Boshlangʻich sinflarda taʼlim-tarbiya sifatini yuqori koʻtarish omillari

Oʻqituvchilik - masʼuliyatli kasb. Bu kasbni tanlagan inson oʻquvchilarga bilim berish bilan birga doimo izlanib, oʻz bilimini oshirib borishi kerak. Haqiqiy oʻqituvchi oʻz oʻquvchilariga mehr bilan dars oʻtadi, ularni oʻqish, yozishga oʻrgatadi, bilim beradi

Har bir inson harf tanitgan, oʻqishni, yozishni oʻrgatgan oʻqituvchisini doimo hurmat bilan esga oladi. Bunday kasbni egallash, bu kasbda ishlash hammaga ham nasib qilavermaydi.

Taʼlim-tarbiya ishlarida oʻqituvchining adashishga haqqi yoʻq. Agar oʻqituvchi adashgudek boʻlsa, butun sinf izdan chiqadi. Shuning uchun oʻqituvchi zamon bilan hamnafas qadam tashlab, oʻz mahoratini, bilimini oshirib, izlanishda boʻlishi kerak.

Zamonaviy sharoitda taʼlimning dolzarb vazifalaridan biri – oʻquvchilarni mustaqil fikrlashga oʻrgatishdir. Oʻquvchilar bilim olish jarayonida oʻqituvchining hamkoriga aylanadi. Interfaol usullar - oʻquvchilarni oʻzaro fikr almashishga, topshiriqlarni birgalikda bajarishga, mustaqil fikrlashga oʻrgatadi. Oʻqituvchining zamonaviy pedtexnologiyalarni taʼlim-tarbiya jarayonida qoʻllay bilishi va shu sohadagi tinimsiz izlanishi samaradorlikni taʼminlaydi.

Darsliklarning multimediali ilovalari ham oʻquvchilarni erkin fikr yuritishga, unga munosabat bildirishga oʻrgatadi. Oʻqituvchini esa yanada izlanishga, darsga puxta tayyorgarlik koʻrishga undaydi.

Mahorat darslariga eʼtibor ham sifat va samaradorlikka asos boʻladi. Buning uchun maktab uslub birlashmasi ishi katta ahamiyatga ega.

Bu yoʻlda astoydil mehnat qilishimiz, taqdim etilayotgan metodik qoʻllanma va dasturlardan oqilona foydalanishimiz kerak.

Asosiysi, taʼlim sifatini oshirishda oʻqituvchilarning oʻz vazifasini astoydil bajarishidir. Buni har bir boshlangʻich sinf oʻqituvchisi unutmasligi kerak. Oʻz ustida tinimsiz ishlashi, yangi metodikalarni yaxshi oʻzlashtirishi lozim.

Gulbahor Qalandarova,

19-sonli maktabning boshlangʻich sinf oʻqituvchisi.

(Foto - OʻzA)