EZGU REJALAR BILAN
Hozirgi kunda mamlakatimizda taʼlim sohasida olib borilayotgan islohotlar sohaning rivojlanishiga va farzandlarimizga berilayotgan taʼlim sifatining tubdan yaxshilanishiga omil boʻlmoqda. Yana shunisi diqqatga sazovorki, mamlakatimizda 12 yillik majburiy taʼlim joriy etilib, 9-yillik umumiy taʼlim maktablarini tugatgan oʻquvchilar kasb-hunar kollejlariga jalb etilmoqda. Endilikda yoshlarimiz oʻrta maʼlumotga ega boʻlish bilan birgalikda kasb-hunar sohiblari ham boʻlishadi.
Bizning Amudaryo transport kasb-hunar kollejimiz taʼlim sohasida olib borilayotgan islohotlar natijasida dunyoga kelgan taʼlim va kasb-hunar maskanlaridan biri hisoblanadi.
2013-yilda foydalanishga topshirilgan kasb-hunar kollejimizda ayni paytda 7 ta yoʻnalish boʻyicha 23 ta guruhda 687 nafar oʻquvchi taʼlim olib, kasb-hunar sirlarini oʻrganishayapti.
Kollejimizda mehnat qilayotgan 37 nafar oʻqituvchilar va 14 nafar ishlab chiqarish taʼlimi ustalari oʻquvchilarga taʼlim berishda hamda kasb-hunar sirlarini oʻrgatishda fidokorona mehnat qilmoqdalar.
Kollejimizda oʻquvchilarga berilayotgan kasbiy taʼlimni yanada chuqurlashtirish maqsadida har bir mashgʻulotni koʻrgazmali qurollar asosida oʻtkazishga doimo katta eʼtibor berib kelinadi. Shu maqsadda kollejimizga 2014-2015 oʻquv yilida byudjet mablagʻlari hisobidan 5 mln. 154 ming soʻmlik "Matiz” va "Lasetti” avtomobillari dvigatellari, 29,2 mln. soʻmlik avtomobil tuzilishi va yoʻl harakati xavfsizligi jihozlari hamda 32,2 mln. soʻmlik chilangarlik ustaxonasi dastgohlari keltirildi.
Kollejimiz oʻqituvchilari va ishlab chiqarish taʼlimi ustalari oʻz zimmalaridagi vazifalarni sidqidildan ado etishga harakat qiladigan fidoyi insonlar hisoblanishadi. Shu boisdan ham kollejimizda taʼlim samaradorligi tobora oshib borayapti.
2015-2016 oʻquv yilida biz kollej jamoasi uchun yana bir quvonchli voqea roʻy beradi. Bu – joriy oʻquv yili yakunida kollejimiz oʻquvchilaridan 207 nafarining katta hayot sari uchirma boʻlishidir. Ular kollejimizning dastlabki qaldirgʻochlari hisoblanadilar.
Kollejimiz oʻqituvchilari va ishlab chiqarish taʼlimi ustalari yangi 2016-yilga yaxshi niyatlar va katta rejalar bilan qadam qoʻydilar. Zero, ezgu niyatlar bilan boshlangan yil samarali boʻladi.
Jasur DAVLETOV,
Amudaryo transport kasb-hunar kolleji direktorining kasbiy taʼlim boʻyicha oʻrinbosari.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
