“MAHALLADA DUV-DUV GAP” TADBIRI OʻTKAZILDI

Yakunlangan yilning 22-dekabrida Prezident Shavkat Mirziyoyev raisligida Respublika Maʼnaviyat va maʼrifat Kengashining kengaytirilgan yigʻilishi boʻlib oʻtdi. Maʼnaviyat va madaniyat faollari, adabiyot va sanʼat namoyandalari, shuningdek vazirlar, hokimlar ishtirok etgan yigʻilishda ijitmoiy sohani, xususan, maʼnaviyat va maʼrifat, taʼlimni yangi bosqichga koʻtarish borasida Prezidentimiz nutq soʻyladilar va bu borada amalga oshirilishi lozim boʻlgan chora-tadbirlarga keng toʻxtaldilar, globallashuv jarayoni shiddat bilan kechayotgan tinchlik-osoyishtaligimizga tahdidlar tobora kuchayayotgan, vaziyatda aynan millat fidoyilari - uygʻoq qalbli ziyolilar, shoir va adiblar, sanʼat namoyandalari, maʼnaviyat va maʼrifat sohasi xodimlari jasorat bilan maydonga chiqishi zarurligini taʼkidladilar.

Ushbu topshiriqlar ijrosini taʼminlash maqsadida respublikamizning barcha hududlarida “Yangi hayot uchun, yangi Oʻzbekiston uchun” shiori ostida “Mahallada duv-duv gap” targʻibot tadbirlari oʻtkazilmoqda. Tadbirlarda yangi Oʻzbekistonni bunyod etish yoʻlida amalga oshirilayotgan keng koʻlamli islohotlar, erishilayotgan yutuqlar xalqimizga yetkazilib, ularning koʻnglida Vatan taqdiriga daxldorlik hissini yuksalitirishga , faolligini oshirishga erishilmoqda.

Joriy yilning 4-yanvarida Amudaryo tumani Madaniyat boʻlimi tomoshalar zalida ushbu yoʻnalishda “Mahallada duv-duv gap” deb nomlangan maʼnaviy-maʼrifiy, madaniy tadbir oʻtkazildi.

Tadbirda Respublika Maʼnaviyat va maʼrifat markazi tuman boʻlinmasi boshligʻi Islom Matkarimov, Qoraqalpoq Davlat universiteti professori Jubatqan Sagʻindiqov, tuman hokimi oʻrinbosari, oila va xotin-qizlar boʻlimi boshligʻi Goʻzal Soburova, Oʻzbekiston Yozuvchilar uyushmasi aʼzosi, taniqli ijodkor, taʼlim faxriysi Tursunboy Abdullayev, “Yusuf Eshon bobo” jomʼe masjidi imom xatibi Abdurahmon Matsapayev, tumandagi xavaskor ijodkorlar, faol nuroniylar, fuqarolar yigʻinlari xotin-qizlar faollari, yoshlar yetakchilari ishtirok etdilar.

Tadbirda Goʻzal Soburova, Jubatqan Sagʻindiqov, Tursunboy Abdullayev, Abdurahmon Matsapoyevlar maʼnaviyat va maʼrifatning maʼno-mazmuni, uning inson va jamiyat hayotidagi oʻrni, ahamiyati xususida, xalqimiz maʼnaviyatini yuksaltirish, ayniqsa, yosh avlodning qalbi va ongini turli zararli gʻoya va mafkuralar taʼsiridan saqlash borasida maʼruzalar qildilar.

Maʼruzalarda Prezident rahbarligida oʻtkazilgan videoselektor yigʻilishida milliy gʻoyani rivojlantirish, ayollarning taʼlim olishi va kasb-hunar egallashiga eʼtiborni kuchaytirish, maʼnaviyat va maʼrifat maskanlari, madaniyat markazlarini ishga tushirish, teatr va kino sanʼatini rivojlantirish borasida qator tashabbuslar ilgari surilgani alohida eʼtirof etildi.

Haqiqatan ham, Prezidentimiz taʼkidlaganlaridek, jahon miqyosida taraqqiyot surʼatlari shiddatli tus olgan, oʻta ziddiyatli jarayonlarning taʼsiri mamlakatimizda ham sezilayotgan bir vaqtda maʼnaviyatga, maʼrifatga yuksak eʼtibor qaratish har qachongidan ham muhimdir.

Yigʻilganlar maʼruzalar orasida tuman Madaniyat boʻlimiga qarashli ijodiy jamoalar vakillari ijrosida milliy merosimiz boʻlgan xalq qoʻshiqlari va raqslarini maroq bilan tomosha qildilar.

Tadbir bunday tarzda tashkil etilgani bejiz emas. Boisi sanʼatkorlar, yozuvchi, shoirlar, ziyolilar aynan maʼnaviy tarbiya targʻibotchilari hisoblanishadi.

“Yangi hayot uchun, Yangi Oʻzbekiston uchun” gʻoyasini ifoda etgan “Mahallada duv-duv gap” maʼnaviy-maʼrifiy, madaniy targʻibot tadbiri barcha ishtirokchilarda ulkan taassurotlar qoldirdi.

Oygul RAJABOVA.