MAQSADIMIZ – FUQAROLAR HUQUQLARINI HIMOYa QILISh

Muhtaram Prezidentimiz “Sud binosiga kelgan har bir fuqaro Oʻzbekistonda adolat borligiga ishonib chiqib ketishi kerak”, deya taʼkidlaganlariday, faoliyatimizda odil sudlov jarayonida fuqarolarimiz huquq va manfaatlarini taʼminlashga intilmoqdamiz.

Jinoyat ishlari boʻyicha tuman sudida joriy yilning 9 oyida 16 nafar shaxsga nisbatan Jinoyat Kodeksining tegishli moddalariga asosan muayyan huquqdan mahrum qilish jazosi, 13 nafar shaxsga nisbatan JKning 57-moddasi qoʻllanilib, yengilroq jazo, 2 nafar shaxsga esa tibbiy yoʻsindagi choralar qoʻllanildi.

Koʻrilgan jinoyat ishlarining 64tasi  ijtimoiy xavfi katta boʻlmagan, 48tasi uncha ogʻir boʻlmagan, 25tasi esa ogʻir jinoyatlardir. 19 nafar shaxsga nisbatan qoʻzgʻatilgan jinoyat ishi boʻyicha dastlabki tergov organi tomonidan qoʻyilgan ayblov oʻzgartirilib, hukm chiqarildi, 1 nafar shaxs ishi boʻyicha tegishli moddaning tegishli qismi yoki bandi qoʻllanilgan holda hukm chiqarildi. 15 nafar shaxsning ishi boshqa moddaga malakalanib, hukm chiqarildi, 6 nafar shaxsning jinoyat ishi boshqa moddaga malakalanib, hukm chiqarildi. 5 nafar shaxs esa sud zalidan ozod qilindi. Shuningdek, voyaga yetmaganlarga nisbatan 5ta ish boʻyicha 8 nafar, 60 yoshdan oshganlarga nisbatan 3 ish boʻyicha 4 nafar, 14-30 yoshgacha boʻlgan yoshlarga nisbatan 47 ish boʻyicha 61 nafar shaxslarga oid jinoyat ishlari koʻrildi. 16ta ish boʻyicha 24 nafar ayollarga nisbatan sud hukmi oʻqildi.

Joriy yilning 9 oyi davomida jami koʻrib tamomlangan, oʻtgan yildan qoldiq boʻlib qolgan va  toʻqqiz oy davomida ochilgan 107ta jinoyat ishidan 23tasi ibrat tariqasida sayyor sud majlislarida koʻrib chiqildi.

Jinoyatlar sodir etilishining oldini olish, aholining huquqiy savodxonligini oshirish, sud-huquq sohasiga doir muammolarini oʻrganish maqsadida tumanning toʻqqiz ovul va mahallasida sayyor qabullar, huquqbuzarliklar, jinoyatlar kamayishiga, xavfsiz hududlar shakllanishiga hissa qoʻshish maqsadida aholi orasida huquqiy targʻibot tadbirlari oʻtkazdik.

Maʼlumki, 2021-yil boshidan boshlab maʼmuriy ishlarni koʻrish vakolati jinoyat ishlari boʻyicha sudlarga oʻtkazildi. Shunga muvofiq, tuman jinoyat ishlari boʻyicha sudi tomonidan joriy yilning 9 oyi davomida jami 1339 nafar shaxsga nisbatan 1191ta maʼmuriy huquqbuzarlik toʻgʻrisidagi ishlar koʻrib, tamomlandi.

Jinoyat ishlari boʻyicha tuman sudi sudlov jarayonlarida bagʻrikenglik va kechirimlilik tamoyillariga amal qilib, bilib-bilmay jinoyat koʻchasiga kirib qolganlarni toʻgʻri yoʻlga qaytarish uchun amaldagi qonunchilik normalaridan imkon qadar foydalanishga harakat qilayotir. Natijada fuqarolarning kelajakka boʻlgan, sud-huquq organlariga boʻlgan ishonchi ortmoqda.

Asqar SAFAROV,

Jinoyat ishlari boʻyicha tuman sudi raisi.