ALOQA XIZMATI SIFATI YaXShILANMOQDA

Mamlakatimiz davlat mustaqilligiga erishganiga 25-yil toʻlayapti. Xalqimiz asrlar davomida orzu qilib yashagan, intilgan istiqlol yillarining har bir kuni, lahzasi bu bebaho neʼmatning qadri qanchalar aziz va buyuk ekanligini qalblarimizga tobora teranroq joylamoqda. Oʻzbekistonda oʻtgan tarixan qisqa davrda mustaqillikni mustahkamlash, yurtimiz aholisi uchun munosib turmush sharoitlarini yaratish, rivojlangan demokratik davlatlar safidan munosib oʻrin egallash, salohiyati va nufuzi yuksalgan davlatga aylantirish borasida asrlarga tatigulik ishlar amalga oshirildi.

Har qanday davlatning taraqqiyoti va rivojlanishini axborot-telekommunikatsiya texnologiyalarisiz tasavvur qilish qiyin.

Ha, istiqlol yillarida mazkur sohada ham ulkan oʻzgarishlarga erishildi. Agar tumanimiz misolida olib qaraydigan boʻlsak, 2004-yilda Nukus – Mangʻit shaharlari oraligʻida 91 km.lik  shisha tolali kabel yotqizilib, tumanimiz markazida yangi raqamli SS08 tipidagi Xitoyda ishlab chiqarilgan ikkita EATS, umumiy sigʻimi 4304 portli stantsiyalar qurilib, foydalanishga topshirilishi biz uchun xizmat koʻrsatish darajasi va sifatini yuqori pogʻonaga koʻtarish imkonini berdi. Chunki bu stantsiyalarning ishga tushirilishi tumanimiz aholisiga dunyoning istalgan davlatlari bilan uy telefonlari orqali gaplashish imkonini yaratdi. Qolaversa, shisha tolali kabelning axborot oʻtkazish imkoniyati yuqoriligi bois, aholi va xonadonlarni internet tarmogʻiga ulash, televideniye koʻrsatuvlarini yetkazib berish yoʻlga qoʻyildi. Xizmat sifatini yaxshilash maqsadida telekommunikatsiya uskunalarining ishchi holatini saqlash, magistral va turli sigʻimdagi kabellarni oʻz vaqtida taʼmirlashga ulkan eʼtibor qaratilmoqda, magistral yoʻllar boʻylaridagi havo aloqa liniyalarini tartibga solish boʻyicha Mangʻit shahrining Gurlan, Qipchoq, Mangʻit, Berdaq koʻchalari boʻylarida ishlar olib borildi.

Sohaga yangi texnologiyalarni joriy qilish natijasida 2004-yilda "Oʻzmobayl” kompaniyasining simsiz aloqa xizmati yoʻlga qoʻyildi va mobayl telefonlari orqali tumanimizdagi maktablar internet tarmogʻiga ulandi.

Qishloq joylarda eskirgan anolog ATSlar oʻrniga raqamli "Koinot – el -SGM” tipidagi stantsiyalar qurildi. Qilichboy, "Choykoʻl” ovuli va Qipchoq posyolkalaridagi stantsiyalarga quyosh batareyalari oʻrnatildi. Sobiq  ittifoq davrida umumiy sigʻimi 4000 raqamga ega ikkita eski anolog ATS mavjud boʻlib, boshqa shaharlar bilan va xalqaro gaplashishlar faqat kommutator telefonistkalari tomonidan Respublika markazi orqali amalga oshirib kelinardi. Shuning oʻziyoq biz aloqa xizmati koʻrsatishda qanchalik ilgarilash yuz berganini tasavvur qilishimizga imkon beradi.

Ayni kunlarda ham yangidan bunyod etilayotgan aholi punktlarini telefonlashtirish ishlari olib borilyapti. Xususan, "Taqir qalʼa” massiviga 3 km.lik shisha tolali kabel tortilib, 96 ta  portli MSAN rusumli kichik ATS oʻrnatildi. Amudaryo qishloq xoʻjalik, Doʻrman qishloq xoʻjalik kasb-hunar kollejlari va Qilichboy maishiy xizmat koʻrsatish kasb-hunar  kollejlariga ham 23,5 km. uzunlikdagi shisha tolali kabellar tortilib, ishga tushirildi, mavjud eski uskuna va jihozlar zamonaviy, yangi  rusumda ishlab chiqarilganlariga almashtirilayapti. "Oʻztelekom” AKning  "Yagona oyna” loyihasi boʻyicha zamonaviy dizaynda mijozlarga xizmat koʻrsatish shoxobchasi qayta rekonstruktsiya qilinib, ishga tushirildi. Bunda barcha aloqa xizmati turlari internet tarmogʻi, Oʻzmobayl SDMA-450 tarmogʻi va mahalliy aloqa xizmatlari "Yagona oyna” orqali amalga oshirilmoqda.

Ayni kunda  tumanimizda Oʻzmobayl abonentlari soni 2500 nafardan, internet  tarmogʻidan foydalanuvchilar soni 1000 nafardan oshib ketdi.

Taraqqiyotimizda muhim oʻrin tutadigan axborot telekommunikatsiya texnologiyalari hayotimizga tobora chuqur kirib kelayotgan bugungi kunda aloqa xizmati koʻrsatish sifatini yaxshilashga intilish tuman telekommunikatsiya tarmogʻi xodimlarining asosiy burchi boʻlib qolaveradi.

Ortiqboy ShOMURODOV,

tuman telekommunikatsiya tarmogʻi boshligʻi.

(Foto - http://www.hosting-obzor.uz)