbu toifaga 1-sektor boʻyicha Beshtom, Gulzor, Oybek nomli mahallalar, 2-sektor boʻyicha Doʻrman, Qilichboy, Oʻrta qalʼa ovullari, Doʻstlik mahallasi, 3-sektor boʻyicha Kuyuk koʻpir ovuli va Oʻzbekiston mahallasi, 4-sektor boʻyicha esa Beruniy, Navoiy nomli mahallalar va Toshyop ovuli kiritilib, ularni “sariq” va “yashil” toifaga kiritish boʻyicha “yoʻl xaritasi” belgilab olingan.

“Xavfsiz tun” tadbiri davomida “qizil” toifaga kiritilgan ushbu hududlardagi umumiy ovqatlanish shoxobchalari, savdo va maishiy xizmat koʻrsatish obʼektlari hamda boshqa jamoat joylari tekshirildi. Kechki vaqtlarda faoliyat olib boradigan koʻngilochar maskanlar va ularda ishlaydigan shaxslar bilan profilaktik suhbatlar oʻtkazildi.

Tadbirga jalb qilingan xodimlar voyaga yetmaganlarning tungi vaqtda ota-ona nazoratisiz yurishi salbiy holatlarga sabab boʻlishi, farzandlari tarbiyasini eʼtiborsiz qoldirgan ota-onalar ham javobgarlikka tortilishini aytib oʻtishdi. Huquqbuzarliklar va jinoyatchilikning salbiy oqibatlari, ularga nisbatan beriladigan jazo choralari toʻgʻrisida ham tushunchalar berishdi.

Reyd davomida tuman markazida joylashgan tashkilot va korxona binolari qorovullari, qoʻriqlovchilari hushyor turish toʻgʻrisida ogohlantirildi. Ularga oʻzgalarning qarovsiz qoldirilgan mulklari, mulk egasini topish, shuningdek, mulklarni qarovsiz qoldirmaslik haqida fuqarolarga eslatib turish kerakligi toʻgʻrisida tushuntirishlar berildi.

Jinoyatchilik va huquqbuzarliklarning oldini olish, xavfsiz muhitni yaratish, tumanni jinoyatchilikdan holi hududga aylantirish maqsadida hamkorlikda oʻtkazilgan “Xavfsiz tun” tadbirida kriminogen vaziyati ogʻir mahallalarda muammolarni “mahallabay” va “xonadonbay” aniqlab hal etish, “ijtimoiy profilaktika” tizimini toʻliq joriy etish boʻyicha chora-tadbirlar belgilab olindi. Shuningdek, huquq-tartibot idoralari rahbarlari va oʻrinbosarlari “qizil” va “sariq” toifadagi mahallalarga shaxsan masʼul etib biriktirildi.

Tuman hududida tegishli tashkilotlar bilan hamkorlikda tashkil etilgan “Xavfsiz tun” profilaktik tadbiri oʻzaro hamkorlikda va uyushqoqlik bilan oʻtkazildi.

Ilhom Abutov, tuman IIB HPB boshligʻi.