MUROJAATDAN RUHLANIB...

Bizning "Eshmurod - Sultonmurod” fermer xoʻjaligimiz koʻp tarmoqli xoʻjalik hisoblanadi. Aslida chorvachilikka ixtisoslashgan ushbu xoʻjaligimizda bir necha yillardan buyon paxta yetishtirish ishlariga ham eʼtibor berib kelinmoqda.

Joriy yilda fermer xoʻjaligimizda 20 gektarmaydonga chigit ekilib, gektarlarda toʻliq gʻoʻza nihollari undirib olishga erishdik. Gʻoʻza parvarishi davrida mavjud texnikalarimizdan unumli, suv, mahalliy va mineral oʻgʻitlardan tejamkorlik bilan foydalanishimiz natijasida ishimizda baraka boʻldi, har bir tup gʻoʻzada moʻl hosil toʻplashga erishdik.

Fermer xoʻjaligimizda 20 nafar pudratchi va bir nafar mexanizator paxtachilik sohasi boʻyicha mehnat qildi. Har yili paxta yigʻim-terimiga puxta tayyorgarlik koʻrishga odatlanishgan paxtakorlarimiz bu yilgi yigʻim-terimga ham puxta taraddud koʻrishdi.

Shu yilning 17 avgustida tumanimizning "Taraqqiyot koʻzgusi” gazetasida eʼlon qilingan tuman hokimligi, Xotin-qizlar qoʻmitasi, "Mahalla” xayriya jamoat fondi va "Nuroniy” jamgʻarmasi tuman boʻlimlari, "Kamolot” YoIH tuman Kengashi hamda tuman Fermerlar Kengashining paxta yigʻim-terimi mavsumini uyushqoqlik bilan oʻtkazish boʻyicha tuman aholisiga murojaatidan ruhlangan fermer xoʻjaligimiz paxtakorlari davlatga paxta topshirish boʻyicha shartnoma rejasini qisqa muddat ichida tumanimizda birinichi boʻlib ado etishga erishdilar.

Fermer xoʻjaligimiz paxtakorlari davlat xirmoniga shartnoma rejadagi 38 tonna oʻrniga 41 tonnadan ziyod "Oq oltin” topshirishga muvaffaq boʻldilar.

Paxta yigʻim terimida pudratchilarimizdan Barno Qozoqboyeva, Azima Haytimbetova, Gulbahor Eshboyeva va Tajigul Qaqayevalar namunali mehnat qilishib, ularning har biri "Oq oltin” xirmonimizga 2-2,5 tonnadan paxta topshirishga erishdilar.

Dalalarimizda hali hosil moʻl. Biz yetishtirgan "oq oltin”imizning bir misqolini ham nest-nobud qilmasdan davlatimiz xirmoniga topshirishga erishamiz.

Komil SULTONOV,

"Eshmurod-Sultonmurod”

fermer xoʻjaligi raisi.

(Foto - http://www.uz24.uz)