“Vatanparvarlik” oyligi doirasida tashkil etilayotgan tadbirlar yoshlarni harbiy-vatanparvarlik ruhida tarbiyalashga xizmat qiladi

13-yanvar kuni Qilichboy ovulidagi Chegarani qoʻriqlash vzvodida “Vatanparvarlik” oyligi doirasida “Ochiq eshiklar kuni” tadbiri boʻlib oʻtdi. Tadbirda tuman Mudofaa ishlari boʻlimi boshligʻi mayor Shuhrat Mamatov, Qurolli kuchlar ishchi xizmatchisi Qurolboy Haytboyev, vzvodning tarbiyaviy va maʼnaviy ishlar boʻyicha yoʻriqchisi, serjant Rustam Vahobov, muddatli harbiy xizmatchilar va 69-, 70-, 83-sonli umumtaʼlim maktablarining 9-, 11-sinf oʻquvchilari faol ishtirok etdi.

Tadbirning asosiy maqsadi ­– yoshlar qalbida ona-Vatanga boʻlgan muhabbat va sadoqat tuygʻusini mustahkamlash, yigitlarning kelajakda harbiy xizmatni tanlashga boʻlgan qiziqishini oshirishga xizmat qilishdir.

Tadbirni tuman Mudofaa ishlari boʻlimi boshligʻi mayor Shuhrat Mamatov ochib berdi. U oʻz nutqida milliy armiyaning kuch-qudrati, uning jamiyatimiz hayotidagi oʻrni va ahamiyati haqida toʻxtalib oʻtdi. Shu bilan birga, yigitlar hayotida harbiy xizmatning oʻrni, mardlik va vatanparvarlikning inson shaxsiyati shakllanishidagi ahamiyati toʻgʻrisida soʻz yuritdi.

Serjant Rustam Vahobov esa yoshlarni chaqiruvga qadar boshlangʻich tayyorgarlik fanidan olgan bilimlarini boyitishga chaqirdi va harbiy tayyorgarlikni zamonaviy talablar asosida kuchaytirish zarurligini taʼkidladi.

Tadbir davomida oʻquvchilar harbiy qurol-yarogʻlar bilan tanishish imkoniyatiga ega boʻlishdi. Mayor Shuhrat Mamatov yoshlarni qurol-yarogʻlarning ishlash tartibi, ularning imkoniyatlari va harbiy vaziyatlarda qoʻllanilish jarayonlari bilan yaqindan tanishtirdi. Oʻquvchilar, shuningdek, qurollarning texnik xususiyatlari va ulardan foydalanish qoidalari boʻyicha savollarga javob berishdi, bu esa ularning harbiy xizmatga boʻlgan qiziqishini yanada oshirdi. Oʻquvchilarning texnik bilimlari sinovdan oʻtkazildi va ular, oʻz navbatida, murakkab savollarga aniq javob berishdi.

Shundan soʻng, oʻquvchilar uchun maxsus koʻrgazma tashkil qilindi. Harbiy mutaxassislar tomonidan harbiy qurol-yarogʻlar, mudofaa texnikalari va ularning texnik imkoniyatlari haqida batafsil tushuntirish berildi.

Tadbir davomida oʻquvchilarga haqiqiy harbiy hayot hissini berish maqsadida maxsus amaliy mashgʻulotlar tashkil etildi. Yoshlar harbiy otlarga minib, oʻzlarini yosh askarlarday his qilish imkoniyatiga ega boʻlishdi. Bundan tashqari, “Kvadratsikl” harbiy mashinalaridan foydalanish imkoniyati yaratildi. Qiziqarli tarzda tashkil etilgan tadbir yoshlarda juda katta taʼsurot qoldirdi. Oʻquvchilar, ayniqsa, harbiy mashinalarni boshqarishni oʻrganganlaridan mamnun boʻlishdi va bu tadbirning yoshlarni harbiy hayotga yanada qiziqtirganligini taʼkidlashdi.

Tadbir yakunida 69-sonli maktabning oʻquvchisi Furqat Tohirov barcha ishtirokchilar nomidan harbiylarni Vatan himoyachilari kuni bilan tabriklab, ular tomonidan tashkil etilgan tadbir uchun chin dildan minnatdorchilik bildirdi.

“Ochiq eshiklar kuni” tadbiri yoshlar qalbida ona-Vatanga boʻlgan muhabbatni kuchaytirish, Milliy Armiyamiz qudrati va harbiy xizmatning ahamiyatini keng targʻib qilishda muhim ahamiyat kasb etdi. Bu kabi tadbirlar yosh avlodni harbiy-vatanparvarlik ruhida tarbiyalashda, ularning maʼnaviy va jismoniy salohiyatini oshirishda, shuningdek, mamlakatimiz xavfsizligini taʼminlash yoʻlida jonbozlik koʻrsatishga tayyor shaxslarni shakllantirishda muhim oʻrin tutadi.

Shohzod Qurbonboyev