VATANGA NAVROʻZ KELDI

Dunyoda biri-biridan buyuk, biri-birini takrorlamaydigan bayramlar koʻp. Bu bayramlar bilan bogʻliq anʼana-yu udumlar, urf-odatlar bisyor. Lekin tarixi qadim Avestodan ham olislarga borib taqaladigan asl milliy bayramimiz – Navroʻzi olam oʻzining mazmun-mohiyati, hatto hayotimizga kirib keladigan sanasi, vaqti bilan dunyo xalqlarining bayramlaridan oʻzgacha.

Tabiat va koinotda roʻy beradigan moʻʼjizaviy jarayon – tun bilan kunning tenglashuvi, ona Yerda – borliqda uygʻonish, bedorlik boshlangan damlarda hayotimizga biri-biridan orombaxsh, fusunkor lahzalarni baxsh etib kirib keladi Navroʻz!

Navroʻzi olam tashrifi bilan eng avvalo ona tabiat uygʻonadi: koʻzlarga yashilliklar oqib kiradi. Bogʻlarda boshlangan bedorlik ruhiyatimizga koʻchadi.

Navroʻzi olamning har bir qadamini, tashrifini xalqimiz bir-birlariga muborakbodlar ila qarshi olishlarida olamjahon hikmat mujassam.

Azizlar, ana shu hikmatlar koʻngillarni oʻstiradi, bir-birimizning qadrimizni baland qiladi goʻyo.

Ana, Vatanga Navroʻz keldi. Navroʻz ila abri bahor keldi, azizlar! Ona Yer koʻksiga tushgan ilk bahor yomgʻirining  shiviridan maysalar uygʻondi! Navroʻz sabolari bazmidan shodon bogʻlarda kurtaklar uygʻondi! Zamin koʻksidagi issiq hovurni sezgan qadamlar tezlashdi, Navroʻzni sogʻingan  dillarga mehnat, yaratish zavqi tushdi!

Anov koʻhna dalalarga eltuvchi yoʻllar bugun oddiy dala yoʻli emas, ular rizq-roʻz, qut-baraka, nasiba yoʻllari! Tabiat – bedor, dehqon – bedor, el-u yurt – bedor.

Qalblarda mehr-oqibat, muruvvat, shijoat tuygʻularining qadrini yanada oshirib keldi gul Navroʻz! Momolar mehri olovida pishgan sumalaklar tortilgan dasturxonlar atrofiga butun Oʻzbekiston xalqini jam qilgan Navroʻzi olam bu!

Ulugʻ hazrat Mir Alisher Navoiy bobomiz aytadilar:

"Ulus chehrai olam afroʻzidin,

Bilur yil kelishin, Navroʻzidin...”

Koʻzlarni quvontirib, koʻngillarni yashnatib, butun borliqqa goʻzal bir bedorlik baxsh etib kelguvchi Navroʻzi ayyomning dunyo bayramlaridan oʻzgachaligi ham  ana shunda – yangilanishlarga, oʻzgarishlarga boy ekanligida, ulugʻ maqsadlarga, ezgu rejalarga poydorligida!

Shuning uchun ham yurtimizda Navroʻz qadami yetmagan joy, Navroʻz quvonchi kirmagan bironta xonadon qolmaydi. Shuning uchun ham xalqimiz bir-birlariga: "Har kuning Navroʻz boʻlsin!” deya ezgu tilaklar bildirishadi. Gina-kuduratlar unutilib, qalblar tozaradi.

Ming-ming shukr, azizlar! Yurtimizda Navroʻz – tinchlik, totuvlik, mehr-oqibat, muruvvat, qut-baraka ayyomi sifatida bayram qilinadi va bu bayram shukuhi qalblarimizni kelgusi Navroʻz kunigacha aslo tark etmaydi. Bundayin shodiyona, bundayin maʼnaviy mulk – betak-ror ayyom bizning  xalqimizga nasib etganining oʻzi eng ulugʻ siylov, eng koʻrkam ziynat!

Aziz yurtdoshlar! Har biringizga Navroʻzi olam muborak! Navroʻz xonadonlaringizga fayz-u tarovat, ulugʻ baraka, koʻngillaringizga bebaho xotirjamlik, yurtimizga tinch-lik-omonlik olib kelsin!