Yoʻllarda harakatlanish xavfsizligini taʼminlash maqsadida yoʻl yotiq chiziqlari va piyodalar oʻtish joylaridagi chiziqlar qayta chizilmoqda
Oʻzbekiston Respublikasi Ichki ishlar vazirligi tashabbusi bilan joriy yilning 3-avgust kunidan 5-sentyabr kuniga qadar mamlakatimizda “Xavfsiz hudud va mulkiy turdagi jinoyatlar profilaktikasi oyligi” doirasida maxsus profilaktik tadbirlarni oʻtkazish belgilangandi.
Yoʻl-transport hodisalarining oldini olish hamda fuqarolarning xavfsizligini taʼminlash maqsadida mazkur oylik doirasida Amudaryo tumanida yoʻl infratuzilmasini yaxshilash yuzasidan bir qator chora tadbirlar amalga oshirilmoqda. Jumladan, yoʻl yotiq chiziqlarini qaytadan chizish, piyodalarning erkin va xavfsiz harakatini taʼminlash choralari koʻrilmoqda. Shuningdek, joylarda aholi bilan uchrashuvlar tashkil qilinib, yoʻl-harakati qoidalariga amal qilish lozimligi, qoidabuzarliklar oqibatida koʻplab yoʻl-transport hodisalari sodir boʻlayotganligi tushuntirilmoqda.
Soʻnggi yillarda mamlakatimizda yoʻl-transport hodisalarining oldini olish borasida koʻplab chora-tadbirlar amalga oshirildi. Ammo achinarli jihati shundaki, ayrim haydovchilar tomonidan yoʻl harakati qoidalarini buzish holatlari koʻplab kuzatilmoqda. Mavjud yoʻl-transport hodisalarining oldini olishda barcha yoʻl harakati qatnashchilarida yuksak huquqiy madaniyatni shakllantirish muhim ahamiyatga ega.
Maʼlumotlarga koʻra, sodir etilgan yoʻl-transport hodisalari asosan haydovchilarning yoʻl harakati qoidalariga eʼtibor bermasligi oqibatida kelib chiqmoqda. Mazkur jarayon tahlil qilinganida, afsuski, halok boʻlganlarning aksariyati xavfsizlik kamarini taqmaganligi maʼlum boʻlgan. Shuningdek, yoʻl-transport hodisalari transport vositasini haydovchilik guvohnomasiga ega boʻlmay boshqarish, belgilangan tezlikni oshirish, mast holda rulga oʻtirish oqibatida sodir etilmoqda.
Uchrashuvlarda aholiga haydovchilik madaniyatini oshirish, yoʻl harakati qoidalariga amal qilish lozimligi va oʻzboshimchalik ortidan yuzaga kelayotgan koʻngilsiz hodisalar oqibati toʻgʻrisida batafsil axborot berilmoqda.
Shu kunlarda yoʻl infratuzilmasini yaxshilash va harakat xavfsizligini taʼminlash maqsadida Qoraqalpogʻiston Respublikasi Ichki ishlar vazirligi jamoat xavfsizligi xizmati Yoʻl harakati xavfsizligi boshqarmasining ekspluatatsiya-montaj boʻlimi hamda tuman Yoʻl harakati xavfsizligi boʻlimi xodimlari tomonidan Amudaryo tumanidagi asosiy va serqatnov koʻchalarda yoʻl yotiq chiziqlari va piyodalar oʻtish joylaridagi chiziqlarni qaytadan chizish ishlari amalga oshirilmoqda. Piyodalar oʻtish joylaridagi chiziqlarning yangilanishi natijasida yoʻlovchi va transport vositalarining erkin hamda xavfsiz harakatlanishi taʼminlanyapti.
Maʼlumki, piyodalar harakatlanish vaqtida oʻrtacha ikki-uch marta yoʻlni kesib oʻtadilar. Ularning yoʻllarni kesib oʻtishida harakatlanish qulayligi va xavfsizligini taʼminlash soha xodimlarining asosiy vazifalaridan biri hisoblanadi. Shu sababli, yoʻl yotiq chiziqlari va piyodalar oʻtish joylaridagi chiziqlarni qayta boʻyash ishlari belgilangan tartibda doimiy amalga oshiriladi.
Maʼlumot oʻrnida, yoʻlning qatnov qismidagi chiziqlar, yozuvlar va boshqa belgilar yoʻl ishtirokchilariga yoʻl boʻlagida harakatlanish sharoitlari va usullari toʻgʻrisida axborot beradi. Yotiq chiziqlar asosan harakatlanish tartibini belgilaydi hamda oq va sariq rangda boʻyaladi.
Shu oʻrinda aytib oʻtishimiz joizki, yoʻllarda harakatlanish vaqtida yoʻl harakati qoidalariga qatʼiy amal qilish orqali oʻzingizning hamda atrofdagi insonlar hayotini asragan hisoblanamiz. Zero yoʻllar manzillarga eltish uchun xizmat qiladi.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
