USTOZLARNI XOTIRLAB...

Hayotda shunday insonlarga duch kelamizki, ularning oʻzini tutishi, munosabatlari va oʻgitlari kishiga bir umr ibrat namunasi boʻlib qoladi, oradan necha yillar oʻtsa-da, xotirangda muhrlanib, doimo ezgu ishlarga chorlab turaveradi. Yaxshidan sharofat, deganlari shu boʻlsa kerak-da.

Men sobiq 13-hunar-texnika bilim yurtida ishlaganimda ana shunday ajoyib insonlar bilan hamnafas, hammaslak boʻlish baxtiga muyassar boʻlganman. Ularning biri Ikkinchi jahon urushi faxriysi, Yoʻldosh Qurboniy taxallusi bilan sheʼriy toʻplami ham nashr qilingan, joʻshqin qalbli, ochiq chehrali ijodkor Yoʻldosh aka Qurbonov edi. Domla har bir darsga kirishdan oldin puxta tayyorgarlik koʻrar, bizga ham shuni oʻrgatardi. Soʻzlaganda albatta mumtoz shoirlarimizning sheʼriy misralaridan namuna keltirib, odamni oʻziga jalb qila olardi. U kishi mening onam bilan sinfdosh boʻlganligi uchunmi, meni oʻziga yaqin olar, oʻgʻlim, deb murojaat qilardi. Kamtarligi shu qadar ediki, uni bilmagan odam mashhur shoir Qurboniy deb hech oʻylamas edi.

Esimda, bir bayram munosabati bilan bilim yurtimizda kontsert tashkillashtirildi. Kontsertga Nazir aka Rahimov, Otajon Xudoyshukurovlar tashrif buyurishgandi. Shunda kontsert boshlanishidan oldin Nazir aka Rahimov Yoʻldosh Qurbonovni sahnaga taklif qilib, soʻz berdi. Otaxon shoir har doimgidek hozirjavoblik bilan buning uchun minnatdorchilik bildirib, hofizlarga goh hazil, goh jiddiylik bilan rahmat aytdi, ijodiga baraka tilab, kontsertni boshlab berdi.

Har yili tumandagi barcha maktablarga 13-sonli hunar texnika bilim yurtimizga oʻquvchilarni jalb qilish uchun muassasamizda oʻrgatiladigan kasb-hunarlar, yaratilgan sharoitlar haqida targʻibot-tashviqot ishlarini olib borardik. Shoir Yoʻldosh Qurbonov bunday tashriflarda albatta ishtirok etar, tabiiyki, mehnatimiz zoya ketmasdi. Bundan direktorimiz Komil ogʻa Xoliqov (marhum) juda xursand boʻlar, unga qayta-qayta rahmat aytardi. Komil Xoliqov juda jiddiy, mulohazali odam boʻlsa-da, quvnoq, gungni ham gapga sola oladigan soʻzamol Yoʻldosh Qurbonov bilan juda ahil edi.

Oʻsha vaqtlarda safimizda Said aka Bobojonov, Oʻgʻiljon opa Boboniyozova, Kenja aka Xoʻjaniyozov, Gulsara opa Abdullayeva, Qurbonboy ogʻa Poʻlatov, Bibi opa, Muhammadnazar aka Bekchonov, Yakov Bulyakov, Qurbonboy Ollamurodov, Bozorboy Polvoniyozov, Baxtiyor Tovboyev, Yetmish Dushamov, Baxtiyor Najimov, Galina Hamzina, Rajab Niyozimbetov va Anabibi opa Matrasulova, Qosim aka Hayitboyev, Jongil opa Safarboyevalar turli lavozimlarda boʻlsalar ham, bir maqsad yoʻlida hamjihatlik bilan mehnat qilishgan.

Kasbga mehrni, bolalar koʻngliga yoʻl topib, dars mashgʻulotlariga qiziqtirishni men ulardan oʻrgandim, desam, hech mubolagʻa boʻlmas. Ular bilan ishlagan davrim hayotimning eng unutilmas taassurotlarga boy davrlari boʻlib qoldi. Shu boisdan ham ularni doim hurmat-ehtirom bilan eslayman, ulardek boʻlishga intilaman. Bu goʻzal xotiralar meni doimo yaxshi niyatlar, yangi muvaffaqiyatlar sari yoʻnaltirib turadi.