HAZRAT NAVOIY VA YoShLAR

XXI asrda hazrat Navoiy bilan zamonamiz ahlini 575 yillik koʻprik bogʻlab turibdi. Ne sababki, ul mutafakkirning ijodi qalbimiz tubidan joy olib, ruhimizni tarbiyalab kelmoqda. Olam yaralibdiki, insoniyatga juda koʻp ilohiy qudrat sohiblarini tuhfa etdi. Lekin tarix ularning koʻpchiligini unutdi. Ammo biz oʻzbek xalqlari uchun Navoiy tengsiz dahodir.

Maqsud Shayxzoda Alisher Navoiyni "soʻz mulkining sultoni”, deya taʼriflaganlarida haq edilar. Maʼlumotlarga koʻra, jahonning koʻzga koʻringan shoir va yozuvchilari tomonidan ishlatilgan soʻzlar jihatidan ham Hazrat Alisher Navoiy dunyo adabiyotida eng yuqori pogʻonada turadi: Alisher Navoiy oʻz asarlarida 26035 ta soʻz ishlatgan.

Alisher Navoiy ijodida mumtoz sheʼriyatning deyarli barcha janrlari hamda sheʼriy sanʼatlarini uchratishimiz mumkin. Shoir ijodida komil inson gʻoyasi ilgari suriladi. U ezgulikni ulugʻlagan. Yaxshilikka chorlagan. Navoiy boboning merosini oʻqib-oʻrganish, ayniqsa biz yoshlarning maʼnaviiy-maʼrifiy tomondan kamol topishimizda yoʻlchi yulduz vazifasini bajaradi.

Alisher Navoiyning "Hayrat ul-Abror”, "Lison ut-tayr” dostonlari hamda fors tilidagi "Devoni foniy”ning tarbiyaviy ahamiyati juda katta.

Odami ersang demagil odami,

Oniki yoʻq xalq gʻamidin gʻami.

Bu misralar orqali Navoiy inson faqat oʻzi uchun emas, balki oʻzgalar uchun yashashi lozimligini, el-yurt manfaati yoʻlida xizmat qilish oliy saodat ekanligini taʼkidlaydi. Axir, yer yuzidagi jamiki insonlar taqdiri bir-biriga uzviy bogʻlangan. Yoki mana bu satrni loqayd oʻqimoq mumkinmi?

"Kimki bir koʻngli buzuqning xotirin shod aylagay,

Oncha borki, Kaʼba vayron boʻlsa obod aylagay”.

Agarda qalb yomonlikka moyil boʻlsa, uni bu yoʻldan qaytarish, yaxshilikni oʻrgatish ancha zahmatdir. Diniy kitoblarda koʻngil muqaddas deyilgan. Yozilishicha, har bir insonda ham koʻngil boʻlavermas ekan. Negaki, koʻngilda ilohiylik yashar ekan.

Mening qalbimda yaxshi fazilatlarning, ulugʻ tuygʻularning kurtak yozishida Navoiy bobomning ijodi alohida ajralib turadi. Negaki, Navoiy xazinasi ezgulikka yetaklaydi.

Shahzod QURBONBOYeV,

Mangʻit iqtisodiyot kolleji oʻquvchisi.

(Foto - http://milliybog.uz)