FUQAROLARNING OʻZINI OʻZI BOShQARISh ORGANLARI XALQNING ChINAKAM MASLAKDOShI VA KOʻMAKDOShIGA AYLANMOQDA

Muhtaram Prezidentimiz Shavkat Miromonovich Mirziyoyevning 2017-yil 3-fevraldagi "Mahalla institutini yanada takomillashtirish chora-tadbirlari toʻgʻrisida”gi PF-4944-sonli Farmoni bilan fuqarolar oʻzini oʻzi boshqarish organlarining mahalliy ahamiyatga molik masalalarni samarali hal qilishdagi rolini yanada oshirish, fuqarolar yigʻinlarining mushtarak manfaatlarini ifoda etadigan uyushmaga birlashish huquqini roʻyobga chiqarish, ularning moddiy-texnika bazasini mustahkamlash hamda davlat organlari va fuqarolik jamiyati institutlari bilan oʻzaro hamkorligini yanada rivojlantirishga qaratilgan tashkiliy-huquqiy chora-tadbirlar belgilab berildi.

Unga koʻra, Fuqarolarning oʻzini oʻzi boshqarish organlari faoliyatini muvofiqlashtirish boʻyicha Respublika kengashiga yuridik shaxs maqomi berilib, fuqarolar yigʻinlarining uyushmasi shaklida qayta tashkil etish, shuningdek, Oʻzbekiston Respublikasi Bosh vaziri, Qoraqalpogʻiston Respublikasi Joʻqorgʻi Kengesi Raisi, viloyatlar va Toshkent shahar, tumanlar va shaharlar hokimlariga tegishincha Respublika Kengashi, hududiy Kengashlarga jamoatchilik asosida raislik qilish vazifasini yuklash belgilandi. Joriy yilning 23-mart kuni Fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman Kengashining tashkiliy yigʻilishi boʻlib oʻtdi. Yigʻilishda Kengash raisi, raisning birinchi oʻrinbosari, raisning yoshlar ishlari boʻyicha, diniy-maʼrifiy masalalar hamda keksalar va faxriylar ishlari boʻyicha oʻrinbosarlari tasdiqlandilar.

Oʻzbekiston Respublikasi Prezidentining 2016-yil 28-dekabrdagi "Oʻzbekiston faxriylarni ijtimoiy qoʻllab-quvvatlash "Nuroniy” jamgʻarmasi faoliyatini yanada takomillashtirish chora-tadbirlari toʻgʻrisida”gi PF-4906-sonli Farmonining 12-bandida fuqarolarning oʻzini oʻzi boshqarish organlarida jamoatchilik asosida faoliyat yuritadigan fuqarolar yigʻini raisining oʻrinbosari – keksalar va faxriylar ishlari boʻyicha maslahatchi lavozimini joriy qilish nazarda tutilgan.

Shuningdek, 2017-yil 3 fevraldagi "Mahalla institutini yanada takomillashtirish chora-tadbirlari toʻgʻrisida”gi PF 4944-sonli Farmonning 2-bandida fuqarolarning oʻzini oʻzi boshqarish organlarida jamoatchilik asosida faoliyat yuritadigan fuqarolar yigʻini raisining oʻrinbosari – yoshlar masalalari boʻyicha maslahatchi lavozimini kiritish belgilangan.

Yuqoridagilarga muvofiq tumanimizdagi 47 ta ovul va mahalla fuqarolar yigʻinlarida vakillar yigʻilishlari oʻtkazilib, shu yilning 29-30-mart kunlari jamoatchilik asosida faoliyat yurituvchi fuqarolar yigʻini raisining oʻrinbosari, keksalar va faxriylar ishlari boʻyicha maslahatchi hamda yigʻin raisining oʻrinbosari – yoshlar masalalari boʻyicha maslahatchilari saylovi boʻlib oʻtdi.

Demokratik tamoyillar, oshkoralik va ochiqlik ruhida oʻtgan saylovlarda xalq vakillari el-yurt ichida obroʻ-eʼtiborli, bugungi davr siyosiy jarayonlarining, turmushimizda roʻy berayotgan oʻzgarish va yangilanishlarning mazmun-mohiyatini chuqur tushunadigan nomzodlarni sayladilar.