Aholi xonadonlarida favqulodda holatlarning oldini olish maqsadida tushuntirish-targʻibot ishlari amalga oshirilmoqda

Mamlakatimizda aholi farovonligini oshirish, munosib sharoitlarda yashashlarini taʼminlashga qaratilgan saʼy-harakatlar tufayli qishloq va mahallalardagi aholi xonadonlari tobora obod va koʻrkam qiyofa kasb etmoqda. Ayniqsa, mutasaddi tashkilotlar masʼullarining oʻzaro hamkorligi bois, eng chekka hududlardagi xonadonlarda oʻtkazilayotgan nazorat tadbirlari oʻzining ijobiy samarasini bermoqda.

Chunki ana shunday nazorat tadbirlari doirasida aholi xonadonlarining kuz-qish mavsumiga tayyorgarligi, isitish tizimlarining qay darajada sozligi, shu bilan birga favqulodda vaziyatlar yuz bergan taqdirda himoya vositalari bilan taʼminlanganlik holatlari oʻrganilib, aholi oʻrtasida keng tushuntirish ishlari amalga oshirilmoqda. Zarur paytlarda esa amaliy yordamlar ham koʻrsatilmoqda.

Ana shunday targʻibot-tashviqot maqsadidagi nazorat tadbirlaridan biri joriy yilning Mangʻit shahrining Chordara mahallasida ham oʻtkazildi. Unda Qoraqalpogʻiston Respublikasi Favqulodda vaziyatlar boshqarmasi boshligʻining oʻrinbosari, polkovnik Mahmud Seydullayev, Amudaryo tumani hokimining oʻrinbosari Bahodir Ernazarov, Favqulodda vaziyatlar boʻyicha Amudaryo tuman boʻlimi boshligʻi kapitan Zafar Ahmedovlar hamda favqulodda vaziyatlar boʻyicha tumanda faoliyat olib boruvchi ishchi guruh aʼzolari ishtirok etishdi.

Tadbirda masʼullar Qoraqalpogʻiston Respublikasi Vazirlar Kengashining 2024-yil 21-may kungi farmoyishi ijrosini taʼminlash maqsadida tumandagi ovul va mahallalar hududlaridagi barcha turar joylarda mavjud boʻlgan isitish qozonlari, agar uy ichkarisida joylashtirilgan boʻlsa, ularni tashqariga oʻrnatish boʻyicha rejaga muvofiq olib borilayotgan ishlar bilan yaqindan tanishdilar.

Tadbir davomida masʼullar Chordara mahallasining Ozodlik koʻchasida istiqomat qiluvchi xonadon egalari bilan uchrashib, kuz-qish mavsumiga tayyorgarlik koʻrish, isitish qozonxonalarining sozligi, qozonxonalardagi havo almashish uskunalarining texnik holati, shuningdek, moʻrilarning qay darajada talabga mosligi, favqulodda vaziyatlar sodir boʻlganda amal qilish lozim boʻlgan birlamchi vazifalar yuzasidan fuqarolarga zarur tavsiyalar, tushunchalar berdilar.

Ayni paytda Amudaryo tumani hududida 2024-2025-yillar kuz-qish mavsumi davrida turli koʻrinishdagi favqulodda vaziyatlarning oldini olish maqsadida yakka tartibdagi hamda koʻp qavatli uylarda ikki konturli isitish qozonlarini oʻrnatish va ularning samaradorligi, xavfsizlikni taʼminlash borasidagi alohida afzalliklari yuzasidan aholi va tadbirkorlik subʼektlari oʻrtasida keng tushuntirish ishlari ham olib borilmoqda.

Amalga oshirilayotgan bu kabi tadbirlar tufayli tumanning barcha hududlarida istiqomat qiluvchi aholi oʻz xonadonlaridagi isitish tizimlari va qozonxonalarini kuz-qish mavsumiga tayyorlab, uy ichkarisiga oʻrnatilgan qozonxonalarni xonadon tashqarisiga, xavfsiz joyga oʻrnatish ishlarini amalga oshirmoqda. Koʻrilayotgan barcha chora-tadbirlar aholini favqulodda vaziyatlarda ishonchli himoya qilishga qaratilgani bilan muhim ahamiyat kasb etmoqda. Bunday tadbirlar aholining mavsumiy sharoitlarga moslashishi va ularning turmush sifatini yanada yaxshilashga qaratilgani bilan ham ahamiyatlidir. Muhimi, bu kabi tadbirlar aholi oʻrtasida mavsumiy muammolarning hamda turli noxush holatlarning oldini olish, favqulodda holatlar sodir boʻlganda ularga tezkor yordam koʻrsatish imkonini beradi.

Robiya Yoʻldosheva.