Sayyor qabullar oʻtkazilmoqda

Oʻzbekiston Respublikasi Ichki ishlar vazirlig Akademiyasi tomonidan mamlakatimizning barcha hududlarida aholi bilan uchrashuvlar oʻtkazish rejalashtirilgan boʻlib, bundan koʻzlangan maqsad Oʻzbekiston Respublikasining xalq manfaatiga xizmat qiluvchi amaldagi Qonunlari, Prezident Farmonlari va Qarorlari, masʼul vazirliklarning qaror hamda farmoyishlarining ijrosini taʼminlash, ichki ishlar organlarining xalq bilan muloqot qilish va huquqbuzarliklar profilaktikasiga doir faoliyatini tadqiq etish, ichki ishlar organlarining  profilaktika xizmatlari oldiga qoʻyilayotgan vazifalarning toʻlaqonli bajarilishini taʼminlash, profilaktika inspektorlarining ish sifati va masʼuliyatini oshirish, ularning xizmat va turmush  sharoitlarini chuqur oʻrganishdan iborat.

Bu kabi uchrashuvlar tumanimizda ham oʻtkazildi. Uchrashuvlar Oʻzbekiston Respublikasi Ichki ishlar vazirligi Akademiyasi professor-oʻqituvchilari, jinoyat qidiruv, tergov va huquqbuzarliklarning oldini olish, Shaxsiy tarkib bilan ishlash, Inson huquqlarini himoya qilish va yuridik taʼminlash xizmatlari, Respublika Sogʻliqni saqlash vazirligi, Mehnat vazirligi, Xalq taʼlimi, Oliy va oʻrta maxsus taʼlim vazirliklari, Xotin-qizlar qoʻmitasi va bir qator ilmiy-amaliy va madaniyat markazlari hamda "Kamolot” yoshlar ijtimoiy harakati, shuningdek, boshqa bir qator davlat boshqaruv organlari, jamoat tuzilmalari bilan hamkorlikda tashkil etildi.

Uchrashuvlarda Prezidentimizning 2016-yil 28-dekabrdagi "Jismoniy va yuridik shaxslarning murojaatlari bilan ishlash tizimini tubdan takomillashtirishga doir chora-tadbirlar toʻgʻrisida”gi farmoni ijrosi doirasida tashkil etilayotgan bu uchrashuvlar fuqarolar murojaatlariga vaqtida javob qaytarish, muammolarini joyning oʻzida bartaraf etish, eng muhimi, aholining davlat idoralariga ishonchini yanada mustahkamlashga xizmat qilayotganligi taʼkidlandi.

Sayyor qabul guruhi faoliyati davomida bugungi kunning ustuvor vazifalaridan boʻlgan tadbirkorlik sohasida yaratilgan imkoniyatlar, bu borada qonunchilikka kiritilgan oʻzgartirish va qoʻshimchalar toʻgʻrisida fuqarolarga keng tushuncha berdi. Murojaatlarni oʻrganish bilan bir qatorda, huquqiy targʻibot ishlari ham amalga oshirildi. Bunday qabullar har kuni, mamlakatimizning barcha hududlarida jadval asosida olib borilmoqda.

Uchrashuv yakunida ichki ishlar organlari tizimidagi muammo va kamchiliklarni bartaraf etish hamda ichki ishlar organlarining profilaktika xizmatlari faoliyatini takomillashtirish, ichki ishlar organlarining xalq bilan samimiy muloqotini izchil yoʻlga qoʻyish borasida takliflar bildirildi.

Uchrashuvlarda aholiga mavjud qonunlarga oid eslatmalar ham tarqatilmoqda. Bu esa joylarda turli huquqbuzarliklarning oldini olish, jinoyatchilikka qarshi kurashishga xizmat qilishi bilan ahamiyatlidir.

(Foto - http://sof.uz)