YaNGI KONSTITUTsIYaDA OILA VA NIKOH MUNOSABATLARI ALOHIDA EʼTIROF ETILGAN

Yangi Konstitutsiyaning 76-moddasiga koʻra, oila jamiyatning asosiy boʻgʻini hamda u jamiyat va davlat muhofazasida ekanligini saqlab qolgan holda, nikoh Oʻzbekiston xalqining anʼanaviy oilaviy qadriyatlariga, nikohlanuvchilarning ixtiyoriy roziligiga va teng huquqliligiga asoslanishi belgilangan. Bu bilan davlat oilaning toʻlaqonli rivojlanishi uchun nafaqat ijtimoiy, iqtisodiy, huquqiy, balki davr talabidan kelib chiqqan holda boshqa shart-sharoitlar yaratishni ham oʻz zimmasiga olmoqda.

Ilk marotaba 78-moddada Oʻzbekiston xalqini millatidan qatʼiy nazar, Oʻzbekiston Respublikasining fuqarolari tashkil etishini inobatga olib, respublikada yashovchi barcha fuqarolarning anʼanaviy oilaviy qadriyatlarini hurmat qilishi eʼtirof etilgan. Shu nuqtai nazardan Oʻzbekiston xalqining anʼanaviy oilaviy qadriyatlari deganda fuqarolarning Konstitutsiya va qonunlarga, shu jumladan, Oila Kodeksiga zid boʻlmagan anʼanalari tushuniladi.

Yangi Konstitutsiyada koʻplab soha va yoʻnalishlar qatorida yoshlar masalasiga ham alohida ustuvorlik berilgan. Alohida bir bob, yaʼni XIV bob – oila, bolalar va yoshlar masalasiga bagʻishlangan.

Konstitutsiyaga muvofiq, davlat yoshlarni oʻz himoyasiga oladi. Shuningdek, davlat yoshlarning maʼnaviy, intellektual, ijodiy, jismoniy va axloqiy jihatdan shakllanishi hamda rivojlanishi uchun, ularning taʼlim olishga, sogʻligʻini saqlashga, uy-joyga, ishga joylashishga, bandlik va dam olishga boʻlgan huquqlarini amalga oshirish uchun shart-sharoitlar yaratib berishi belgilangan.   

Yaxshi bilamizki, oʻqishni bitirgan har qanday yosh ishlashi, turmush qurib oilali, uyli-joyli boʻlishi lozim. Ammo bularning hammasini birdaniga hal qilish juda qiyin. Shu bois, davlat bu kabi masalalarni oʻz zimmasiga olmoqda.

Yangi Konstitutsiyada yoshlarning ishga joylashishiga, uy-joyga ega boʻlishiga alohida eʼtibor qaratilgan boʻlib, tegishli moddalarda koʻrsatib oʻtilgan.

Rohatoy Polvonova, tuman  FHDYo   boʻlimi inspektori.