“Qishloq joylarni barqaror rivojlantirish” loyihasi – amalda

Mamlakatimizda aholi farovonligini taʼminlash, insonlarning turmush sharoitlarini tubdan oʻzgartirish, qishloqlarda ham shahardan qolishmaydigan zamonaviy sharoitlarni yaratish borasida keng koʻlamli islohotlar amalga oshirilmoqda. Qishloq aholi punktlarining meʼmoriy qiyofasini tubdan yangilash, hududlarni kompleks rivojlantirish, yoʻl-transport infratuzilmasi, muhandislik-kommunikatsiya tarmoqlari va ijtimoiy soha obʼektlarini barpo etish orqali aholining turmush madaniyatini yuksaltirish maqsadida 2021-yilning 18-sentyabrda imzolangan Oʻzbekiston Respublikasi Prezidentining “Islom taraqqiyot banki va OPEK xalqaro taraqqiyot jamgʻarmasi ishtirokida “Qishloq joylarni barqaror rivojlantirish” loyihasini amalga oshirish chora-tadbirlari toʻgʻrisida”gi qarori bu boradagi ishlarda muhim dasturulamal boʻlib xizmat qilmoqda.

Ushbu loyiha asosida Amudaryo tumanida ham keng koʻlamli bunyodkorlik ishlar olib borilmoqda. Loyiha bilan tumanimizda jami 12 ta yangi zamonaviy obʼektlarni qurish va ishga tushirish belgilangan. Xususan, Farovon mahallasi markazida 90-oʻrinli maktabgacha taʼlim tashkiloti, Olmazor mahallasi hududidagi Birdamlik va Yangibogʻ koʻchalari tutashgan oʻrinda 120-oʻrinli maktabgacha taʼlim tashkiloti, Arna boʻyi mahallasi Pokizalik koʻchasida 150-oʻringa moʻljallangan yangi maktabgacha taʼlim tashkiloti binolari yangidan barpo etilmoqda. “Zamin qurilish trans servis” MChJ pudratchi tashkiloti tomonidan ushbu obʼektlarning qurilish ishlari jadal surʼatlar bilan olib borilmoqda.

Shuningdek, Doʻstlik mahallasi Chamanzor koʻchasida 240-oʻrinli yangi maktabgacha taʼlim tashkiloti, Oʻrta qalʼa hamda Toshyop ovullari hududlarida 3 qavatdan iborat maishiy xizmat koʻrsatish markazi, shuningdek, Tosh yop ovuli hududida kuniga 50 ta tashrifga moʻljallangan yangi qishloq vrachlik punkti binolarini qurish rejalashtirilgan boʻlib, qurilish ishlari boshlab yuborilgan.

Maʼlumot oʻrnida aytish joizki, Prezident qarorida Islom taraqqiyot banki va OPEK xalqaro taraqqiyot jamgʻarmasidan  20-yil muddatga, 5 yillik imtiyozli davr bilan 75 mln AQSh dollari miqdorida qarz jalb qilinishi koʻzda tutilgan.

Shuningdek, qarorda “Qishloq joylarni barqaror rivojlantirish” loyihasining amalga oshirilishida Birlashgan millatlar tashkiloti Taraqqiyot dasturining Oʻzbekistondagi vakolatxonasi loyihani amalga oshirish davrida masʼul ijro etuvchi organning hamkori sifatida faoliyat koʻrsatishi va u tomonidan loyiha uchun 3,05 mln AQSh dollari miqdorida grant mablagʻi ajratilishi, loyihani amalga oshirishda Oʻzbekiston Respublikasining ulushi 59,95 mln AQSh dollari miqdoridagi mablagʻlardan iborat boʻlishi qayd etilgan.

“Qishloq joylarni barqaror rivojlantirish” loyihasi Qoraqalpogʻiston Respublikasi, Buxoro, Navoiy va Xorazm viloyatlarining 20ta tumanidagi 170ta qishloq va mahalla, shundan 40ta markaziy, 130ta yondosh mahallalarni qamrab olishi belgilangan boʻlib, loyiha 2021-2025-yillarda amalga oshiriladi.

Charos Arslonova, tuman hokimligining Axborot xizmati rahbari.