Bolalar kulgusi dunyoni toʻldirdi

Inson hayotida eng nurli, goʻzal va bokira bir manzil bor. Bu – Bolalik manzili. Yuraklarda chuqur iz qoldirguvchi, har qanday vaziyatda ham eng totli xayollar hadya etguvchi mazgil bor – bu bolalik mazgillari BOLALIK damlari.

Hech qachon qaytib kelmas ezgu, betashvish, baxtiyor lahzalar – faqat ana shu bolalik dunyosiga xos, gʻamlardan, dunyo tashvishlaridan xoli bolalik mamlakatiga xos. Chunki bola dunyoni qanday boʻlsa, shundayligiga koʻrib, his qiladi, zavqlanadi. Shuurida jonlangan taassurotlarini kulgulari, quvonchlari bilan ifoda etadi u! Ota-onasi bagʻrida, issiq mehrni tuyib, Vatanning cheksiz gʻamxoʻrligi ogʻushidagi bolajonlarning baxtiyor nigohlaridan oilalar nurafshon.

Bir necha  kundirki, butun dunyoda, mamlakatimizda, shu jumladan tumanimizda ham bolalar 1-iyun – Xalqaro bolalarni himoya qilish kuniga bagʻishlangan bayram tadbirlarida ishtirok etibgina qolmay, oʻz qobiliyatlarini, orzu-intilishlarini bayram ruhiga singdirib yuborishdi. Bayramdan bir hafta oldin tumanimizning barcha maktabgacha taʼlim muassasalarida, oʻquv maskanlari va mahallalarda rango-rang mavzularda shukuhi 1-iyun kuni Mangʻit shahridagi bolalar istirohat bogʻida katta tantanalar bilan davom etdi.

Bayramona bezatilgan istirohat bogʻi shu kuni bolalarning chinakam begʻubor mamlakatiga aylandi. Quvonch-u shodlik, shoʻx oʻyinlar, bolalik erkaliklaridan boshqa tashvishi yoʻq bolajonlar uchun bagʻishlangan tanatanali bayram dasturining ochilish marosimida tuman hokimi oʻrinbosari xotin-qizlar qoʻmitasi raisi Maryam Ahmedova tabrik nutqi soʻzladi.

Mamlakatimiz kelajagi boʻlgan yosh avlod tarbiyasi, kamoloti, baxt-saodati – har birimizning  baxt-saodatimiz, xotirjamligimiz mamlakatimizning porloq kelajagidir, - dedi oʻz soʻzida. – Ana shu porloq kelajagimiz egalari hamisha omon boʻlishsin. Toki siz aziz bolajonlarimiz sogʻlom va barkamol ekansizlar, ona Oʻzbekistonimiz jahon osmonining yorugʻ yulduzi boʻlib mangu porlayveradi.

Shundan soʻng bolajonlarni tuman XTMFMTTEB mudiri Ashirboy Qoʻshayev ham bayram bilan qizgʻin muborakbod edi.

Shirin qutlovlar, tabriklardan olamjahon quvonchlar ogʻushiga choʻmgan bolajonlarga muzqaymoqlar tarqatildi. Tuman hokimligi, "Mahalla” jamgʻarmasi tuman boʻlinmasi tomonidan tayyorlangan sovgʻa-salomlardan hech bir kichkintoy chetda qolmadi. Bolajonlarning quvonchli kulgulari jaranggi ostida namoyish etilgan teatrlashtirilgan bayram dasturida esa ijrochi bolajonlar bilan tomoshabin bolalar bab-baravar raqsga tushdilar, joʻrovoz kuyladilar.

Istirohat bogʻida yaratilgan shart-sharoitlar, qulf urib oʻsib yotgan mevali va manzarali dov-daraxtlar, chamanzor gullar tarovati har bir dilga orom  bagʻishladi. Zamonaviy halinchaklar, barcha sharoitlarga ega avtodrom maydonchasi, qirgʻoqlarida oʻrdak va gʻozlar qanot yozib uchmoqqa shaylanayotgan sarhovuz bolajonlar quvonchiga quvonch bagʻishladi. Ayniqsa, Qipchoq qishlogʻilik usta hunarmand va rassom Oʻringul oʻzgacha mehr bilan ishlov bergan ertaklar dunyosi – tuyakash bobo, Dehqon bobo va Dehqonoy, Dehqon boboning chaylasi va oʻta mohirlik bilan ishlangan Laylaklar uyasi, uchib-qoʻnayotgan laylaklar haykalchalari bolajonlar qalbida jonli tabiatga alohida mehr va qiziqish uygʻotdi.

Bayramda oʻz dasturlari bilan ishtirok etgan tumanimizdagi maktabgacha taʼlim muassasalari tarbiyalanuvchilari, "Barkamol avlod” bolalar markazining iqtidorli bolalarining chiqishlari ishtirokchilarda katta taassurotlar qoldirdi. Homiy tashkilotlar tomonidan bolajonlarga ulashilgan sovgʻa-salomlardan, ham koʻra nazarimda bolajonlar biri-biridan qiziqarli bolalar oʻyinlari, raqs va ashulalaridan olam-olam zavq oldilar. shu kuni bu ajib maskan bolalarning begʻubor mamlakatiga  aylandi goʻyo. Bu mamlakatda barcha gʻam-u tashvishdan xoli. Bu mamlakatning toʻrt tarafida ham obtob balqigan. Goʻyo  dunyo tomon yoʻl ana shu bolajonlar mamlakatidan boshlanganday. Hamma narsa ular xizmatiga shay, hamma narsa muhayyo. Hamma ish ezgu, orzular chamon-chaman!

Samoda quyosh porlaydi. Yerda esa Oʻzbekistonning kelajagi porloq quyoshlari – baxtiyor va barkamol bolalari! Ular ana shu baxt quyoshidan nur emgan zamin farzandlari. Ularning yoʻllari ana shu baxtiyor onlarga, ezgulik mazgillari aro  ulugʻ manzillarga tutash. Zero, bizning mamlakatda har bitta bola ana shunday ezgu baxtga musharraf! Koʻngillarda, xalqimiz dilida esa yanada ezgu tilak uygʻonadi:

Dunyoni faqat bir kun

Bolalarga beringiz

Bolalar mamlakatin –

Saltanatin koʻringiz:

Chegara yoʻq, kamlik yoʻq,

Hamma ozod, baxtiyor.

Iqtisodda tanglik yoʻq,

Mol-u dunyo xoʻp bisyor.

Barcha millat bolasi

Bir oila – birlashgan

Dunyoning har bolasi

Bir-biri-la sirlashgan.

Bola – podshoh amri-da

Yoʻllarga gul ekilar.

Samolarning toqidan

Yerga yulduz toʻkilar.

Yetti iqlim chiroyi

Yigʻilib raqs etadi

Yilning har kun, har oyi

Baxtdan bahs etadi.

Ana shunday ezguliklar ila yoʻgʻrilgan bayram tadbiri kuzatarkanman, qalbimda yanada ezgu bir tilak uygʻondi:

- Bolalaring bilan omon boʻl, Vatan!

Robiya YOʻLDOShEVA.