KONSTITUTsIYa – ISTIQLOLIMIZNING PORLOQ, HAYoTBAXSh QUYoShI

Konstitutsiyamiz mustaqilligimizning mevasi, yangi milliy davlatimizning huquqiy poydevori, xalqimiz manfaatlarini koʻzlovchi, inson haq-huquqlari va erkinliklarini, ozodligi, shaʼni va qadr-qimmatini muhofaza qiluvchi hamda yuksaklarga koʻtaruvchi Bosh qomusimiz – Asosiy qonunimiz boʻlib ulugʻlanadi, eʼzozlanadi va qadrlanadi. Konstitutsiyamiz mamlakatimizning jahon maydonida, dunyo sahnasida qad rostlashi, taraqqiy etishida, adolatli huquqiy demokratik davlat va erkin fuqarolik jamiyatini barpo etish uchun strategik dastur, yoʻlchi yulduz va soʻnmas mayoq boʻlib porlab turibdi. Muhtaram Prezidentimiz taʼkidlaganlaridek, "Bizning Konstitutsiyamiz eng demokratik, xalqaro miqyosda eʼtirof etilgan meʼyor va talablarga toʻla javob beradigan qomusdir”.

Mustaqillik yillarida mamlakatimizda hech bir taʼrifga sigʻmaydigan mislsiz olamshumul tarixiy yutuqlar, keskin burilish, ulkan ijtimoiy-siyosiy va iqtisodiy madaniy-maʼrifiy oʻzgarishlar va yangilanishlar yuz berdi. Bu albatta Konstitutsiyamizga suyangan va tayangan davlatimizning odilona toʻgʻri siyosati, jamiyatimizning barcha sohalari va jabhalarida olib borilayotgan chuqur islohotlar hamda mamlakatimizni izchil modernizatsiyalash samarasidir.

Bugungi hayotimizda, butun jamiyatimizda Konstitutsiyamizga asoslangan holda qonun ustuvorligi tamoyillariga tayanib qatʼiy va izchil olib borilayotgan davlatimiz siyosati natijasida mamlakatimizda barqaror tinchlik va barqaror taraqqiyot, ijtimoiy-iqtisodiy yuksalish, millatlararo totuvlik va hamjihatlik, bugungi farovon hayotimizning, xalqimiz baxtu-saodatining har bir shaxs, har bir inson kamolotining tayanchi va kafolati boʻlib xizmat qilmoqda.

Binobarin, bizning har birimiz Konstitutsiyamizning va unga asoslangan barcha Qonunlarimizning mazmun-mohiyati hamda ahamiyatini toʻla anglab oʻrgangan va oʻzlashtirgan holda bugungi joʻshqin hayotda, chinakam bunyodkorlik jarayonlarida faol qatnashishimiz, faol hayotiy pozitsiyani egallashimiz zarur. Shunda bizning har birimiz oʻz-oʻzimizga "Istiqlol bizga nima berdi?” – degan boqibegʻamlik va boqimandalik kabi bemaʼni, gʻaliz savolni emas, balki biz mustaqilligimizni mustahkamlash, mamlakatimiz ravnaqi va  yurtimiz farovonligi uchun nimalar qildik va qanday ezgu ishlar va amallarni bajarmoqdamiz, degan baralla yangrovchi yuksak insoniy xislat va ovoz bilan maydonga chiqqan boʻlamiz. Biz har birimiz Konstitutsiyamizning ezgu gʻoyalarini izchillik bilan amalga oshirish yoʻlida yanada shijoatli, yanada mardonavor, yanada samarali mehnat qilaylik, qatʼiy kurashaylik.

Zero, Konstitutsiyamiz – istiqlolimizning porloq, hayotbaxsh quyoshi boʻlib, mamlakatimizning yuksak taraqqiyot yoʻlini nurafshon qilib turibdi.

Ilhom NURULLAYeV,

2-sonli tuman davlat notarial idorasi notariusi.

(Foto - OʻzA)