Sektorlar rahbarlari kuz-qish mavsumiga tayyorgarlik ishlari bilan tanishdi

Bugungi kunda barcha joylarda boʻlgani kabi Amudaryo tumanida ham “Obod qishloq” va “Obod mahalla” Davlat dasturlari ijrosi yuzasidan bir qator amaliy ishlar qilinmoqda. Ushbu dasturlar doirasida, va umuman, yurtimizda amalga oshirilayotgan barcha islohotlarning va kechayotgan oʻzgarishlarning tub zamirida yurtdoshlarimizning turmush sharoitlarini yaxshilash, ularni bugungi hayotidan toʻlaqonli rozi boʻlib yashashlariga erishishdek ezgu maqsadlar mujassam.

Koʻp yillar davomida fuqarolar uchun hattoki oddiy turmush sharoiti boʻlmagan chekka hududlardagi aholi punktlarida bugun “Obod qishloq” va “Obod mahalla” davlat dasturlari doirasidagi xayrli ishlar jadallik bilan olib borilayapti.

 Ushbu davlat dasturlarini samarali va oʻz vaqtida ijro qilish sektorlar rahbarlarining ham doimiy eʼtiborida.

2-noyabr kuni Amudaryo tumanidagi sektorlar rahbarlari Boyovul mahallasida joylashgan koʻp qavatli uylarning qurilish-taʼmirlash ishlari bilan tanishdi.

Tumanda kuz-qish mavsumiga tayyorgarlik jarayonlari bilan tanishish hamda aholi murojaatlarini tinglab, ijobiy hal qilish maqsadida tashkil qilingan oʻrganish jarayonida aholiga maishiy xizmat koʻrsatish sohasida faoliyat yuritayotgan tashkilotlari mutasaddilari ham ishtirok etishdi.

Tashrif davomida masʼullar Boyovul mahalla fuqarolar yigʻinida amalga oshirilayotgan keng koʻlamli obodonlashtirish ishlari bilan yaqindan tanishdilar. Fuqarolarning suyultirilgan gaz, elektr energiyasi bilan bogʻliq murojaatlari tinglandi. Muammolar yechimi boʻyicha tegishli masʼullarga vazifalar yuklatildi. Shuningdek, mahallada aholini qiynayotgan muammolar yuzasidan mutasaddi rahbarlarga tegishli tavsiya va aniq topshiriqlar berildi.

Bundan tashqari, sektorlar rahbarlari koʻp qavatli uylarda istiqomat qiluvchi aholi sharoitini oʻrganish jarayonida bir nechta xonadonlarda ham boʻldilar. Ularning yashash sharoitlari, turmush tarzi va muammolari masʼullar tomonidan oʻrganilib, zarur vazifalar belgilab olindi.

Shu kuni masʼullar tuman Gaz taʼminoti korxonasiga tashrif buyurib, havo haroratining pasayishi davrida isteʼmolchilarga suyultirilgan gazni uzluksiz, bir maromida yetkazib berish borasida koʻrilayotgan chora-tadbirlarni nazorat qildilar.

Keyingi yillarda tuman aholisi sonining oshganligi tufayli tabiiy gazga boʻlgan talabi ham ortgani sir emas. Shu sababli, tumanning tabiiy gaz yetib bormagan chekka joylariga suyultirilgan gazni yetarli miqdorda va oʻz vaqtida yetkazib berishga katta eʼtibor qaratilmoqda.

Oʻrganishlar davomida sektorlar rahbarlari hamda soha mutaxassislari tomonidan hududdagi gaz taqsimlash punktlari koʻzdan kechirilib, aniqlangan kamchiliklar joyida bataraf etildi.

Bundan tashqari, sektorlar rahbarlari tomonidan asosan tabiiy gaz yetib bormaydigan mahallalar kesimida shakllantirilgan roʻyxat va buyurtmalar boʻyicha aholiga qulaylik yaratish, yaqinlashib kelayotgan qish faslini betalofat oʻtkazib olishlariga koʻmaklashish maqsadida koʻmir yetkazib berish masalasiga ham katta eʼtibor qaratilmoqda.

“Koʻmir taʼminot” masʼuliyati cheklangan jamiyatining Qoraqalpogʻiston Respublikasi filialiga qarashli koʻmir omborlari tomonidan 2023-2024-yillar kuz-qish mavsumi uchun ayni kungacha Uyshin mahallasiga 25 tonna, Ayoqchi mahallasiga 38,3 tonna, Bogʻ mahallasiga 38,9 tonna, Besh ovul mahallasiga 39,5 tonna, Qilichboy ovuliga 60 tonna, Qoramon mahallasiga 70 tonna, Xitoy ovuliga 40 tonna, Namuna mahallasiga 20 tonna koʻmir mahsuloti yetkazib berildi va bu boradagi ishlar davom ettirilmoqda.  

Aholiga qulaylik yaratish va narx-navo oshib ketishining oldini olish maqsadida mahsulotni hududlarga yetkazib berish uchun esa 6ta yuk mashinalari ajratilgan.

Hududlarni oʻrganishlar yakunida sektorlar rahbarlari ishchi guruh aʼzolariga oʻzlarining zimmasiga yuklatilgan vazifalarni bajarishga masʼuliyat bilan yondoshish, aholining kuz-qish mavsumini koʻngildagidek oʻtkazishi uchun barcha zarur choralarni koʻrish boʻyicha koʻrsatmalar berdi.

Tuman hokimligi Axborot xizmati