“Mahalla yettiligi” faoliyatiga oid yigʻilish oʻtkazildi

Xabaringiz bor, davlatimiz rahbarining tegishli topshirigʻi bilan mahallalarda “yettilik” faoliyati yoʻlga qoʻyilgan. Shuningdek, ularga bir qator vazifalar yuklangan. Albatta, har bir ishda ishtiyoq, harakat, natija va sarhisob boʻladi. Joylarda “Mahalla yettiligi” ish boshlagan mana shu qisqa vaqt oraligʻida ularning amalga oshirgan ishlari va saʼy-harakatlari, yutuqlari, natijalari talaygina.

Amudaryo tumani hokimligining majlislar zalida mahalla fuqarolar yigʻinlari raislari, hokim yordamchilari, xotin-qizlar faollari, yoshlar yetakchilari, profilaktika inspektorlari, soliq inspektorlari va ijtimoiy xodimlar ishtirokida 2024-yilda amalga oshirilgan ishlar hisoboti va kelgusi yil rejalariga bagʻishlangan Mahallani qoʻllab-quvvatlash kengashi yigʻilishi boʻlib oʻtdi.

Yigʻilishda tuman hokimi Sobir Xoʻjametov ishtirok etdi.

Tahliliy va tanqidiy ruhda oʻtkazilgan yigʻilishda hokim oʻrinbosarlari va tegishli tashkilotlar rahbarlarining hisobotlari muhokama etildi, mavjud kamchiliklarni bartaraf qilish yuzasidan kelgusi yilga moʻljallangan vazifalar belgilab olindi. Shuningdek, tadbir mobaynida samarali faoliyat olib borayotgan fuqarolar yigʻinlari raislari ragʻbatlantirildi.

Oʻtgan 2024-yilda birgina xotin-qizlarni qoʻllab-quvvatlash hamda ularning bandligini taʼminlash borasida amalga oshirilgan saʼy-harakatlarga toʻxtalib oʻtadigan boʻlsak, tumanda shu kungacha 5-bosqich “Ayollar daftari”ga kiritilgan 5 ming 600 nafar xotin-qizlarning 5 ming 525 nafariga, yaʼni 98 foizdan ortiq qismiga ijtimoiy yordamlar koʻrsatilib, ijtimoiy himoyaga muhtoj boʻlgan, ishsiz 2 ming 258 nafar ehtiyojmand xotin-qizlarning barchasining bandligi taʼminlangan. 1 ming 564 nafar xotin-qizlar doimiy ishga joylashtirilgan, 36 nafar xotin-qizlar vaqtinchalik jamoat ishlariga jalb etilib, 72 nafar ayol-qizlar kasb-hunarga oʻqitilgan. Shu bilan birga, mustaqil ravishda ishga joylashganlar va oʻzini -oʻzi band qilgan ayollar soni 586 nafarni tashkil etgan.

Ayol ishbilarmon va oʻz ustida tinimsiz ishlaydigan, mehnatsevar boʻlsa bunday onaning farzandlari ham tirishqoq, intiluvchan avlod boʻlib kamol topadi. Barcha aʼzolari qandaydir foydali mashgʻulot bilan shugʻullanadigan tadbirkor oilada esa farovonlik hukm suradi. Boisi, hamma foydali ish bilan band boʻlgan xonadonda urush-janjallar kamroq boʻladi. Ha, tadbirkorlikning yana bir ahamiyatli jihati ham shunda.

Joriy yilda tumanda tadbirkorlik qilish istagini bildirgan 652 nafar xotin-qizlardan 594 nafariga 3 mlrd 530 mln soʻm miqdorida kredit ajratilgan va ularning tadbirkorligini yoʻlga qoʻyishlariga koʻmaklashilgan.

Shuningdek, bir martalik moddiy yordamga muxtoj boʻlgan, jami 2 ming 653 nafar xotin-qizlarga “Ayollar daftari” jamgʻarmasi tomonidan 3 mlrd soʻmdan ortiq bir martalik moddiy yordam koʻrsatilgan. Shu bilan birga, uy-joyi taʼmirga muxtoj 4 nafar ehtiyojmand xotin-qizlarning uy-joyida homiylik hisobidan taʼmirlash ishlari amalga oshirilgan. 5 nafar xotin-qizlar esa uy-joy bilan taʼminlangan. Endilikda ular shinam uy-joylarda yashab, yurtimizda ayol-qizlarga boʻlgan eʼtibordan mamnun holda yashamoqdalar.

Shuningdek, qaramogʻida nogironligi boʻlgan farzandi mavjud 404 nafar ehtiyojmand xotin-qizlarning barchasiga “Ayollar jamgʻarmasi” tomonidan bazaviy hisoblash miqdorining 4 barobari miqdorida bir martalik moddiy yordamlar koʻrsatildi. Ushbu maqsadlar uchun jami 542 mln 640 ming soʻm mablagʻ yoʻnaltirilgan.

Oramizda dehqonchilik qilishga qiziqishi boʻlgan, dehqonchilik orqasidan daromad topayotgan ayol-qizlar soni kundan-kunga koʻpaymoqda. Bu orqali ular ham bandligini taʼminlab, ham oilasiga qoʻshimcha daromad olib kiradilar. Shu maqsadda, tumanimizda tomorqadan unumli foydalanish uchun 19 nafar ehtiyojmand xotin-qizlarning barchasiga hududlardagi fermer xoʻjaliklari biriktirilib, fermer xoʻjaliklari rahbarlari tomonidan homiylik yordamlari sifatida pomidor, bodring va boshqa turli xildagi poliz ekinlari koʻchatlari tarqatilgan. Mavsumda ushbu ekinlar hosilga kirib, oilalar dasturxonining toʻkin boʻlishiga hissa qoʻshgan.

Yigʻilish davomida “Mahalla yettiligi”ning barcha yoʻnalishlar boʻyicha ham shu kabi hisobotlar taqdim etildi. Yutuqlar eʼtirof etilib, kamchiliklar tahlil qilindi. Kelgusida bajarilishi lozim boʻlgan bir qator vazifalar belgilab olinib, topshiriqlar ijrosi doimiy nazoratda ekanligi taʼkidlandi.

Aziza Madrahimova