Jamoat ishlari aholi bandligini, shahrimiz va koʻchalarimiz ozodaligini taʼminlashga xizmat qilayapti

Taʼkidlash joizki, mamlakatimizda iqtisodiyotni isloh qilish, eksport salohiyatini oshirish, tashqi investitsiyalarni jalb qilish, tadbirkorlarni qoʻllab quvvatlash, kichik biznes va xususiy tadbirkorlikni jadal rivojlantirishni ragʻbatlantirish va shu kabi boshqa islohotlar natijasida har yili minglab yangi ish oʻrinlari yaratilmoqda. Bu oʻz navbatida oʻta dolzarb muammo hisoblangan aholi, avvalambor yoshlar bandligini taʼminlash imkonini bermoqda.

 Maʼlumki, 2017-yil 24-mayda Oʻzbekiston Respublikasi Prezidentining “Bandlik sohasida davlat siyosatini yanada takomillashtirish va mehnat organlari faoliyati samaradorligini tubdan oshirish chora-tadbirlari toʻgʻrisida”gi Farmoni va shu yilning 12-sentyabr sanasida “Aholining kam taʼminlangan qatlamlarini qoʻllab-quvvatlashga oid qoʻshimcha chora-tadbirlar toʻgʻrisida”gi Prezident qarori qabul qilinib, aholi bandligini taʼminlash borasidagi ishlarni yangi bosqichga koʻtargan edi.

Shuningdek, Vazirlar Mahkamasining “Oʻzbekiston Respublikasi Bandlik va mehnat munosabatlari vazirligi huzuridagi Jamoat ishlari jamgʻarmasi faoliyatini tashkil etish toʻgʻrisida”gi qarori asosida ishsiz aholini bosqichma-bosqich jamoat ishlariga jalb etish rejasi tasdiqlandi.

Ushbu qonunchilik hujjatlari ijrosi natijasida qishloq va olis tumanlardagi band boʻlmagan fuqarolarni ovul va mahallalarni obodonlashtirish, ariqlarni tozalash, yoʻllar va koʻchalarni taʼmirlash va shu kabi boshqa haq toʻlanadigan jamoat ishlariga jalb etish orqali aholi bandligi taʼminlanib, oilalarga qoʻshimcha daromad manbalari yaratilmoqda.

Amudaryo tumani Kambagʻallikni qisqartirish va bandlikka koʻmaklashish boʻlimiga joriy yilning yanvar-aprel oylari davomida jami 1752 nafar fuqaro ish soʻrab murojaat qilgan. Boʻlim tomonidan 1453 nafar fuqaroga doimiy ishlash uchun, 241 nafar fuqaroga esa jamoatchilik asosida ishlash uchun yoʻllanmalar berilgan. Bugungi kunda jamoat ishlariga jalb qilingan fuqarolarning 126 nafari ish yurituvchi, 112 nafari esa obodonlashtirish xodimi vazifasida faoliyat yuritmoqda. Ularning ish haqlari belgilangan tartibda Jamoat ishlari jamgʻarmasi tomonidan toʻlab kelinmoqda.

Amaldagi tartibga koʻra, vaqtincha ishsiz fuqarolar jamoat ishlariga jalb etilganda bajargan ishi uchun rasman maosh olishadi. Haq toʻlanadigan jamoat ishlariga byudjet tashkilotlari va fuqarolarning oʻzini oʻzi boshqarish organlari tomonidan jalb qilingan ishsiz va band boʻlmagan shaxslarga ish haqining 100 foizi, boshqa tashkilotlar, tadbirkorlik subʼektlari, nodavlat tashkilotlari tomonidan jalb qilingan shaxslarga esa ish haqi 50 foizi Jamoat ishlari jamgʻarmasi mablagʻlari hisobidan qoplanadi.

Shuni taʼkidlash lozimki, jamoat ishlari – tashkilotlar, xoʻjaliklar va muassasalarda yuqori malaka talab qilmaydigan va mavsumiy, vaqtinchalik, haq toʻlanadigan ishlar hisoblanadi. Jamoat ishlari mavsumiy, hududiy yoki aholining alohida toifalarini qamrab olgan holda mahalliy davlat hokimiyati organlari tomonidan tashkil etiladi. Jamoat ishlari aksariyat hollarda vaqt jihatidan qisqa davom etib, alohida ixtisoslikni talab qilmaydi.

Ish bilan taʼminlanmagan va jamoat ishlarida mehnat qilish istagidagi fuqarolar ish soʻrab Amudaryo tumani Kambagʻallikni qisqartirish va bandlikka koʻmaklashish boʻlimiga murojaat etishlari mumkin. Boʻlim tomonidan doimiy tashkil qilib kelinayotgan boʻsh ish oʻrinlari “Mehnat yarmarkasi” ham aholi bandligini taʼminlashda muhim omil boʻlib kelmoqda.

Shahrimiz va koʻchalarimiz ozodaligi yoʻlida mehnat qilayotgan yutdoshlarimizga quch-quvvat tilaymiz. Ularning ogʻir mehnatlari sabab atrof-muhit obod va tabiatimiz koʻrkam qiyofa kasb etayapti.

Shohzod Qurbonboyev