Amudaryo tumani xotin-qizlar hunarmandchilik va tadbirkorlik markazining ochilish marosimi boʻlib oʻtdi

Joriy yilning 30-iyul kuni Amudaryo tumani xotin-qizlar hunarmandchilik va tadbirkorlik markazining ochilish marosimi boʻlib oʻtdi. Marosimda Oʻzbekiston Respublikasi Bosh vaziri oʻrinbosari Zulayho Mahkamova, Qoraqalpogʻiston Respublikasi Vazirlar Kengashi Raisi oʻrinbosari, Oila va xotin-qizlar qoʻmitasi raisi Maryam Ahmedova, tuman hokimi Sobir Xoʻjametov, sektorlar rahbarlari, tumani hokimi oʻrinbosari, Oila va xotin-qizlar boʻlimi boshligʻi Goʻzal Saburova, “Nuroniy” jamgʻarmasi tuman boʻlimi raisi Bekman Allaberganov, qoʻshni tumanlarning Oila va xotin-qizlar boʻlimi boshliqlari, tuman xotin-qizlar faollari, tadbirkor va hunarmand xotin-qizlar ishtirok etdilar.

Ochilish marosimida Oʻzbekiston Respublikasi Bosh vaziri oʻrinbosari Zulayho Mahkamova bugungi kunda xotin-qizlarni har tomonlama qoʻllab-quvvatlash, ularning huquq va manfaatlarini himoya qilish, hayotda va jamiyatda oʻz oʻrnini topishga yordam berish borasida amalga oshirilayotgan tub islohotlar xususida toʻxtalib oʻtdi.

Bosh vazir oʻrinbosari oʻz soʻzida mamlakatimizda xotin-qizlarning ijtimoiy-siyosiy faolligini oshirish, ularning turli soha va tarmoqlarda oʻz qobiliyat va imkoniyatlarini roʻyobga chiqarishi uchun shart-sharoit yaratish, huquq va qonuniy manfaatlariga soʻzsiz rioya qilinishini taʼminlash, onalik va bolalikni har tomonlama qoʻllab-quvvatlash, shuningdek, oila institutini mustahkamlash borasida keng koʻlamli ishlar amalga oshirilayotganini taʼkidladi.

Shuningdek, tuman hokimi Sobir Xoʻjametov tumanda xotin-qizlar bandligini taʼminlash, ularning daromad topishlari uchun koʻmak berish, ijtimoiy himoyaga muhtoj xotin-qizlarni qoʻllab-quvvatlash borasida olib borilayotgan ishlarga toʻxtaldi.

Ochilish marosimi tuman Madaniyat boʻlimi tomonidan tayyorlangan ajoyib kuy-qoʻshiqlar hamda betakror raqslar bilan yuqori kayfiyatda davom etdi.

Shu oʻrinda maʼlumot tariqasida aytish joizki, mazkur xotin-qizlar hunarmandchilik va tadbirkorlik markazida toʻrtta yoʻnalishda xotin-qizlar kasb-hunarga oʻqitiladi. Bular IT yoʻnalishi, hunarmandchilik, pazandachilik, tikuvchilik yoʻnalishlari boʻlib, xotin-qizlar oʻzlari qiziqqan yoʻnalishlarda tajribali mutaxassislar tomonidan bilimlar oladilar hamda sertifikatga ega boʻladilar.

Hududlarda tashkil etilayotgan bu kabi xotin-qizlar hunarmandchilik va tadbirkorlik markazlari xotin-qizlarning huquq va qonuniy manfaatlarini himoya qilish, ularning iqtisodiy, ijtimoiy va siyosiy faolligini oshirish, sogʻligʻini saqlash, kasbga oʻqitish va bandligini taʼminlash, tadbirkorlikka keng jalb etish, ehtiyojmand xotin-qizlarni ijtimoiy qoʻllab-quvvatlash kabi ustuvor maqsadlarga xizmat qiladi.

Qayd etish joizki, Oʻzbekiston Respublikasi Prezidentining “Oila va xotin-qizlarni tizimli qoʻllab-quvvatlashga doir ishlarni yanada jadallashtirish chora-tadbirlari toʻgʻrisida”gi hamda “Oila va xotin-qizlar bilan ishlash, mahalla va nuroniylarni qoʻllab-quvvatlash tizimini takomillashtirish chora-tadbirlari toʻgʻrisida”gi Farmonlari, “Xotin-qizlarni qoʻllab-quvvatlash, ularning jamiyat hayotidagi faol ishtirokini taʼminlash tizimini yanada takomillashtirish chora-tadbirlari toʻgʻrisida”gi qarori bu boradagi ishlarni yangi bosqichga olib chiqishda ustuvor ahamiyat kasb etmoqda.

Charos Arslonova, tuman hokimligining Axborot xizmati rahbari.