“Xalqaro qishloq ayollari kuni”ga bagʻishlangan tadbir boʻlib oʻtdi

Birlashgan Millatlar Tashkiloti Bosh assambleyasining 2007-yil 18-dekabrda qabul qilingan “Qishloq hududlarida ayollarning ahvolini yaxshilash” toʻgʻrisidagi rezolyutsiyasiga asosan 15-oktyabr – Xalqaro qishloq ayollari kuni deb eʼlon qilingan boʻlib, mazkur sana yurtimizda ham keng nishonlanib kelinmoqda.

Sana munosabati bilan 11-oktyabr kuni Amudaryo tumani Madaniyat boʻlimning tomoshalar zalida bayram tadbiri boʻlib oʻtdi.

Tadbirda tuman hokimi oʻrinbosari, Oila va xotin-qizlar boʻlimi boshligʻi Goʻzal Soburova, Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori Gavhar Chimbaychiyeva, tuman Adliya boʻlimi bosh maslahatchisi Nilufar Jumaniyozova, tuman FHDYo boʻlimi ish yurituvchisi Nabira Oʻngʻarova, ovul va mahalla fuqarolar yigʻinlarining xotin-qizlar faollari hamda turli sohalar, ayniqsa qishloq xoʻjaligi sohasida xizmat qilayotgan faol ayollar ishtirok etishdi.

Tadbir avvalida Oʻzbekiston Respublikasi Oliy Majlis Senati Raisi Tanzila Norboyeva, Oʻzbekiston Respublikasi Oila va xotin-qizlar qoʻmitasi raisi Zulayho Mahkamovalar Zoom platformasi orqali respublikamizdagi barcha ayol-qizlarni yaqinlashib kelayotgan bayram bilan tabrikladilar. Shuningdek, bugungi kunda mamlakatimizda xotin-qizlarga yaratib berilgan keng imkoniyatlar toʻgʻrisida aytib oʻtdilar.

Davlatimiz rahbari butun dunyo mamlakatlari uchun dolzarb boʻlgan tashabbuslarni Birlashgan Millatlar Tashkilotining yuksak minbaridan muntazam ilgari surib kelayotgani, milliy, mintaqaviy va xalqaro ahamiyatga ega ushbu tashabbuslar nafaqat yurtimiz, balki jahon jamoatchiligi tomonidan ham alohida eʼtirof etilayotganligi taʼkidlandi.

Bayram munosabati bilan tashkillashtirilgan tadbirda tuman hokimi oʻrinbosari, Oila va xotin-qizlar boʻlimi boshligʻi Goʻzal Soburova soʻzga chiqib, mamlakatimizda keyingi yillarda xotin-qizlarning jamiyatdagi faolligini oshirish, salomatligi muhofaza qilish borasida tizimli ishlar amalga oshirilayotganini hamda onalik va bolalikni har taraflama qoʻllab-quvvatlash davlatimiz belgilab olgan siyosatning ustuvor yoʻnalishlaridan biri ekanligini taʼkidlab oʻtdi.

Shuningdek gender tenglik va xotin-qizlar huquqlarini taʼminlash masalasiga qaratilayotgan alohida eʼtibor ham shunday muhim tashabbuslar sirasiga kiradi. Mamlakatimizda keyingi yillarda xotin-qizlarni har tomonlama qoʻllab-quvvatlash, ularning ijtimoiy-iqtisodiy va siyosiy faolligini oshirish, bandligini taʼminlash, tadbirkorlikka keng jalb etish borasida erishilgan yutuqlar dunyo ahli namuna olishiga munosibdir.

Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori Gavhar Chimbaychiyeva oʻz soʻzida qishloqlarda yashayotgan munis buvijon va onaxonlarni, dilbar opa-singillarni 15-oktyabr – Xalqaro qishloq ayollari kuni bilan samimiy tabrikladi. Shuningdek hududni ijtimoiy-iqtisodiy rivojlantirishga va har taraflama barkamol avlodni tarbiyalashga katta hissa qoʻshayotgani uchun ularga chuqur minnatdorlik bildirdi.

Qishloq ayollarining ulkan matonati, togʻday sabr-toqati hamda mehnatsevarligidan barchamiz faxrlansak arziydi. Boisi, ular dala-dasht va bogʻ-u rogʻda, maktab, shifoxonada mehnat qilishdan, tadbirkorlik, fermerlik bilan shugʻullanish va aholiga turli xizmatlar koʻrsatishdan tashqari farzandlarini Vatanga muhabbat, yurtga sadoqat, milliy qadriyatlarimizga hurmat ruhida tarbiyalayotgani tahsinga loyiqdir. Shu boisdan ham qishloq hududlarida yashab, turli sohalarda samarali mehnat qilayotgan, farzandlar tarbiyasi bilan shugʻullanayotgan ayollarni qoʻllab-quvvatlash, ularning ogʻirini yengil qilishga koʻmaklashish, oʻz hayotlaridan rozi boʻlib yashashlarini taʼminlash doimiy va eng muhim vazifalardan biridir.

Tadbirda tuman Madaniyat boʻlimi va joylardagi madaniyat markazlari xodimlari tomonidan ishtirokchilarga kontsert dasturi namoyish etildi.

Tuman hokimligi Axborot xizmati