XALQIMIZ SOGʻLOM EKAN, VATANIMIZ HAMIShA FAROVONDIR

Mamlakatimizda har jihatdan sogʻlom, barkamol avlodni voyaga yetkazish borasida amalga oshirilayotgan islohotlar, qabul qilinayotgan davlat Dasturlari doirasidagi keng qamrovli vazifalar negizida ham xalqimiz salomatligini yanada mustahkamlash asosiy maqsad qilib belgilangan.

Men har kuni oʻzim rahbarlik qilayotgan Oxunboboyev nomli QVP tomon yoʻl olarkanman, bundan 25-yil avvalgi Xitoy ovuli hududidagi moʻʼjazgina FAPni va u yerdagi sharoitni koʻz oldimga keltirib, bugungi qishloq hayotining naqadar farovon va obod pallaga kirganidan quvonib ketaman. Bor-yoʻgʻi  ikki yoki oshib ketsa uch nafar oʻrta tibbiyot  xodimlari faoliyat olib boradigan FAPlarda aholiga tibbiy xizmat koʻrsatish  darajasi tamoman qoniqarsiz ahvolda edi. Tibbiy  anjomlar haqida gapirmasa ham boʻladi.

Bugungi QVPlarda esa xalqimiz salomatligini mustahkamlash, bemorlarga tibbiy xizmat koʻrsatish zamon talablari darajasida. QVP joylashgan hududda  6120 nafarga yaqin aholi istiqomat qiladi. Muassasamizda faoliyat olib boruvchi 23 nafar tibbiyot xodimi  hududdagi har bir  oila, har bir fuqaro haqida toʻliq maʼlumotga egaligi tufayli aholi oʻrtasida yuqumli kasalliklarga chalinish holatlari juda kam. Ayniqsa, oilalarda sogʻlom farzandlar tugʻilishini, ularning sogʻlom rivojlanishini taʼminlash maqsadida fertil yoshidagi ayollar sogʻligi qatʼiy nazorat ostiga olingan. Dunyoga kelgan har bir goʻdak alohida mehr va eʼtiborda. Bir yoshgacha boʻlgan va bir yoshdan 6-7 yoshgacha boʻlgan bolalarni kasalliklarga  qarshi emlash ishlari oʻz vaqtida olib borilganligidan bolalar sogʻlom oʻsishmoqda. Bundan tashqari, 7 yoshdan 14 yoshgacha boʻlgan oʻsmirlar va undan yuqori yoshdagi yoshlar salomatligi borasida hududimizda muammo yoʻq hisobi.

Lekin 18 yoshdan 40 yoshgacha boʻlgan fuqarolar orasida tumanimizdan chetga, koʻpincha Qozogʻiston va Rossiya davlatlari hududiga chiqib, ishlab qaytayotganlar ham borligi uchun patronaj shifokorlarimiz aynan shunday fuqarolarning oilalarida tez-tez boʻlib, ularning salomatliklarini nazorat qilib turishadi. Qon tahlillari natijalari alohida qayd etilib, zarur paytda tibbiy yordam koʻrsatilmoqda.

Keksa avlod vakillari nafaqat oilalarimiz, balki jamiyatimizning ham koʻrkidir. QVP tasarrufidagi mahallalarda istiqomat qiluvchi  60 yoshdan oʻtgan, 70-80 va undan yuqori  yoshlarga yetgan pir-u badavlat otaxon va onaxonlarimiz holidan xabar olish muassasamiz xodimlari zimmasidagi eng masʼuliyatli burchdir. Zarurat tugʻilganda QVPda tashkil etilgan oʻrinlarda yotib, davolanish imkoniyati yaratilgan.  QVPda bemorlarni qabul qilish, aniq tashxis qoʻyish, qon tahlillarini aniqlash va davolash boʻyicha yaratilgan sharoitlar tuman markazidagi shifoxonalardagi sharoitdan qolishmaydi. Chunki barcha xonalarimiz zamonaviy tibbiy asbob-anjomlar bilan jihozlangan. Nigora Mamutova, Sayyora Rajabova, Shuhrat Davlatov kabi shifokorlarimiz oʻzlarining xushmuomalaligi, samarali davolash usullari bilan ovul ahlining  hurmat-eʼtiborini qozonishgan. Zamira Oʻrozimbetova, Adolat Oʻtaboyeva, Dilbar Bobojonova, Goʻzal Ibragimova, Safargul Yoʻldosheva, Madina Davlatova, Feruza Erimbetova singari oʻrta tibbiyot xodimlarining har bir ishidan aholi mamnun.

Insonlar dardiga darmon boʻlish, ularning qalbiga quvonch baxsh etib, umriga umr qoʻshishga intilib yashash – har bir shifokor dilidagi ezgu qasam. Biz ana shu qasamga hamisha sadoqatda, xalqimiz  sogʻligiga masʼullik hissi bilan mehnat qilaveramiz. Chunki xalqimiz sogʻlom va yoshlarimiz barkamol boʻlsa, ona Vatanimiz yuksak taraqqiyot sari dadil odimlayveradi.

Omonboy YeLUBOYeV,

Oxunboboyev nomli QVP mudiri.