Energiya resurslaridan samarali foydalanish masalasida Prokuratura organlari tomonidan oʻrganishlar oʻtkazilmoqda

“Boʻladigan ishga egasi sababchi”, deyishadi. Mantiqan olib qaraydigan boʻlsak, har kimning hayotida yuz beradigan noxushliklar, avvalo, eʼtiborsizlik, sustkashlik, qolaversa yashash xonadonida yoritish va issiqlik energiyasi, yoqilgʻi resurslari bilan bogʻliq uskunalardan hamda oʻz ixtiyoridagi transport vositalaridan foydalanishdagi xatoliklari tufayli sodir boʻladi. Ayniqsa, bu kabi holatlar kuz-qish mavsumida koʻproq kuzatiladi.

Mamlakatimizning turli hududlarida, xususan, Qashqadaryo, Toshkent, Buxoro va Fargʻona viloyatlarida tabiiy gaz tarmogʻiga taqiqlangan uskunalar orqali ulanish, avtomobillarga gaz quyish shoxobchalarida belgilangan texnika xavfsizligi qoidalariga amal qilmaslik oqibatida yuz bergan insonlar oʻlimi bilan bogʻliq fojialar bu borada nafaqat soha xodimlari, balki xalqimizni ham har lahzada ogoh yashashga daʼvat etadi.

Yuqoridagi kabi koʻngilsiz hodisalarga oʻz vaqtida barham berish, qish mavsumini betalafot oʻtkazish, jismoniy va yuridik isteʼmolchilarni yoqilgʻi-energiya resurslari bilan uzluksiz taʼminlash, energiya resurslarini iqtisod qilish hamda talon-torojliklarning oldini olish bilan bogʻliq masalalarni oʻrganish maqsadida Qoraqalpogʻiston Respublikasi prokurorining oʻrinbosari Sherzod Muxamatov Amudaryo tumanida boʻlib, ayni kundagi vaziyat bilan yaqindan tanishdi.

Xususan, Sherzod Muxamatov rahbarligida soha mutaxassislari tomonidan “Hududiy elektr tarmoqlari” aktsiyadorlik jamiyatiga qarashli Amudaryo tuman elektr taʼminoti korxonasi va “Hududgaz Qoraqalpogʻiston” aktsiyadorlik jamiyatiga qarashli “Amudaryo tumangaz” gaz taʼminoti boʻlimining dispetcherlik xizmatlari, isteʼmolchilar murojaatlarini qabul qilish markazlari, avtomobillarga siqilgan gaz quyish kompressor shoxobchalariga gaz tarqatish stantsiyasi hamda tabiiy gaz saqlash zaxira omborining holati mufassal oʻrganildi.

Oʻrganishlar jarayonida energiya resurslaridan noqonuniy foydalanish holatlarini, ayniqsa, yirik talon-tarojliklarni barvaqt aniqlash ishlarini yanada kuchaytirish boʻyicha topshiriqlar va zarur tavsiyalar berildi.

Shuningdek, oʻrganishlar jarayonida isteʼmolchilarga tabiiy gaz yetkazib berishda yoʻqotishlarning oldini olish hamda resurslarni muhofaza qilishda, eng avvalo, texnik infratuzilmani doimiy nazorat qilib borish, xususan, gaz quvurlaridan har qanday gaz sizib chiqish holatini tezkor bartaraf qilish, eskirgan va zanglagan gaz quvurlarini oʻz vaqtida almashtirish zarurligi eslatib oʻtildi.

Bugungi kunda har bir xonadon va korxonada zamonaviy gaz hisoblagichlar oʻrnatilgan boʻlib, ularni doimiy texnik koʻrikdan oʻtkazib turish hamda texnik xizmat koʻrsatish, tabiiy gaz tarmogʻiga noqonuniy ulanishlarning oldini olishga qaratilgan nazorat tadbirlarini muntazam ravishda oʻtkazib borish, noqonuniy ulanish holatlari aniqlanganda qoidabuzarlarga qatʼiy huquqiy choralar koʻrish lozimligi taʼkidlandi.

Bu borada aholining xabardorligini oshirish maqsadida tabiiy gaz va elektr energiyasi resurslaridan xavfsiz va samarali foydalanish, tarmoqlarga noqonuniy ulanishning oqibatlari haqida zarur tushunchalar berish, ayniqsa, qish mavsumida bu boradagi targʻibot ishlarini samarali tashkil etish, isteʼmolchilar uchun oʻquv mashgʻulotlari oʻtkazish zarurligi qayd qilindi.

Oʻrganishlar jarayonida soha mutaxassislariga tejamkorlikning ahamiyati, tabiiy resurslarni muhofaza qilish maqsadida aholining isteʼmol madaniyatini oshirish yuzasidan ham tavsiyalar ham berildi.

Robiya Yoʻldosheva